El pasu de les elleiciones del 27 de marzu de 2007, nun ficieron más qu’afitar la situación del asturianismu anguañu y dende fai bastantes años. Confirmose la razón de les voces que glayaben pola continuidá del gobiernu d’esta última llexislatura y de les que dicien que’l pastel diba a siguir cortándose ente tres partíos. Los nuevos proyeutos de coalición asturianistes, nun recibieron el puxu de los votantes. Quiciavis seya demasiao pronto pa unos y demasiao tarde pa otros, falando del ampliu conceutu del asturianismu nel que puen entrar tanto’l nacionalismu como’l rexionalismu. Los proyeutos vieyos que presentaron les sos llistes como ya ye vezu notres campañes, siguen enquistaos no que cinca al númberu de votos, causándonos la ya conocía y triste sensación del día dempués de votar, nel que nos planteamos que, anunque tolos partíos asturianistes tuvieres xuntos (utopía), igual nun se algamaba un res. Merez mención a parte la coalición que’l Bloque por Asturies (y non Asturias como se cansaron de dicir munchos reporteros de la TPA) fai con Izquierda Xunida y Los Verdes, ya qu’ufierten otra alternativa al asturianismu, intentando algamar oxetivos como grupu satelite d’un partíu grande y con representación, tantu na Xunta Xeneral como en dellos Conceyos. El problema d’esti tipu d’asturianismu vien cuando’l gobiernu al que perteneces, sigue coles polítiques represives, antiecoloxistes y más propies de la drechona, coles que se supón que yes complice por formar parte d’el y entamen a llover les crítiques de promeses incumplies a cambiu de puestos.
De mano too tien les sos coses bones y les reprochables. ¿Cómo nun diba a ser asina, si falamos d’ún tema onde dempués d’unes elleiciones, tolos partíos se dan la enhorabona por ganar?. En un cuartu de sieglu, deprendimos que Asturies ye diferente, a munchos otros sitios, la so xente ye diferente y los sos vezos son estremaos. Intentar reflexase nel espeyu del nacionalismu d’otru sitiu ye mexar fuera'l tiestu una vegada tres d’otra.
¿Cuál pienses que ye la solución? ¿Siguir trabayando polos partíos asturianistes, hasta que la xente entame a da-yos sofitu? ¿O pol contrariu, intentar colonizar a los partíos que paez que gocen del favor de los votantes, dende dientro, con xente asturianista, que vaya camudando gradualmente la forma de facer política nesti país?
Pa ser sinceros, nós, nun sabemos la rempuesta.
