¿Qué pasa en Caliao?

22.9.06

print this page
send email
La Plataforma en Defensa del Parque Natural de Redes organiza una acampada solidaria pa los próximos díes 22, 23 y 24 de setiembre nel pueblu de Caliao. Los asistentes a la concentración van conocer de primera mano les demandes d'esti colectu enfotáu na protección de la reserva natural, al tiempu que van poder esfrutar d'escursiones pela zona, nes que van asistir a la berrea de los venaos asina como pasiar pel desfiladeru de Los Arrudos.
El vienres día 22 ta prevista la salida n'autobús dende l'edificiu de les conseyeríes de Llamaquique, n'Uviéu con destín a Caliao, onde se va desplicar a tolos participantes el motivu de l'acampada, al traviés d'una proyección de diapositives. A lo llargo de los díes que dure la concentración, habrá escursiones pela zona nes que va poder asistise a la berrea de los venaos, asina como a diverses charres y alderiques organizaos por Itoiz, Fundación Rodríguez de la Fuente y la Plataforma de Redes.
Les nueches de l'acampada van tar amenizaes por trés velades musicales.
L'oxetivu d'esta acampada ye'l de reclamar un cambiu na política del agua n'Asturies y una nueva cultura del agua, refugando instalaciones como'l pretendíu embalse de Caliao.
Per otru llau l'acampada divide a los socios de gobiernu asturianu. Mentes que los responsables de Medio Ambiente del Principáu prohibieron la celebración de tala acampada a traviés d'una nota unviada pola Viceconseyería de Medio Ambiente, firmaba pol director xeneral de Recursos Naturales, Cristino Ruano, el conseyeru de Xusticia, Francisco Javier García Valledor, manifestó'l rechazu a esta decisión, de la que desixó la 'inmediata rectificación', afalando a los participantes a mantener la convocatoria por tar dientro 'de l'absoluta normalidá democrática'.
Pesie a la polémica, los responsables de l'acampada, qu'aseguren nun ser a creyer esta decisión per parte de la Conseyería de Medio Ambiente, mantienen la convocatoria, yá que va tiempu qu'ésta taba en conocimientu del director Conservador del Parque de Redes, y amás cuenta cola autorización del Ayuntamientu de Casu pa facer esta actividá al traviés del Alcuerdu de la so Comisión de Gobiernu de fecha 23 de mayu.

Fonte: ASTURNEWS

1 bilordios:

asturies.com dijo...

La Plataforma Pola Defensa del Parque Natural de Redes va presentar una denuncia contra'l Delegáu del Gobiernu n'Asturies, Antonio Trevín, y contra Cristino Ruano, Director Xeneral de Recursos Naturales del Principáu, pol "descomanáu" despliegue policial del pasáu fin de selmana en Caliao. Xunto a esta denuncia van dirixir una quexa a la Procuradora Xeneral por violación de derechos y llibertaes.