¿Veis lo que pasa col asturianu n'Asturies? Dalgo asemeyao a lo qu'asocede col español na Xunión Europea. Si nun fuere que nun tien gracia, sería pa rise.
Un tíu de Bush, William, ganó mediu millón de dólares al vender aiciones d'una empresa contratista del Departamentu Defensa gringu n'Iraq. Too queda en casa.
Apaez en Tapia una ballena muerta de 17 metros y 30 tonelaes. El presidente Vicente aprovechó pa recordar que non toles especies emigren d'Asturies, que tamién les hai que vienen.
Nuna receición oficial en Buckingham, la reina de la Gran Bretaña preguntó-y a Eric Clapton si llevaba muncho tiempu con eso de tocar la guitarra. Y si eso nun ye un motivu pa declarar la república, entós nun sé cuál será.
Por cierto, Ovidio'l del PP compara'l proyeutu de nun soterrar les víes del tren n'Avilés cola muria de Gaza. Pa delles persones, el sentíu de la midida ye un sinsentíu.
Nel añu 2005, Cabrales ellaboró más de 470.000 quesos con denominación d'orixe. La pregunta ye, ¿cuánta lleche darán les vaques cabraliegues pa llegar a eses cifres?
El PSOE defende en Madrid el plurillingüismu d'España. En Madrid.
La zona central asturiana, la que más población concentra, ta ente les más contaminaes del Estáu. Sicasí, el gobiernu de Vicente sigue vendiéndonos una Asturies irreal, verde y monollingüe.
Bush alvierte a Irán de que'l "mundu nun los va dexar tener armes nucleares". A esti home habría qu'informalu de que'l 'mundu' y los EE XX son dos coses diferentes.
Si ganen les eleiciones, el PP promete privatizar la televisión autonómica. Y el que promete nun ye traidor.
El Congresu madrilanu aprobó que l'añu 2006 seya'l del homenaxe a la II República. Lo que nun sabemos ye si la familia real va tar invitada a los homenaxes.
Piqué ta engardíu con Rajoy, Bono ta engarriáu con Maragall y Josemari va xintar con Bush. Ye como si los 4 primeros tuvieren un rollu y los 2 últimos tuvieren casaos pela Ilesia.
El Bancu Santander ganó l'añu pasáu más que nenguna otra empresa española de la Historia, 6.200 millones d'euros. Qué mal repartida ta la riqueza.
Diz un titular: "L'infartu d'un home nun avión reabre la demanda d'ambulancia nel aeropuertu". Porque sí, amiguinœs, nel aeropuertu nun hai ambulancia. P'ablucar.
N'Uviéu, una ufóloga defende la esistencia de naves estraterrestres tripulaes. Pues que tengan curiáu, qu'entama'l carné per puntos.
Agora yá sabemos seguro que los vuelos secretos de la CIA fixeron 33 escales ente Tenerife y Mallorca. ¡Y nun los vio naide!.
El Pentágonu reconoz yá 2.500 muertœs y 18.500 mancaœs n'Iraq. Yá hai tantos muertœs como nel 11-S. Pero la cosa ye que los iraquinœs nun tienen la culpa de lo del 11-S.
Diz un titular piquinín que'l "Gobiernu de Serbia reconoz a Montenegro". Qué remediu.
Según l'astrónomu Stephen Hawking, ye más fácil entender al universu qu'a les muyeres. Ye que son un universu en sí mesmes.
Y yá p'acabar estes Anuncies Piquiñines, recordar que menos mal... que nos queda Portugal
0 bilordios:
Publicar un comentario