La Llibrería. El Conde de Montecristu.

Alejandro Dumas (1802-1870). Escribe alrodiu de 91 obres de teatru, unes 200 noveles o relatos curtios, unos 10 volúmenes de memories y unos 19 volúmenes d'impresiones de viaxe. Funda y dirixe 8 periódicos y acaba la so vida redactando un dicionariu de cocina.
Esta novela foi publicada por entregues en 1845.

Les 1154 páxines puen resultar un escollu a la hora de decidise a lleer esti llibru. Dígolo porque paso-y a una servidora. L'autor gustábame, aunque entá non demasiao, y amás tenía tapes dures y lletra pequeña. Di-y una oportunidá por ser un regalu de la mio proxenitora y de cumpleaños. Ye cierto que m'enganchó hasta tal puntu que sacrifiqué hores de suañu y a la fín entendí que son necesaries cada una de les 1154 páxines que tien el llibru. Por dientro tien la estructura d'un perfeutu arquitectu: too nel so sitiu y al so tiempu. Nun paez que tes lleendo un llibru de fai cuasi dos sieglos. Ye un clásicu, pero nun ye aburríu.

La hestoria tien llugar en Francia, Italia y varies islles del Mediterráneu durante los fechos hestóricos de 1814–1838.
Edmundo Dantés, un marineru mozu, llega al puertu de Marsella dispuestu a casase cola so moza catalana Mercedes. La hestoria, en principiu feliz, vese truncada por Danglars,Villefort, Fernand Montego que ven en Dantés una torga pa conseguir lo que quieren. En plenu banquete de boda con Mercedes, Dantés ye acusáu de cospirador y posteriormente enzarráu nel castiellu de If nel día 1 de marzu de 1815. Yera el presu númberu 34.
Dempués de 6 años encarceláu, rozando la llocura y pasando pola idea del suicidiu, descubre a un peculiar compañeru de prisión: el Abate Faria que nun fai más qu'insistir en que tien un tesoru escondíu. Na mio opinión esta ye la meyor parte del llibru. Atopa compañía, un collaciu y una fonte inacabable de los conocimientos teóricos y práuticos más avanzaos del so tiempu.
Dantés pasaría na cárcel hasta 20 años. Escápase de la cárcel y alcuentra el tesoru del Ábate na Islla de Montecristu. Y aquí ye onde entama la hestoria d'una venganza paciente y perbien calculada. El conde, irreconocible, va recuperando poco a poco el contautu colos sos vieyos enemigos que-y van dando pistes sobre los sos puntos flacos. La venganza, ensin duda, ye un platu que tien que servise fríu.
Un home que tuvo tantu tiempu pa pensar y pa palpar la so desgracia, resulta implacable cuando'l destín pon-y en bandexa la posibilidá d'un axuste de cuentes colos sos enemigos.

“Siéntate na puerta de to casa a esperar y verás el cadáver del to enemigu pasar”.

Fontes:
El conde de Montecristo Editorial Debate S.A
El club dumas d'Arturo Perez-Reverte
Wikipedia

Fecho por Sil pa TrayasgayA.