Coses de Neños I

Basta con char una güeyada p’atrás pa decatase de que’l mundu xiró siempre al rodiu la vida los adultos. Ser neñu nun pue dicise que fuere fácil a lo llargo la hestoria. Los neños fueron y siguen siendo víctimas de los conflictos familiares y el maltratu, de la marxinación social y de la probitú, de la crueldá, la violencia y la guerra, y a pesar de too, el so inxeniu, sorrisa ya inocencia caltiense neto que fai sieglos.

Ye induldable que l’estáu de los neños camudó enforma anguañu. En munches ocasiones considerose al sieglu XX como’l sieglu del neñu. Nos caberos años, la infancia y los sos problemes, atrayeron l’atención ya esmolecimientu de los adultos, asina y too entá hai diferencies dependiendo de la suerte de nacer nun continente, país o comunidá determinada.

Los neños asturianos d’anguañu aparentemente tiénenlo too; ya ensín embargu, enxamás se sintieron tan solos como agora. Poro, delles actitúes de los adultos, qu’en dalgunes vegaes déxense llevar por un empeñu de proteición mal pescanciáu, los neños pásense llargues hores zarraos en casa o nos munchos cursos estraescolares, ensín espacios pal xuegu y la rellación con otros neños.

Pero ¿Qu’asocedía nel mundu de l’Asturies rural tradicional enantes del sieglu XX? ¿Cómo yera la vida de los neños d’antañu?

Pa ser sinceros nun tenemos de pensar nun paraísu de dolzura ideal nin nun tratu a los guajes especialmente amable na mayoría de les ocasiones por parte de los adultos. Entá asina, yera una de les etapes coinsideraes clave nos moos de vida tradicionales. La formación mentantu tenía de siguir unes normes que-yos permitieren poder desendolcar les sos vides na edá adulta.


Publicación de La Asociación d'Etnografía y Folklor Reija de Llangréu