TrayasgayA

Tolo d'Asturies 2008 en Llangréu

2008-05-20T00:09:00.005+02:00

Tola información y el seguimientu sobre la organización de "Tolo d'Asturies 2008" pue atopase nel blogue del Grupu Reija, que organiza esta amuesa cultural xunto col Ayuntamientu Llangréu. Esta feria d'asturianía concentrarase nunes carpes asitiaes na estación d'autobuses de Llangréu, ente la estación de la renfe de La Felguera y l'estadiu fúbol ""Nuevu Ganzábal". Podeis ver les últimes noticies nesti blogue: www.reija.as/blog

Vienres 23 de mayu:

22:00 hores Conciertu de Los Ciquitrinos (Asturies), Marful (Galicia) y Nuberu (Asturies).

Sábadu 24 de mayu:

12:00 hores Apertura de l'Amuesa Cultural Tolo d'Asturies.

12:00 hores Banda Gaites Conceyu Llangréu.

12:45 hores Banda Música Conceyu Llangréu.

13:30 hores Conciertu Alfaye/Martín (Aragón).

18:00 hores Conciertu Xentiquina.

19:00 hores Monologuismu asturianu, Carlos Alba "Cellero".

22:00 hores Conciertu: Iñaki Diéguez Tríu (Euzkadi), Hammon-Martin Quintet (Bretaña), Dixebra (Asturies).

Tol día folixa y baille pa toes/os cola bandina tradicional A Seques. Animación con grupos de baille y música tradicional. Taller d'alfarería pa neños y neñes (L'Alfar de Faro- Uviéu). Amueses y talleres de deportes y xuegos tradicionales asturianos (Equipu de deporte tradicional Monte Areo).

Domingu 25 de mayu

13:30 hores Toná (Avelino Fernández Corte, Fernando Valle Roso y Marisa Valle Roso).

18:00 hores Homenaxe a la tradición del acurdión, cola collaboración y dirección de Xose Antón Fernández "Ambás".

Homenaxe a Tomás Zapico.

Tol día Folixa y baille cola bandina tradicional A Seques. Animación con grupos de baille y música tradicional. Taller d'alfarería pa neñes y neños (L'Alfar de Faro- Uviéu).

20:00 hores Clausura de la "II Amuesa Cultural Tolo d'Asturies de Llangréu".

Cursos de curdión, nivel mediu y avanzáu.

Flickr pola Oficialidá

2008-05-15T00:36:00.005+02:00

Usuarios de la páxina Flickr, onde se puen subir semeyes y vídios, entamen un grupu onde axuntar semeyes de xente que ye favoratible a la oficialidá de la llingua asturiana. Otra vegada, la web 2.0 ponse al serviciu de la reivindicación pro drechos llingüisticos, utilizando como cadarma Flickr, p'abrir un frente más de llucha pola nuesa cultura y que la situación d'allegalidá que sufre'l nuesu idioma, nun quede silente.

Esta ye la direicción del grupu: http://www.flickr.com/groups/semeyespolaoficialida/

Ana Vanessa por pieces

2008-05-13T11:40:00.002+02:00

El programa “Pieces” producíu por Ediciones Ámbitu y emitíu na TPA los sábados pela mañana va convertise nun magacine nes próximes selmanes y va facelo, de mano de la escritora Ana Vanessa Gutiérrez y con una estética renovada.

El programa ta formáu poles seiciones: -‘Voces’: Retratu d’un intérprete de la canción asturiana o tonada nel que se repasa la so trayectoria musical mentes s’escucha una de les canciones más representatives del so repertoriu. -‘Muséu’. Sección na que personalidaes del mundu cultural asturianu seleccionen el so cuadru preferíu de la colección del Muséu de Belles Artes d’Asturies. -‘Al son’: Un grupu o músicu asturianu interpreta en directo y en versión acústica una canción del so últimu trabayu discográficu. -‘En tables’: El programa va emitir nesti apartáu la grabación d’una pequeña escena de los montaxes que tán preparando les compañíes teatrales del país. -‘Periferia’: Figures de la escena cultural asturiana recomienden una obra musical d’actualidá que s’alcuentra na ‘periferia’ de la industria del espectáculu.

Otra de les novedaes d’esta nueva etapa ye que parte de los espacios van ser grabaos en dellos cafés repartíos per Asturies y nuna llocalización de la Casa Cultura Teodoro Cuesta de Mieres.

El textu ye d'asturnews y la semeya del comerciu dixital.

Llingua, música y agua

2008-05-10T16:12:00.004+02:00

Ayeri foi el XXIX día de les lletres asturianes. Les actividaes centráronse na manifestación que salió a les 19:20 hores de la estación del norte d'Uviéu y l'actu de l'academia de la llingua, qu'entamó al finar la mani, nel Teatru Campoamor. La marcha, dempués de salir de delantre la estación, encabezada por una pancarta na que podía lleese'l llema: "Na reforma del Estatutu: l'asturianu llingua oficial", pasó por tola cai Uría y acabó énte'l Teatru Campoamor, onde una representante de la Xunta dió un comunicáu nel que se falaba de la situación anguañu, de la llingua y l'actitú de clas política asturiana.

Una vegada dientru'l teatru, entamose la xunta extraordinaria de l'academia de la llingua asturiana onde se nomó como nueu miembru a la filóloga Berta Piñán. Tres el discursu d'esta, entamó a lleer les sos páxines Ana Cano, como presidenta de l'academia. Ana Cano faló del futuru y pasáu de la llingua, de les encuestes sociolóxiques, de la programación de la TPA y del nueu rector ente otres coses.

Dellos músicos punsieron puntu final a la tarde de festexos alrodiu'l nuesu idioma, que nesta vegada taben dedicaos a la música n'asturianu. Nuberu, Los Berrones, Llan de Cubel, Carlos Rubiera y Dixebra, tocaron un par de temes ca ún, poniendo'l broche folixeru y amosando una gran complicidá col públicu presente. Pese al orbayu, la manifestación contó con dellos miles de persones, que volvieron a dar una llección y exemplu cimeru de reivindicación dientro d'un civismu intachable.

Zarramos TrayasgayA

2008-05-08T17:56:00.006+02:00

Mañana tamos de fuelga, en protesta pola situación na que la clas política tien, a la nuesa llingua; pegoyu cimeru de la cultura de nueso. Mentatu, caleyaremos otra vegada más poles cais d'Uviéu. Animámoste a esparcer per ende, esta campaña entamada dende altuxa blogs.

9 Mayu 19 hores, Uviéu

2008-05-07T17:43:00.002+02:00

Esti vienres 9 de mayu, Día de les Lletres Asturianes, la Xunta pola Defensa de la Llingua Asturiana convoca a les siete de la tarde una manifestación con salida na Estación del Norte d’Uviéu y col lema "Na Reforma l’Estatutu, L’Asturianu Llingua Oficial".
NA REFORMA L’ESTATUTU L’ASTURIANU LLINGUA OFICIAL
Hai más de venticinco años que los parllamentos de Galicia, País Vascu, Navarra, Cataluña, Valencia y les Isles Baleares incluyeron nos sos estatutos d’autonomía’l reconocimientu oficial de les sos llingües propies. D’esa manera garantizaron a tolos sos ciudadanos el derechu a usar y conocer la so llingua y convirtieron el so patrimoniu llingüísticu nun dinamizador social y económicu bien potente. Les bondaes d’esta midida foron tán evidentes qu’angüaño nengún de los grupos políticos con representación nesos parllamentos taría dispuestu a renunciar a la oficialidá.
Sicasí, n’Asturies siguióse’l camín contrariu. L’Estatutu d’Autonomía d’Asturies nació de la mano d’una clase política provinciana que quixo borrar de la hestoria la nuesa realidá llingüística y cultural.
Venticinco años depués siguimos igual: l’asturianu ye la única llingua del Estáu que tovía nun ye oficial. Añu tres añu siguen apaeciendo casos de discriminación pol usu de la nuesa llingua, l’asturianu sigue teniendo una presencia marxinal -dacuando hasta como motivu de risa- nos medios de comunicación, nel sistema educativu, nes alministraciones, etc.
El resultáu ye que los asturianos somos los únicos ciudadanos del Estáu que nun tenemos reconocíos los nuesos derechos llingüísticos y que por eso, si siguen les coses asina, la llingua asturiana ta condenada a desapaecer ente la marxinación y la vergüenza.
Nestos díes, los grupos parllamentarios representaos na Xunta Xeneral tán nes negociaciones pa otras reforma del Estatutu d’Autonomía. Nun podemos dexar que vuelvan zarralu en falso: la nuesa llingua tien que ser oficial, como les demás. Nun podemos dexar que por culpa d’unos intereses partidistes irresponsables condenen a muerte a una llingua que pertenez al nuesu pueblu dende va más de mil años.
Por eso, la Xunta pola Defensa de la Llingua Asturiana quier convocate a la manifestación que vamos entamar el vienres 9 de mayu, Día de les Lletres Asturianes, y que va salir a les 19:00 hores de la Estación del Norte d’Uviéu.
PORQUE TAMIÉN YE TUYA, L’ASTURIANU LLINGUA OFICIAL, YÁ

Visto na páxina de la Xunta.

El Testamentu Vital llega a Asturies

2008-05-06T18:28:00.005+02:00

Asturies contará, a partir de mañana, con un Rexistru d'Instrucciones Previes o Testamentu Vital, que va permitir a los pacientes, mayores d'edá, manifestar los cuidaos y tratamientos que quieren recibir cuando estos ya nun se alcuentren en condiciones de tomar decisiones. El rexistru, amás de dexar constancia de los cuidaos y tratamientos a recibir en casu d'incapacidá, tamién va poder dexar nidio la voluntá del paciente, de donación de muerganos y texíos. D'esta mena, el documentu contempla la donación del cuerpu a la docencia o la investigación científica nel campu sanitariu. Pero hai qu'aclariar que, nel documentu d'Instrucciones Previes excluye l'aplicación de cualesquier técnica o tratamientos que vayan a la escontra del ordenamientu xurídicu establecíu.

Nesta noticia de LNE ta'l textu completu.

Compra Venta Trayasgaya

2008-04-27T14:20:00.005+02:00

Llevamos ya dellos años col nueso blogue de compra venta. A lo llargo d'esti tiempu, espublizamos dellos anuncios de diferentes estayes (inmobiliaria, música, coches, llibros...) que na so mayor parte siempres veníen de xente averao a nós, collacios y conocíos. Na barra llateral del blogue pusimos el nuesu corréu pa que tola xente que quisiera, nos mandara'l so anunciu pa espublizalu de baldre y poder echar un gabitu a la xente que quier vender o mercar daqué. La rempuesta nesti tiempu, nun foi la que nos hubiera prestao, pero nun queremos piesllar el blogue. Asina que animámosvos a que nos mandeis al acorréu trayasgaya@hotmail.com los vuesos anuncios. De xuru qu'hai daqué que te prestaría mercar o alguna cosina que quies poner a la venta. Esperamos los vuesos correos.

Podeis ver el blogue equí.

Taller de Técnica Vocal en Llangréu

2008-04-22T00:12:00.003+02:00

Fai unos díes recibimos esti corréu y préstanos esparcelo na midía les nueses posibilidaes:

El 26 d' Abril cellebraremos el “Taller de técnica vocal”.
El taller ta
dirixiu principalmente a pandereteras e interpretes de canción asturiana o
asturianada, aunque ye muy práuticu pa músicos de viento (Gaita, flauta,
xipla, etc...).
El cusu fadrémoslo de 16h a 18:30h nel Auditoriu de Cámara
del Conservatoriu Valle del Nalón na Plaza Adaro, S/N 33930 SAMA -LANGREO.
El preciu ye de 15 euros.
Les inscripciones nel 985 67 71 13.
Un
saludu.
Chus Solís.

Próxima Parada, La Folixa de Mieres

2008-04-14T16:38:00.006+02:00

Entramos nuna temporada enllena de conciertos y actividaes. La primer cita ye cola Folixa de Mieres 2008 qu'esti añu será el vienres 18 y el sábadu 19 d'abril. Equí podeis ver el programa:

Vienres 18:
12:00
Programa radiu en directu Estudiu-2000-COPE, dende‘l Parque Xovellanos pa too Asturies, sobre “La Folixa”.
14:00
MENÚ GASTRONÓMICU: Sopa d’ablanes o menestra del tiempu, bacaláu o cabritu y borrachinos o sorbete de sidra.
18:45
Pasucais y darréu, actuación del Grupu Folclóricu “Xorrecer”, en xunto cola Banda de Gaites “Villa de Mieres”.
20:00
NEL PARQUE XOVELLANOS: Pregón y presentación oficial de la Folixa:- Pregoneru: Juan Carlos Fernández Cuesta, xefe informativos TPA.
20:15
Espiche de les pipes de sidra.
20:15
Alcuentros con folclor :- Entrega del VIII Distintivu a la Investigación Folclórica “Fini Suarez” a Lisardo Lombardía Yenes pola llarga y granible llabor nel campu de la cultura tradicional asturiana en toles sos estayes.- Actuación Banda de Gaites “Villa de Mieres”.- Actuación Grupu de Baille “Xorrecer”.
23:00
Actuación “LA BANDINA”.
1:00
Actuación “MICHAEL McGOLDRICK BAND”.

Sábadu 19:
11:30
Actuación del Grupu Folclóricu “Ruxidera”.
12:00
Expiche de les pipes de sidra.
12:00
Programa radiu en directu «Asturias hoy por hoy, especial folixa » de la Cadena Ser, dende la cai Ayer, al llau la cafetería Xovellanos.
13:00
Conciertu nel auditoriu del Parque Xovellanos de la Banda de Música “Mieres del Camín”.
13:00
MENÚ GASTRONÓMICU: Sopa d’ablanes o menestra del tiempu, bacaláu o cabritu y borrachinos o sorbete de sidra.
16:45
Sextu Troféu Gaita Asturiana Folixa na Primavera, Memorial Chema Castañón.- Llugar: Casa Cultura “Teodoro Cuesta”.
17:00
Novena “Esquisa”, taller de xuegos y deportes tradicionales asturianos pa neños/es, pola Asociación Cultural Retueyu.- Xuegos: baltu la llave, los bolos, el tiru al palu, la rana, los aros y los zancos.- Llugar: Parque Xovellanos.
18:30
“Enguedeyu na Cai”:(Grupos de baille y música pala animación al baille tradicional per Mieres)-Na cai Jerónimo Ibrán, miembros de “Xorrecer”.-Na cai Fuente les Xanes, miembros de “L’Artusu”.-Na cai F. Cabezas, miembros de “Prau Llerón”.-Na cai Manuel Llaneza-C.P. Llicéu, miembros de “Ruxidera”.Los músicos (gaita, acordión y tambor) pertenecen a la Escuela de Música Tradicional del Conceyu de Mieres.
19:00
“Caleyando”. Festival d’espectáculos y teatru na cai:“LOCO BRUSCA”, cola obra “Baca Shtruck”, na cai Manuel Llaneza, zona plaza antigua estación del Vasco.
19:00
Espìche de les pipes de sidra.
19:05
Festival de tonada con gaita, vaqueres y dialogada :-Intérpretes: Marisa Valle Roso, José Manuel Robledo “Lolo de Cabranes”, María José García Álvarez y José Manuel García Álvarez.-Gaiteru: Iván Rionda Castro.-Presenta: Vital Noval Álvarez.
20:00
Clásicos de la tonada: Dª. Honorina Redondo Sobero “Nori”.
20:30
Alcuentros col folclor:-Actuación Banda de Gaites “Mieres del Camín”.-Actuación Grupu Folclóricu “L’Artusu”.-Actuación Grupu Folclóricu “Algueirada, de Ponte Cesures, Pontevedra.-Actuación y entrega de premios al ganador y dos clasificaos nel VI Troféu de Gaita Asturiana “Memorial Chema Castañón”.
23:00
Actuación “FELPEYU”.
1:00
Actuación “DERVISH”.
2:30
Quema de les falles de la “Folixa”.
2:45
Interpretación danza de Oñón.

Atopao equí.

Equí teneis el programa completu en pdf.

Concentración delantre'l Gobiernín

2008-04-07T15:18:00.003+02:00

El prósimu llunes 14 d’abril, los grupos parllamentarios representaos na Xunta Xeneral van aconceyar pa tratar sobre la reforma del Estatutu d’Autonomía d’Asturies. Esta nueva reforma ye posiblemente la última oportunidá de poder cuntar, por fin, con un estatutu que s’axuste a la nuesa realidá cultural y llingüística, y que reconoza los mesmos derechos a tolos ciudadanos, falen la llingua que falen.

La Constitución española recueye nel so artículu 3u, “Les demás llingües españoles (amás del castellanu) serán tamién oficiales nes respectives Comunidaes Autónomes d’alcuerdu colos sos Estatutos”. Por eso, va más de 25 años, los parllamentos de Galicia, País Vascu, Navarra, Cataluña, Valencia y Les Isles Baleares aprebaron los sos estatutos reconociendo les sos llingües propies como oficiales, garantizando asina la protección del so patrimoniu llingüísticu y el respetu a los derechos de los sos ciudadanos.

Asturies foi la excepción, la única comunidá con llingua propia que nun la reconoció como oficial.

Nesti tiempu evidencióse que mientres el restu comunidaes supieron dar valor al so patrimoniu llingüísticu, convirtiéndolu nun potente dinamizador social y económinu; n’Asturies siguimos despreciando esi potencial, día tres día la nuesa llingua ta perdiendo falantes y ámbitos d’usu, y sigue siendo motivu de discriminación y vergüenza.

Agora vuelve abrise la oportunidá de tornar esta situación. Esta reforma del Estatutu d’Autonomía tien que recoyer la única reivindicación ciudadana n’Asturies que se vien manteniendo constante nos últimos trenta años. Nun podemos dexar que por culpa d’intereses partidistes irresponsables condenen a muerte a una llingua que pertenez al pueblu asturianu dende va más de mil años.

¡Agora ye’l momentu! Por eso, el prósimu llunes 14 d’abril convocámoste a les 11:00 a la concentración que va facese delantre la Xunta Xeneral. ¡Na reforma l’Estatutu, L’Asturianu Llingua Oficial!

Visto na páxina de la Xunta Pola Defensa de la Llingua Asturiana.

Mexar Fuera'l Tiestu

2008-04-01T15:49:00.006+02:00

Atopamos esti xuegu más propiu d'otru blogue, gracies a un collaciu esbillaor. La wii ye la consola del futuru ya afitándose nos nuesos llares a una velocidá que mete miéu. Ya sabemos qu'en Xapón siempres van un pasu per delantre nestes dómines, asina que ta perclaro qu'esti ye'l siguiene llanzamientu. Na versión que van exportar p'Asturies, vien algo camudada, asina, los mexaeros van convertise en tiestos. Esto nun ye un cambiu al azar, sinon que respuende a un llargu y valoratible estudiu de la sociedá del nuesu pueblu. En Xapón tienen nidio, que lo de mexar fuera'l tiestu va triunfar equí, por que ye deporte tradicional y la xente ta avezada a ello den fai sieglos. Esto nun ye oficial, y tengo miéu que seya mentira, pero tengo entendío que l'alministración asturiana ya encargó un bon pedazu de caxes con esti xuegu.

XV «Concursu de cuentos pa rapacinos y xóvenes d’Asturies»

2008-03-27T19:14:00.004+02:00

Acaba de convocase la XV edición del «Concursu de cuentos pa rapacinos y xóvenes d’Asturies» qu’entama l’Asociación Cultural El Portón en collaboración cola Asociación Xuvenil El Tragaluz y la Fundación Docente de Mineros Asturianos.

Les obres tienen que tar n’asturianu y nun tener más d’ocho fueyes mecanografiaes a doble espaciu. Les obres de rapacinos tamién se puen mandar escrites a mano. Hai tres categoríes: primaria, con un primer premiu de 100 euros en llibros y segundu de 50 euros en llibros; secundaria, módulos y bachilleratu, con premios de 150 y 100 euros en llibros pal primeru y segundu, respectivamente, y mozos de 19 a 30 años, con premios de 300 euros pal primeru y de 200 pal segundu.

L’orixinal y tres copies han unviase col sistema de plica a l’asociación cultural El Portón (Apartáu 140 d’Uviéu) poniendo’l nome del concursu y la categoría a la que se presenta. El plazu acaba’l llunes 28 d’abril de 2008.

Información atopada equí.

El Musi Torga la Campaña de Normalización Llangreana

2008-03-21T01:34:00.005+02:00

Fai unos díes, l'Ayuntamientu de Llangréu presentó la so nueva campaña de normalización llingüística dirixía al sector hosteleru. La campaña daba continuación a la que se punsiera en marcha l'añu pasáu, nomada "Equí tas en casa" y qu'enllenó de cartelos n'asturianu los chigres de Llangréu teniendo una acoyida perbona tanto ente chigreros como ente clientes. Esta campaña tien l'enfotu de utilizar la hostelería llangreana como axente dinamizador y normalizador de la nuesa llingua. El material que se diba a repartir yeren trípticos, servilletes, toallines de llimón y sobres d'azucre que van llevar impresu'l cartelu publicitariu de dos de los museos más importantes del conceyu: la Pinacoteca Eduardo Úrculo y el Muséu de la Siderurxa d'Asturies.

La sorpresa vien cuando nos enteramos que l'Asociación Musi-Pedro Duro, propietarios de la marca Musi (que tien el so usu cedíu al patronatu del Muséu de la Siderurxa) tien denunciada la campaña por utilizar la imaxe del Musi en campañes municipales que nun «revierten nos intereses del muséu, pa lo que foi cedida en su día». Esta asociación decidió requerir al Ayuntamientu Llangréu que «retire la marca de la campaña», entamando los trámites llegales pa retirar definitivamente la utilización de la marca Musi, denunciándolo ante la oficina de patentes.

Consigues perres pa una campaña, entames a trabayar, sáquesla alantre, faes publicidá de los dos museos más importantes del pueblu (publicidá de baldre) y encima denúnciente. Si nun ye qu'esta hestoria tien dalgún interés ocultu, yo nun la entiendo.

Que dificil ye facer daqué en condiciones nesti país, enxamás sabes por onde te van dar...

¿Quién vota más?

2008-03-13T01:52:00.006+02:00

Que nel Estáu Español nun toles persones valen lo mesmo yera persabío. Pero lo que nunca pensare foi que los votos de los ciudadanos valieren diferente. Si bien los medios de comunicación de tolos signos y collores dexen el peyeyu n’exaltar les virtudes del estáu democráticu nel que vivimos, siempre escaecen cuntanos que nun tolos ciudadanos del Estáu Español tienen el mesmu valor democráticu.

Yá tamos acostumaos a que unos paguen unos impuestos y otros paguen otros, a que unos cobren unos sueldos y otros por desempeñar el mesmu trabayu cobren muncho menos, Pero los más gordo y grave (al mio xuiciu) ye que nun toos somos ciudadanos al mesmu nivel.
Según la Llei electoral vixente, hai votos y votos.

La Llei d’Hont favorez a la mayoría, esto ye que los partíos más votaos son los que tienen más escaños d’una manera desproporcional. A estos sumense los partíos nacionaliegos de Galicia, Euskadi y Cataluña que tamién se ven favorecíos. Un votu al PSOE o a un partíu nacionaliegu Catalán o Vascu val más que’l votu a ún partíu minoritariu o d’otra comunidá.

Vamos a exemplificalo y el que quiera buscar más información ye llibre de facelo.

¿Cómo ye posible que Izquierda Xunida tenga casi un millón de votos y dos escaños y CIU tenga más de 200.000 votos menos y 11 escaños?. ¿Cómo ye posible que el PSOE tenga 10 veces más votos qu’IX pero tenga 167 escaños más?.

Si’l votu de cada ciudadanu español valiere lo mesmo, que al mio xuiciu ye lo que tenía que ser, el resultáu electoral sedría’l siguiente:

PSOE……………………………..160 Escaños
PP…………………………………146 Escaños
IU………………………………….14 Escaños
CIU…………………………………11 Escaños
PNV…………………………………4 Escaños
ERC………………………………….4 Escaños
UPD…………………………………..4 Escaños
BNG………………………………..…4 Escaños
CC-PNC……………………………... 2 Escaños
NA-BAI……………………………….1 Escañu

Resultaos 9 M

2008-03-10T01:10:00.006+02:00

Les elleiciones son cada vegada más, cosa de dos. N'Asturies el PP y el PSOE repartiéronse el 88,34% de los votos tocándo-yos 4 escaños pa cada ún. El 11,66% restante tuvo repartíu ente les demás fuercies polítiques, destacando'l puestu del "Partido Antitaurino Contra el Maltrato Animal", que se consolida como 7ª fuercia n'Asturies y la entrada del partíu "Unión Progreso y Democracia" de la ex socialista Rosa Diez, qu'entra como cuarta fuercia ante'l ellectoráu asturianu.

La izquierda asturianista foi la gran derrotada, ya que la coalición "IU, BPA, LV" nun algamó nengún escañu nel congresu, "UNIDÁ" quedó con 830 votos y "Andecha Astur", que paez la única que salvó el tipu, namás llegó a 1264 votos. Un añu más la dixebra de la clas política asturianista, pasa factura a la ilusión de los sos votantes, que ven otra vegada como'l so votu queda amontonáu ente'l cuchu.

Resumen del escrutiniu d'Asturies:
Escaños totales: 8
Votos contabilizaos: 674738 - 73.8 %
Abstenciones: 239484 - 26.2 %
Votos nulos: 4317 - 0.64 %
Votos en blancu: 8550 - 1.27 %

Equí teneis tola información.

La gran guía de los Blogs 2008

2008-03-06T12:34:00.003+02:00

Acaba d'espublizase “La Gran Guía de los Blogs 2008” que foi escrita por Rosa Jiménez Cano y Francisco Polo.

L'aniellu Minoic.net, Bitacoras.com y nativos2020.com, cola collaboración de la colección Planta29, ponen a disposición de toos y toes la edición escaneada pa la so llibre y gratuita descarga en formatu PDF.

Llangréu escontra la violencia de xéneru

2008-03-01T22:03:00.004+02:00

El llunes, día 3 de marzu, concentración escontra la Violencia de Xéneru na Plaza’l Conceyu.

El llunes, día 3 de marzu, a las 12.00 hores, tendrá llugar na Plaza’l Conceyu una concentración de rechazu a la violencia exercida pa contra les muyeres. A esti actu acudirán representantes políticos del conceyu, y tamién representantes de les asociaciones de muyeres y distintos colectivos del conceyu a los que van xunise, como pasa’l primer llunes de cada mes, un ampliu grupu de ciudadanos y ciudadanes. Na concentración, va lleese un manifiestu pa contra la violencia de xéneru y va guardase un minutu silenciu poles víctimes, que son yá catorce a estes altures del añu.

Información esbillada de la páxina del Conceyu.

El vídiu de la entruga la neña

2008-02-22T17:34:00.005+02:00

El vídiu d'esta neña ta corriendo como la pólvora pola blogosfera n'asturianu. Ye una entruga más de les que los ciudadamos del estáu cuelguen nel youtube col enfotu de que lleguen a ser respondíes polos cabezaleros de los partíos políticos mayoritarios.

Güei mesmo, recibimos esti corréu:

"Tenemos una entruga Incómoda pa los políticos:

http://www.youtube.com/watch?v=PuijrGw2vTs

Si te parez bien puedes votala na WEB: http://es.youtube.com/elecciones08

Das na pestaña "VOTAR" (que ye la tercera) y ehí podeis buscar el vidiu de EntrugaIncomoda .... y si vos parez oportunu, votar a favor (o en contra) sigún indiquen les manos.

La promoción d'esti vidiu ye bien recibida.

Gracies"

Si te peta, vota, a ver si llega a la oreya que tien que llegar.

Trucos pal día a día. Pelar les pataques

2008-02-20T01:32:00.003+02:00

Otru vídiu útil pa meyorar la vida de la xente. ¿Cuantes vegaes dexaste de xintar pataques frites por nun tener que pelales?, pues eso terminose con esti trucu que podeis ver nel vídiu. Sí amiguinos y amiguines, esti vídiu ta sacáu de la rede y ye la preba de que interné val pa dalgo más que pa lo que toos pensais.

Una blogosfera más normal

2008-02-12T02:21:00.001+02:00

Paez que vamos siendo una blogosfera más "normal". Los últimos meses hebo un puxu nel númberu de blogues qu'entamaron el so caleyar y a más númberu, más bayura de conteníos, que ye unu de los puntos que se criticó nel "I Sidra&Blogues".

Ya se tien falao que tenemos l'inprescindible blogue porno que toa rede necesita y agora ya tenemos un blogue friki amante de la cultura bizarrra, dispuestu a enseñanos los baxos d'esti inframundu. Entá ye la política-llingua'l tema estrella de la nuesa comunidá, pero temes estremaos tan faciéndose un llugar ente lo blogues qu'usen la nuesa llingua. Asina, hai un que va de cine, otru que fale de llibros, otru sobre la minería, otru sobre filosofía, otru d'un grupu de baille, otru de compra-venta, otru de música de raigañu, otru sobre los conteníos de la rtpa n'asturianu, otru d'una escuela de música tradicional, otru de chigres, otru de cine más, otru d'un grupu aficionáu al Real Uviéu, otru pa la compra de llibros n'asturianu de segunda mano, otru eróticu y de xuru que munchos otros de d'otros temes estremaos qu'agora nun me vienen a la tiesta.

El caleyar ye sele y llentu pero vese diferencia comparando col añu pasáu y más col anterior. Paez que vamos siendo una blogosfera más normal, piquiñina, pero más normal.

Trucos pal día a día. El Güevu Cocíu.

2008-02-06T20:24:00.000+02:00

Entamamos una serie de conseyos que nos echen un gabitu na dureza de la vida d'anguañu. La mayor parte d'ellos tienen como fin cimeru facenos más fáciles les actividaes cotidianes y aforrar tiempu, pa poder malgastalu notres coses. El primeru ye muy útil n'espiches y cenes de solteru emancipáu. Comodidá y aprovechamientu de los recursos al pelar un güevu cocíu en diez segundos. Dicen que pues salvar 4 díes de la to vida. Tecnoloxía punta.

Antroxu Infantil en La Felguera

2008-01-31T11:08:00.000+02:00

Dende la páxina del Grupu Reija pue descargase la fueya p'apuntase al Antroxu Infaltil 2008 de La Felguera, que se va cellebrar el martes, 5 de febreru. Dende’l día 29 de xineru, les fiches d'inscripción podrán garrase na Casa la Cultura La Felguera, o descargase na páxina web http://www.reija.as/ .

Eses fiches cambiaránse pol dorsal correspondiente na propia Casa de la Cultura ente les 10.30 y les 17 hores del mesmu día 5. A les 17.15 hores va facese una concentración de tolos participantes nel parque Vieyu (si ye qu'orbaya, la concentración fadráse na pista les escueles públiques Eulalia Álvarez Lorenzo). Ente les actividaes pa esi día destaca'l desfile dende'l parque pa la pista les escueles, onde se cellebrará la fiesta d'antroxu con música, regalos y xuegos… hasta les 20.30 hores.

Dientro de la seición "noticies" de la páxina http://www.langreo.as/ teneis el programa coles feches y hores de tolos antroxos de Llangréu.

Amás de ufiertar la fueya p'apuntase, dende la web http://www.reija.as/ tamién se pue baxar de baldre'l calendariu 2008 del Grupu Reija.

Ubuntu n'asturianu en comuña

2008-01-25T00:11:00.000+02:00

Fai pocos díes recibimos esti corréu na nuesa cuenta:

"Mui bones.
Soi l'autor del blog qu'echa un gabitu pa istalar
Ubuntu (Linux) http://ubuntuasturianu.blogspot.com/

Quería pedite que si puedes y quies pusieres una
entrada nel to blog, esplicando que ye posible tornar
col gabitu de la xente Ubuntu al asturianu.

¿Imaxines un ordenador al 100% n'asturianu? Parezme
una perbona ocasión pa espoxigar la nuestra llingua.
¿Los requisitos? Que la propia xente torne nuna web
bien cenciella, onde puedes tornar dende una frase
fasta les que quieras.
Una vez tornao, cuando se istale Ubuntu
(www.ubuntu.com) daríate a escoyer l'asturianu como
idioma d'istalación :D

Pa ello hay que facelo dende:
https://translations.edge.launchpad.net/ubuntu/hardy/+lang/ast
(Hai que rexistrase anantes).

Un saludu fonderu.
Marquinos."

Dicho queda pal que quiera collaborar.

Reportaxe Gráficu: Benazir Bhutto

2008-01-16T19:01:00.000+02:00

John Moore - Getty Images, foi l'últimu fotógrafu en retratar a Benazir Bhutto con vida. Pa facer un reportaxe gráficu de primera mano, hai que tar cerca del sitiu onde se produz l'acontecimientu que se quier inmortalizar. De xuru que toos y toes nos alcordamos que dellos periodistes que perdieron la vida por tar nel mesmu megollu de la noticia. John Moore foi la persona que retrató los caberos momentos de la vida de Benazir Bhutto en el reportaxe pa'l New York Times.

Los comentarios a les semeyes son del propiu autor, nellos explica, porqué esbilló los encuadres y esgrana'l tipu de cuestiones qu'un fotoreporteru plantégase al facer el so trabayu. Podéis lleer la trescripción d'estos comentarios en castellan en ZoneZero

Equí podeis ver esti documentu gráficu.

Esbillao d'equí.