XIX Conciertu pola Oficialidá

TrayasgayA pudo averase un añu más a la carpa que la xente de la Xunta Pola montó, esti añu averada'l campu la Ería d'Uviéu, aprovechando la cantidá d'aparcamientu de baldre qu'hai alrodiu d'él. El conciertu entamó pasaes les 19:30 hores cola música folk de Llangres, siguío de la presentación del nuevu discu del cantautor Toli Morilla. El duu Lafu y Rebeca Velasco, dió pasu al tríu Tuenda que consiguó xuntar el mayor númberu de xente dientro de la carpa no que duró la nueche. Les pandereteres de Dulcamara, fundiéronse darréu col Hip-Hop de K-Nalón que deleitó a la xente con música, rimes y una exibición de graffiti a cargu de l'artista de La Felguera Chus Matos, onde podía lleese l'eslogan "Llingua Como Arma". La xente entá guardaba fuercies pa danciar, saltar y glayar col grupu Skama la Rede, que tamién presentó temes del so nuevu trabayu "Echaos a la Mar" meciéndolos colos cantares del so primer discu. El pieslle a la nueche púsolu Chalaneru Sound Sistem col so reggae n'asturianu.

En conxuntu, foi otru ésitu participativu y organizativu, por parte de la xente que tolos años yos toca trabayar, mientres los demás tamos de folixa. Un conciertu pluritemáticu onde se tocaron dellos estilos musicales y onde xente de estremaes tribus urbanes, orientaciones y gustos, compartieron nueche enbaxo la mesma carpa y alrodiu de la música en xeneral y la nuesa llingua en particular.

En pocos díes podrán vese espublizaes equí les conclusiones de lo que foi el I ALCUENTRU DE BLOGUEROS ASTURIANOS de la XIV Escuela de Seronda.

Salú.

Lleer Más...

Nós Tamién Vamos a Xixón

Dellos miembros de TrayasgayA ya se apuntaron na páxina http://www.cmpa.es/v_juventud/apartados/pl_contenido.asp?te=602 pa poder asistir a lo que pretende ser el primer alcuentru de blogueros en llingua asturiana. Dende equi queremos dar el nuesu másimu apoyu a esta iniciativa. Llevamos tiempu ya, difundiéndolo pela blogosfera asturiana y camentando ente los blogues que nos presta lleer, pa que naide quede ensin enterase d'esti asuntu. Al marxe del nuesu interés por xuntanos y poner coses en comuña con otros blogueros que usen la llingua asturiana como vehiculu de tresmisión, na Escuela de Seronda va a haber más actividaes rellacionaes colos bloges. La parte dedicada a esti tema entamará'l domingu 29 a partir de les cuatro la tarde y el llunes 30 dende pola mañana. Too esto será nel vieyu Insitutu Xovellanos, aunque tamién habrá conciertos pola nueche notros llaos de Xixón y delles cosiquines más.

Segun pudo saber TrayasgayA los temes van centrase nes "Comunidaes Virtuales", "Aprovechamientu de los Espacios de Baldre na Rede" y dellos talleres y charres qu'ampliaran la ufierta, a cargu de xente de fuera'l nuesu país y otros llariegos como el conocíu direutor de cortos jim-box , autor de la esitosa serie de Henry Felgueroso que podemos atopar nel youtube. El domingu 29 l'horariu será de 16 a 19:30 hores y el llunes de 9:30 a 14 hores y de 16:30 a 19:30 hores pela tarde.

Sabemos que otros Blogues como MunduXaime, El Fortín del Chamicu, Xabeldiz, Metalastur o Asturtec ya confirmaron la so presencia, asina como otra xente que nun conocemos y nun sabemos si tarán detrás d'otres bitácores conocíes o serán los prósimos en crear un nuevu blogue fechu n'Asturies. Otros como Ricardo Candás de ,La Esfoyaza camienta que nun podrá dir pero esparde'l llamamientu dende'l so espaciu.

Esperamos venos en Xixón el fin de selmana. Salú.

Lleer Más...

L'Orixe de los Blogs

Entrugámonos si esto de los blogs ye una moda, una corriente friki, un hábitu ya afitáu na sociedá o una maniobra impuesta como tantes otres, que nos fai sentinos bien cola sensación artificial de llibertá dientro del nuesu corralito, ya que fai poco lleimos que se tan utilizando los blogues pa desacreditar determinaes marques comerciales, aprovechando la credibilidá que los llectores de bitácores dan a los articulos que lleen casi a diario. Y al entruganos sobre un tema concretu, necesitamos conocer el so orixe, pa entender la so evolución y el so posible futuru.

Al falar de l'orixe de los weblogs o blogs, les opiniones apunten a enmarcalos dientro d'una evolución hestórica a partir d'aquelles páxines web qu'entamaron a recibir comentarios de los usuarios, los que a la so vez, los complementaben con enllaces pa otros sitios. La aparición del primer weblog foi nel añu 1993 y foi creáu por unu de los pás d'interné, Tim Bernes Lee. Esti consistía en un llistáu de webs y los sos links correspondientes acompañaos d'un curtiu comentariu. En xunu d'esi añu el National Center for Supercomputing Applications (NCSA) publica una bitácoral nomada What???s New (cuales son les novedaes) na cual proporcionaba una llista sobre la creación de nuevos sitios n'interné. Taba ordenada por feches y podíen facese comentarios. lluéu esti serviciu pasó a ser controláu por Netscape quien lu convirtió na primer guía de sitios d'interné, monopolizando el mercáu ente los años 1993 hasta fines de 1995. En 1996 Dave Winer, escribe un bloge históricu pa'l maratón ???24 Horas pa la Democracia???, que tien por obxetivu cellebrar un alcuentru online pa sofitar el llibre discursu na rede.

Posteriormente Winer, funda una empresa especialmente dedicada al desarrollu de programes pa la creación de weblogs. Diciembre de 1997: Jorn Barger introduz el términu "weblog" na acepción que güei conocemos. En 1999 apaez Eatonweb Portal, el primer portal dedicáu esclusivamente a los blogs. En agostu del mismu añu Pyra Labs, empresa que posteriormente foi adquirida por Google, llanza Blogger, ún de los servicios de baldre más populares na creación de blogs. A partir del añu 2000 el fenómenu de los bloges masifícase, apaecen nuevos servicios pa edición y agospiu como Bitacoras.com o WordPress, ente otros, y los bloges entamen a ganar numerosos adeptos por too'l mundu.


Fonte: http://www.atinachile.cl/content/view/2455

Lleer Más...

La Llibrería. El Conde de Montecristu.

Alejandro Dumas (1802-1870). Escribe alrodiu de 91 obres de teatru, unes 200 noveles o relatos curtios, unos 10 volúmenes de memories y unos 19 volúmenes d'impresiones de viaxe. Funda y dirixe 8 periódicos y acaba la so vida redactando un dicionariu de cocina.
Esta novela foi publicada por entregues en 1845.

Les 1154 páxines puen resultar un escollu a la hora de decidise a lleer esti llibru. Dígolo porque paso-y a una servidora. L'autor gustábame, aunque entá non demasiao, y amás tenía tapes dures y lletra pequeña. Di-y una oportunidá por ser un regalu de la mio proxenitora y de cumpleaños. Ye cierto que m'enganchó hasta tal puntu que sacrifiqué hores de suañu y a la fín entendí que son necesaries cada una de les 1154 páxines que tien el llibru. Por dientro tien la estructura d'un perfeutu arquitectu: too nel so sitiu y al so tiempu. Nun paez que tes lleendo un llibru de fai cuasi dos sieglos. Ye un clásicu, pero nun ye aburríu.

La hestoria tien llugar en Francia, Italia y varies islles del Mediterráneu durante los fechos hestóricos de 1814–1838.
Edmundo Dantés, un marineru mozu, llega al puertu de Marsella dispuestu a casase cola so moza catalana Mercedes. La hestoria, en principiu feliz, vese truncada por Danglars,Villefort, Fernand Montego que ven en Dantés una torga pa conseguir lo que quieren. En plenu banquete de boda con Mercedes, Dantés ye acusáu de cospirador y posteriormente enzarráu nel castiellu de If nel día 1 de marzu de 1815. Yera el presu númberu 34.
Dempués de 6 años encarceláu, rozando la llocura y pasando pola idea del suicidiu, descubre a un peculiar compañeru de prisión: el Abate Faria que nun fai más qu'insistir en que tien un tesoru escondíu. Na mio opinión esta ye la meyor parte del llibru. Atopa compañía, un collaciu y una fonte inacabable de los conocimientos teóricos y práuticos más avanzaos del so tiempu.
Dantés pasaría na cárcel hasta 20 años. Escápase de la cárcel y alcuentra el tesoru del Ábate na Islla de Montecristu. Y aquí ye onde entama la hestoria d'una venganza paciente y perbien calculada. El conde, irreconocible, va recuperando poco a poco el contautu colos sos vieyos enemigos que-y van dando pistes sobre los sos puntos flacos. La venganza, ensin duda, ye un platu que tien que servise fríu.
Un home que tuvo tantu tiempu pa pensar y pa palpar la so desgracia, resulta implacable cuando'l destín pon-y en bandexa la posibilidá d'un axuste de cuentes colos sos enemigos.

“Siéntate na puerta de to casa a esperar y verás el cadáver del to enemigu pasar”.

Fontes:
El conde de Montecristo Editorial Debate S.A
El club dumas d'Arturo Perez-Reverte
Wikipedia

Fecho por Sil pa TrayasgayA.

Lleer Más...

El Meme

Recibimos esti xuegu de Lux Omnia vincit, xunto con Atlantic Prau y Mundu Xaime.

Un meme ye, según les modernes teoríes sobre la trasmisión de la cultura a les nueves xeneraciones, la unidá mínima de trasmisión de la herencia cultural. El neoloxismu foi acuñáu por Richard Dawkins, por mor de que se asemeyaba fonéticamente col términu xen (introducíu en 1909 por Wilhelm Johannsen para nomar les unidaes mínimes de trasmisión de herencia biolóxica) y, por otra parte, pa señalar la similitú del so raigañu con memoria y mímesis.

Enunciáu:

Una tipografía
La mio rempuesta: Lisboa

Una páxina web imprescindible
La mio rempuesta: google

Un blogue notra llingua distinta l’asturianu
La mio rempuesta: Caborian - es

Y agora, páso-yos esti meme a otros tres blogues pa que sigan la cadena:

Esfarrapando'l Mundu
Ai un galán d'esta villa
El fotolog de Raúl

Puxa los bloges de resistencia cultural.

Lleer Más...