Asturblogosfera

16.3.07

print this page
send email

"Corría detrás de la rapiega, caleyando monte abaxo, camín de La Fonte Bravial, onde se formaba el llagu la Xana, mientres pensaba en ochobre’79, cuando entré de nueche en lo de les pites y vi qu’un páxaru non, de bon agüeru precisamente, me había llevao tres. Ésta vegada nun la iba a dexar colar. Tábamos tratando del mio sustentu y ser un paráu n’Asturies ye percomplicao, ya tamos fartos que nos den trayasgaya. Al poco llegué al pueblu cola seguridá que tenía que tar cerca. Pasé por delantre de la Ilesia, onde’l cura taba dando misa en llingua asturiana. Entós avereme a la puerta entreabierta sintiendo al cura recitar: -“lux omnia vincit, sursum corda”-, mientres consagraba el vinu. Unos guajes sentaos, nel bancu esterior de la nave llateral, discutien si escuchar una cinta de los berrones o de llangres, creando’l requexu les discrepancies qu’alteraba la paz del pueblín. Ún paisano qu’entamó a reñilos, averose a mí, contandome que yeren los fiyos de nícer, el paisano que vive na casa que ta na parte alta del pueblu, que llamen el fortín del chamicu y que precisamente güei, taba enllena de xente, por mor de la esfoyaza. Entamé a xubir pa la casa, cuando vi dos paisanos que corrien escontra mí, gritando:- “¡¡¡ten cuidáu, qu’hay xelu!!! ”- “Val, ya t’oyí”- Retruque-yos, mirando pa un charcu solidificáu qu’había delantre mí, nel suelu. Yeren dos hermanos ximielgos de boina, xilecu, pantalón de pana y madreñes que se me presenataron como González y González. Ún de ellos garrome pol brazu y díxome: -“piedra que relluz, charcu de xuru”- y tiró encima’l agua xelada, fueyes del periódicu, Nueves d’Asturies, que llevaba, na mano, mientres me esplicaba que namai lu mercaba pa lleer les noticies del Real Uviéu y los testimonios asturianos. Acompañaronme pola caleya, mientres los sentía falar de l’Asturies d’anguaño, de les empreses que tan esfarrapando’l mundu y del nuevu alcalde de la FSA de las JONS, por que taba gusmiando tolo que podía. Llegamos a la puerta la casa. Los ximielgos, llamaron pegando cola curva’l cayáu, na parte d’arriba del cuarterón, mientres se sentíen cantar les primeres frases de la danza “ai, un galán d’esta villa”. Ún de los ximielgos rióse polo baxo mientres dixo –“de xuru que tan toos borrachos. Ye lo que Xabeldiz, cuando la xente entama a baillar, ye que ya tan mauros.”- El otru retruco-y –“espero que tamién te la mio ayalga y me convide a un cafetín con pingarates”-.
Fuera de la casa, el xardín de la borrina que formaba el patiu, animaba a tolos que diben caleyando por asturies, faciendo país, a averase al abellugu del calorín del llar y echar unos traguinos. Dientro, les mocines baillaben, presumiendo de les sos meyores ropes, como ayalgues galanes, mientres les vieyes tocaben panderos y panderetes, acompañaes de les melodíes que-yos salien del gargüelu. Munches de les moces pertenecien a la Asociación Cultural y Recreativa El Cascayu, una de les munches d'Asturies, nes que namai aceptaben muyeres. Yeren más d'ún, los mozos que naguaben por entrar nesi conceyu femenín, aun a sabiendes que nun yera más qu'un de dellos camientos d'un suañador, por que yera imposible, pero pa conseguilo, taben dispuestos a dir from Xixón to London a la pata coxa, con tal d'algamar el so obxetivu, o vende-y l'alma al mesmu trasgu d'areces..."


Perdonai los que nun tais. Sabemos que somos munchos más, aunque dellos ten morrienodo, o escaecios polos dueños. Cada poco ñacen otros nuevos que-y dan continuidá a ésti movimientu. Nun dexa de ser una forma más d'esparcimientu de la cultura asturiana, de manera totalmente altruista, llevada a cabu por xente anónima y ensin nengún enfotu más qu'usar la so llingua llariega como ferramienta pa cuntar coses, demostrando que va costa-yos desaniciala tolos fartones que nos quieren poner un trapu en focicu, polo menos mientres vivamos. Por too esto, Puxa la Blogosfera Astur, Puxa la nuesa cultura, L'Asturianu Llingua Oficial.



Salú ya TrayasgayA.

3 bilordios:

Anónimo dijo...

Perguapu!! Prestome pola vida esti post. La verdá ye que faime pensar sobre'l sentimientu de 'comunidá' de la 'blogosfera astur'. Pa mín, la necesidá d'atopanos na rede, de facenos compaña ente blogs, ye reflexu de que dalgo nun furrula cola normalidá que debería nesti país.

Anónimo dijo...

Asina ñació la idea d'esta cabera entrada. Pa nós, tolos blogs en llingüa asturiana tenemos unes señes d'identidá propies, que por desgracia pola situación que vivimos anguañu, van muncho más lloñe del movimientu de bitácores que se pue dar nel estáu español o n'otres fasteres del mundu. Ésto ye asina y fainos ser parte d'una comuña, a la mesma vegada que orixinales y únicos.

Xosepin dijo...

Mui guapa la entrada, ¡vaya cómo me prestó, Trayasgaya!. Alrodiu lo que comentais, toi en que la falta normalidá que na sociedá asturiana provoca esta situación de discriminación llingüística que carecemos, sí que puede influyir n'articulación de la nuesa Logosfera. Pero eso nun quita nada pa nun ser quienes p'asumir la nuesa particularidá y trabayar dende ella. Como diz Trayasgaya, esa situación d'anormalidá democrática fainos ser, al empar, orixinales y únicos. Por cuenta d'ello y d'un "meme" que me pasó Pingarates, fice una entradina nel mio blog. Por cierto, Tamién-y lu pasó a González y González y yo fice lo propio con Trayasgaya... nun ye mala idea xugar un poco pa facer y visualizar la nuesa comunidá, que yo entiendo como un verdaderu "espaciu públicu". Un saludu.