Dellos blogueros recibimos nos nuesos correos una invitación pa participar nun eventu blogueru nomáu Blogasturias, entamáu por elcoomerciodigital.com. Hasta equí too normal, si se pué llamar normal al fechu de que la llingua asturiana sea totalmente inexistente nesti alcuentru. Nel Blogue de Blogasturias dizse textualmente: "Tras la clausura del encuentro, prevista para las 19:30 horas, el intercambio de experiencias proseguirá, de una forma más distendida, en el primer Blog & Sidras y Blog & Night de Asturias, la mejor forma de cerrar un acontecimiento sin precedentes en Asturias", cosa que ye totalmente falsa como bien dixo Don Vito na so Fueya en Blancu. Lo bono de ser una comunidá ye que unu dase cuenta, otru ponlo nel so blog y otru manda-yos un corréu directamenta a la organización de Blogasturias. Nesti casu Ricardo Candás de La Esfoyaza, mandó el textu que vien darréu:
"Hola, quixera comentavos delles cosuques sobre lo que nomáis como "los primeros Blog&Sidras y Blog&Night de la historia vinculados a un evento de esta línea en Asturias". Fai tiempu, dellos blogueros y blogueres aconceyamos pa facer la "I Sidra&Blogs Pola Oficialidá" aprovechando la manifestación de payares del añu pasáu (llugar nel que díbemos tar la mayoría) pa facer un espaciu abiertu al diálogu col enfotu d'afitar la blogsfera n'asturianu. La propuesta ficiéronla dende'l blog "Trayasgaya" (http://trayasgaya.blogspot.com/2007/09/i-sidra-pola-oficialid.html) y foi bon acoyida por una bona montonera blogs n'asturianu qu'apaecimos nel alcuentru (Fueya en Blancu, González y González, Pingarates, El trasgu d'Areces, El fortín de Chamicu, La mirada moyada, Trayasgaya y La esfoyaza). Otros munchos nun pudieron asistir por distintos motivos anque quedaron coles ganes. Asina, creo que tais un poco equivocaos neso de dicir que ye de los primeros alcuentros Blog&Sidra que se faen d'estes carauterístiques. Cierto ye que lo nuestro foi un eventu informal (nun somos asociación nin tuviemos el sofitu d'alministración nenguna, pero nun dexó de ser un alcuentru que na blogsfera n'asturianu (blogs qu'usen l'asturianu como llingua vehicular) tuvo abonda sonadía y del que surdieron delles coses valoratibles. La primera consecuencia d'aquel alcuentru (onde munchos blogueros y blogueres vímonos les cares) foi la creación de la Xuntanza de blogs en Llingua Asturiana (http://xuntanzablog.wikispaces.com/Entamu) llugar pal alcuentru na rede. Afitamos la blogsfera n'asturianu y enfotámonos en siguir dando presencia na rede al asturianu. Arriendes d'ello, tratemos temes d'aiciones futures (cómo organizanos y posiblidaes de dignificar la llingua al traviés de la rede) y convidámonos pal II Blogs&Sidra en feches entá por determinar.Esmolezme por ello qu'escaezáis esti verdaderu Primer aconceyamientu de Blogs&Sidra. Namás yera pa que lo tuviéreis en cuenta y que, na midida de lo posible, podáis correxilo. Gracies pola atención.
------------Blog dafechu n'asturianu La esfoyaza ."
Prestábanos que les coses que pasen arodiu la nuesa blogosfera, nun queden tapecíes y col permisu de Ricardo, espublizamos esti mensaxe pa que tola xente que fai blogs n'asturianu sepa lo que ta pasando de primer mano. La selmana que vien intentaremos facer un resume de la contestación de Blogasturias. Un saludu a toos y toes.
