Música Como Entretenimientu II

Los gaiteros y tamboriteros fixeron escuchar les sos músiques en fiestes y romeríes, asina como nos servicios relixosos. Acompangaron al baille y a les procesiones y de dalguna manera inxertaben melodíes qu´aportaben d´otros llugares, nos moos d´interpretación músical de los pueblos. Bufoneros, ciegos y músicos ambulantes que se movíen de feria en feria y de mercáu en mercáu, vendíen o interpretaben romances y coples sobre hestoria y fechos trescendentes del momentu. Como acompangamientu de tou esti mundu de músiques y cantares, hebo instrumentos de los más estremaos. Dende vieyos rabeles a clásiques gaites y tambores o foriatos y complicaos, curdiones y zanfones. Munchos instrumentos aseméyense a los d´otres comunidaes o países, pero caún d´ellos la forma los mesmos y el so mou d´interpretación marcaron les diferencies.

Cola llegada los tiempos modernos, esta manera pescanciar la música foi quedando arrequexada. La industrialización y los avances teunolóxicos traxeron nuevos moos de vida y formes musicales nueves. Les orquestes sustituyen a les pareyes de gaita y tambor y bandines, nes romeríes. Los llamativos bailles modernos cuayen nestes cellebraciones y la música que los acompanga, espardese per tol mundu. Cuando aporta la radio a los pueblos y sobremanera la televisión, enllenen momentos nos que nun teníen que facer un res y qu´enantes enllenaben con cantares y bailles populares. Pa entamar la segunda metá del sieglu XX los asturianos en xeneral rellacionaben la so música tradicional namái que cola gaita y el tambor. Munchos instrumentos d´usu perespardíu, como les panderetes, veíense como cenciellos acompangamientos del baille de conxuntos de folclor, o cenciellamente como nel casu les tarrañueles cuasi nun los conocíen. A mediaos de los años ochenta, entama un resurdimientu del interés pola música asturiana, con munchu puxu. Conxuntos de tou tipu inxerten los instrumentos tradicionales nes sos interpretaciones y danlos de nuevo a conocer a los descendientes d´aquel pueblu qu´amó ya interpreto la so música con ellos.

Publicación de L'Asociación d'Etnografía y Folclor Reija de Llangréu.