Como fice la semeya a David Villa

7.7.08

print this page
send email

Si tuviéremos una prensa normal, esta sería una de les imáxenes del branu n'asturies. Non por ser cabezalera d'una campaña ciudadana que t'amosando un éxitu brutal, sinon, por que ye una semeya fecha al meyor xugaor de fúbol asturianu, ún de los meyores del estáu español, a un campeón d'Europa y al reciente pichichi de la Eurocopa. Esto quier dicir que si esti home tira un péu, ye noticia... Les redes de TrayasgayA son llargues y, casualidaes de la vida, resulta que l'home que-y fizo esta semeya a David Villa, ye collaciu de nós. Darreú explica en primer persona como foi el "making off" d'una semeya que va pasar a la hestoria:

"Ello ye que venía yo tando esmolecíu polo guapo que sería facé-y una foto a esi guah.e. El xueves pasáu, de la que tornábamos pa casa depués de tomar un culete, entré en Don Bocata cola cuenta d´echá-y una última güeyada´l periódicu del día. La mio sorpresa foi grande. L´alborozu mediáticu de los caberos díes contrastaba cola tranquilidá que reinaba nel chigre. Villa y el so cuñáu na barra, un chaval na tragaperres a lo suyo y una parexa nuna mesa que nun atendía un pih.o pa ellos. Tan normal yera la cosa que Berto, el chigreru, al caltriar la dulda na mio expresión, confirmóme con un xeitu afirmativu que nun taba suañando y que aquello yera real. Nun me dio tiempu a lo pensar. Averéme a ellos y conté-yos en qué consistía la campaña asina como les mio esmoliciones por faceme cola so foto. El guah.e, un aquello sorprendíu, solo se precupó pol calter apolíticu de la iniciativa y por conocer los nomes d´otros deportistes que yá fexeren la semeya. Una vez algamáu´l so consentimientu, di coles pates en culo a la gueta de la cámara y del cartelu.

Y asina foi como-y fixi la foto a David Villa. Depués ca ún siguió a lo suyo. Ellos esperando les hamburgueses pa llevales pa casa, y yo faciendo como que lleía un periódicu que yá nun m´interesaba nada. De la que marchaben y pa que nun caltuvieren dulda denguna de lo que fixeren volví a da-yos le gracies y una tarxeta personal cola que m´identificaba y me ponía a la so disposición pa esclaría-yos cualesquier asuntu.

Falten tovía munches fotos. Xente con “cartel” que ya amosó el so sofitu a la Oficialidá y qu´entá nun ta retratada. Nun hai que se cortar. Porcentualmente, la mio experiencia amuesa que nun llega al uno por ciento la xente que pue dicir que non.

Alón y a retratase. "

Aunque él nun lo cuenta, sabemos de primer mano, que pidió-y el teléfonu de Santi Cazorla pa facer lo mesmo y como ya taba llanzáu, atrevióse a dicir "home, Villa, tú que tas bien rellacionáu, podíes pasame el teléfonu de Fernando Alonso...". Amás sabemos que anda detrás de la semeya de dalgún otru famosu de la cuenca y ya la tien medio apalabrá. Dende TrayasgayA queremos dar les gracies a xente como Xicu, que ye'l verdaderu protagonista y la persona a la que l'asturianismu y tien qu'agradecer la semeya de Villa. Xicu, tú sí que yes un Crack!!

18 bilordios:

Pingarates dijo...

Un crack!!!!

ún dijo...

Dígotelo yo :)

Alonso nun sé si la quedrá facer, pero xente como Chechu yo creo que sí ta pol llabor.

Diestru dijo...

Un puntazu!!!

Anónimo dijo...

home, lo que-y quita puntos a Villa ye que preguntara que si yera una cosa política y qu'otros deportistes sofitaran esti llabor. De ser asturianu y convencíu 100%, sobraben estes dos condiciones.
Chechu Rubiera ya fixo público'l so sofitu a la oficialidá va tiempu.
Vamos digo yo.

ún dijo...

Lo que nun podéis entender dellos ye que la llingua ye de toos, non sólo de los nacionanistas.

Sé que Chechu sofita la oficialidá, pero en doilacara entá nun lu vi, ¿vístilu tu?

Quico dijo...

¿Home anónimu, los expedientes d´asturianidá 100% ónde los dan?¿Tiéneslu tu? Asturianu pémique lo ye, a nun ser que nesi sitiu onde expiden esos títulos piense d´otra manera. Y seguru 100% imaxino que, como yo, de casi ná, por nun dicir de ná. Eso sí, con toles duldes fexo la foto pola oficialidá y al día siguiente con un par de coyones nun dexó que Tini lu manoxara.

Ricardo dijo...

El que tien tol méritu ye'l collaciu de los compañeros de Trayasgaya, el que fizo la foto y atrevióse a ello. Norabona por él.

Y camiento que, por muncho que nos pese, Areces y tola tribu de la so calaña tamién son asturianos. Otra cosa ye que tengan la mesma idea d'Asturies que nosotros.

Pingarates dijo...

Chechu va dar la cara, tar tranquilos.

Pingarates dijo...

Hai una cosa qu'escaecemos munchos cuando falamos del tema deportistes.

Esta xente nun vive nel mundiu nel que vivimos el restu. Nun lo digo porque vivan nun mundiu de coches caros y eses coses. Toi falando que mientres tu dibes a la universidá y entrábes en contactu con movimientos sociales, o l'otru con un compañeru de trabayu, y aquel por una moza o amigu, esta xente dedicaba practicamente tol día a entrenar, ensin rellacionase cola sociedá.

Cuando dalgún deportista d'élite tien o muestra sensibilidá por estos asuntos ye porque tien a dalguién cerca que ta lo suficientemente sensibilizáu.

Realmente, tampoco ye tanta la diferencia con munchos de los amigos y amigues que tenemos toos si lo pensamos un poco.

Y nun querer apaecer nuna campaña d'un partíu políticu concretu ye perfectamente respetable. Paezme muncho más intelixente preguntar eses coses que poner la cara ensin preguntar nada.

Tin dijo...

Nun hai que escaecer qu'esta xente tien ingresos asgaya gracies a la publicidá y al traviés de la so imaxe. Toos sabemos que importantes marques comerciales piesllaron contratos con famoses modelos tras salir a a la lluz determinaos asuntos de la so vida privada. Asina que a mí paezme qu'entrugó inda poques coses. Si nun conocía la campaña de doilacara, por acabar de llegar a asturies, yo hubiera sío más desconfiáu ante unu que vien a convenceme de que me faiga una semeya con un cartelu...

Ricardo dijo...

Dafechu d'acuerdu con Tin.

otru que pasaba dijo...

referíame a 100% convencíu de la oficialidá, non de ser 100% asturianu, a min la xente que s'autodenomina:100% asturianu, asturiano por los 4 costaos, de pura cepa.... paezme fato...porque depués preguntas-yos y tienen carencies d'asturianidá:llingua,...

Nun dudo l'asturianidá de Villa, solo q s'ha de sofitar la oficialidá ensin condiciones....non preguntar que si más deportistes tan nello.Creo yo.
Rubiera: non, nun lo vi nesto de doi la cara,... pero yá fixo público'l so sofitu a la oficialidá...y pémeque tuviera nuna mani pola oficilidá(creo recordar...)

otru que pasaba dijo...

tin¿nun crees que eso de los contratos pesllaos a famoses yera por otres coses?P.e.: Kate Moss cola farlopa.Esto ye una campaña por drechos humanos como ye'l drechu a falar na to llingua, na llingua d'Asturies.nun ye campaña de nengún partíu políticu, nin nada violento, nin sofitar el botellón, nin el hachis, nin pornografía.....Si nun casu imaxinariu (nun ye'l casu de Villa)ente la oficialidá(el sofitu a ella) y les perres de la imaxe que-y puen llamber por sofitala, val más los segundo...pues,mata la lluz y vámonos...creo que ye como pone-y preciu a la llingua.

otru que pasaba dijo...

El problema que tienen les llingües ye que se politicen y nun había de ser asina.
L'añu pasáu y entamáu poles escueles que dan catalán na Catalunya Nord, Ludovic Giuli(ex xugador del Barça,ye corsu),Thuram (xugador del Barça que ye de Guadalupe) y Domènech(seleccionador de futbol francés que creo que ye catalán)fonon a Perpiñán a sofitar l'enseñanza del catalán nel territoriu catalán-francés....L'otru día fixeron oficial el catalán na Catalunya Nord...

Tin dijo...

Ta´l casu de Kate Moss pola fariña, el de Ronaldinho por engordar y dexar de xugar o la tira problemes y crítiques que tuvo Oleguer por dar a conocer la so tendencia política y delles opiniones expropies d'un fubolista. Pue ser por delles coses, nun sólo pol perico (amás de munchos otros casos que de xuru nun conozco).

Nun ye poner preciu a la llingua. Esa xente a lo que puso preciu foi a la so imaxe y como la tien asalariada, tien que tener cuidáu lo que fai con ella, y más cuidáu colo que quier facer unu que acabes conocer nun chigre y te cuenta un hestoria sobre una campaña, un cartelu y una cámara. Ya te digo que yo debo ser muy desconfiáu. Nun creo que sofitar la vindicación llingüistica lu perxudique, pero él nun sabía de que diba l'asuntu y podía tar perfeutamente el pas o andecha o ix, detrás de la campaña y utilizar la so imaxe, lo que sí que podía trae-y problemes o toca-y simplemente los coyones por sentise utilizáu.

Namás por eso entiendo la entruga sobre'l tema políticu. Lo d'entrugar por otros deportistes, pue ser una consecuencia direuta de la conversación que tuvo col autor de la semeya, que de xuru-y contó qu'había más compañeros d'él na campaña, pa ganáselu y que nun desconfiara (esto ye sólo un elucubración).

Sicasí, camiento que se ta xenerando un debate interesante. Un saludu.

otru que pasaba dijo...

val Tin ,acepto eso de que-y pongan preciu a la imaxe ya non a la llingua. Nel casu Oleguer, ye que los fubolistes son persones enantes que deportistes y tienen llibertá d'expresión. Solo dió la so opinión sobro un tema, y casi lu crucifiquen.....Tamién Salva(Malaga C.F.)-perconocíu facista- dixo lo suyo alrrodiu d'eso de Juana Chaos(que-y esmolecía tanto la opinión d'Oleguer como una mierda perru) y tb cuando'l Plan Ibarretxe(qu'eso iguabalo él metiendo los tanques n'Euskadi, amás sentilu yo na cadena SER(El Larguero)), pero nun hebo tanta repercusión.

Anónimo dijo...

Yes un crack, chaval, pero teníes que movelo polos periódicos, equí en Llangréu hai 2 delegaciones, una de la LNE y otra de LVA.
Nun taría mal preguntar por los xugadores "mineros" del Sporting: Canella y Michel. Tamién polos xugadores de 2ªB y Tercera, dalgunos son perconocíos.
Hai que seguir trabayando pola oficialidá dende diferentes ámbitos.

Quico dijo...

Sergio Villanueva yá dio la cara na segunda selmana de xunu.