Crónica de la marcha de Llangréu a Uviéu

25.11.07

print this page
send email

La cita yera a les 11 la mañana nel Parque vieyu de La Felguera. Esa nueche anterior nun abocanó y al llegar l'alborada siguió cayendo agua ensin aparar. La xente foi puntual y pese a les condiciones meteorolóxiques tan desfavoratibles, aconceyose un bon garrapiellu de valientes que a la salida La Felguera, llegó a sumar casi 50 persones. Nesi entamu, mientres esperábamos polos compañeros y compañeres que faltaben, la única presencia d'un mediu de comunicación, foi una cámara de Cuenques Mineres Televisión que grabó unos planos nos momentos enantes d'entamar a caleyar y que nun daba créditu a que fueramos llegar a Uviéu col tiempu que facía. Salimos sobre les 11:35 con un baberu onde se podía lleer "La Cuenca'l Nalón Pola Oficialidá", que mantuvimos hasta Barros, pa de tarde entrar n'Uviéu con ella. Los venti pico kilómetros que teníemos delantre yeren una anéctota comparao colos 6 ºC y l'agua que taba cayendo. Con pasu allegre y más humor que ganes, cruzamos La Felguera y Barros escoltaos poles fuercies de seguridá y recibiendo noticies de les otres marches gracies a les conesiones de Radio Sele, que tamién conectó cola nuesa marcha. En Riañu paronos un Guardia Civil diciendo que teníamos que dir xuntos, por que veníen otres cuarenta persones detrás escoltaes por otru patrol de la Guardia Civil. Díximos que yera imposible, que los que salimos de La Felguera tábemos ellí y dempués de ponese un poco farrucu nes maneres de dicir que lo había sentío pola radio, llegamos a la conclusión que seríen los de Siero y que l'axente nun taba a lo que cellebraba. Ye la primer vez na hestoria de la reivindicación llingüistica, que les fuercies de seguridá dicen que somos más del doble de los que rialmente fuimos.


El cielu nun daba tregua y dempués de pasar Riañu, entamamos a xubir los túneles apretando'l culu y el pasu. De xemes en cuandu echábamos una broma sobre'l tiempu, naguando por ver abrir y xusto al llegar al primer túnel, entamó a afloxar la lluvia llegando a aparar totalmente dempués de pasar el segundu. Dende ehí garramos una bona baxada hasta "Cartonajes Vir" que yera'l puntu d'alcuentru cola xente de Siero. Como llegamos con adelantu, aprovechamos pa xintar y sentanos un poco. Los más chigreros averáronse hasta una cafetería del polígonu industrial y aprovechose pa que Ramón de los berrones pudiera falar con Radio sele, nuna entrevista que nun tien desperdiciu.


Entamamos a caleyar El Nalón y Siero, l'últimu cachu, llegando a Cualloto coles pates resentíes polos kilómetros que ya teníamos encima, maceraos cola humedá y el fríu que pasamos. Ya entamábamos a ver Uviéu y el grupu curiosín que formábamos, allargose casi en fila d'un. Durante tol camín recibimos muestres d'apoyu de la xente que pasaba pola carretera nos sos coches, pitándonos y dándo ánimos pa siguir alantre, inclusu algún aplausu de dellos paisanos a la puerta d'un chigre. Paramos a la entrada d'Uviéu pa agrupanos otra vegada y sacar les pancartes. Entramos glayando y acaparando l'atención de la xente. Foi simpático que, pese al esfuerciu, entá teníamos la mente despierta y a un compañeru ocurrióse-y la idega d'entrar nuna tienda de chinos a mercar un megáfonu que nos dio un xuegu de la virxen hasta la mesma Renfe. Entramos pola Cai Uría en sentiu inversu al de la manifestación y llegamos a la Estación del Norte d'Uviéu gastando les últimes fuercies en glayar bien alto y recibiendo l'aplausu de los demás compañeros de marches que ya habíen llegao y de la xente que taba esperando l'entamu de la mani.


Alguien dixo a les 11 la mañana, cuando paecía que nun podía cayer más agua, qu'esta yera una marcha de compromisu románticu. Nun se si el romanticismu ta reñíu colos coyones o la militancia pero prestábame dar les gracies a tola xente que'l 24 Payares caleyó por algamar los sos drechos como asturfalantes.

GRACIES.

2 bilordios:

MetalAstur dijo...

Enhorabuena pol esfuerzu, sois la ostia.

leti dijo...

Gracias pol comentariu, ayer que taba aburría del tou..Si, nun te dixe, toi en Vezos Astures (pero dende fae bien pouco, anque llevo tola vida nesti mundiu del folclor). Venga, un beiso