Pelayo, hestoria d'un gallegu??

1.12.06

print this page
send email
Caleyando pela rede me tope... con un interesantísimu foru que falaba sobre los orixines del perfamosu Pelayín. L'artículu en cuestión escomencipiaba col trasgresor títulu de “Pelayo, historia d’un gallegu” . “Yá t'armá!!!” pensé.... Podéis velu equí:
http://www.celtiberia.net/articulo.asp?id=812
Nesti foru podéis atopar les milenta teoríes sobre l’orixe de Pelayo, yo decántome pola sostenía polos señores Barbero y Vigil... Caún barre pa casa.
Ehí vos va un resumen del asuntu.

Al escasiar les fontes y ser éstes de calter tardíu (les cristianes son del sieglu X), xurdió una lleenda alrrodiu d’esti personax hestóricu. nesti sen, aunque les cróniques Albeldense y Rotense atribuyen un orixe godu a Pelayo, esti datu foi cuestionáu por munchos hestoriadores, especialmente a partir del espublizamientu de los trabayos d’Abilio Barbero y Marcelo Vigil al respeutu: Resultaría paradóxico que los astures, que rebelaronse contra’l dominiu godu en tiempos del rei Wamba, aceptasen como caudiellu na nueva llucha contra los musulmanes a un aristócrata enemigu, pertenecíente a un pueblu que tan sólo veinti años antes reprimiere a Asturies. Per otru llau, nin siquier les rexones más romanizaes como la Bética y la Tarraconense opusieron una seria resistencia’l colapsu del reinu visigóticu, y la mayor parte de l'aristocracia visigótica, representada por condes como Teodomiro o Casio, aceptó’l nuevu dominiu omeya a cambio de conservar el so estatus. Incluso la viuda de Rodrigo, Egilona, casó con uno de los xefes de los conquistadores, Abd al-Aziz, primer valí d'Al Ándalus.
Además, les primitives cróniques asturianes como l’Albeldense, nun incluyen xenealoxía dalguna de Pelayo. Los primeros documentos que falen d’un supuestu árbol xenealóxico de Pelayo que lo fadría descendiente de Chindasvinto (como la Hestoria Xeneral d’España escrita pol rei Alfonso X el Sabiu) son cinco sieglos posteriores a los fechos. Nesti sen, la ideoloxía neogoticista que caltrió los reinaos d’Alfonso II y Alfonso III d’Asturies fizo desvirtuar progresivamente los oríxenes del reinu d’Asturies. Pretendíase entroncar los raigaños del reinu d’Asturies (qu’orixinariamente yera un movimientu de resistencia de los astures frente a los nuevos invasores) col estáu visigóticu, pa d’esta manera llexitimar les aspiraciones imperiales de los reis de Llión y de Castiella.
De fecho, l’antropónimu Pelayo nun ye xermánico (como lo son tolos nomes de los reies visigodos) sinón que deriva del griego πελάγιος (marín), lo qu'apuntaría a un orixe hispanorromanu del personax. Polo demás, dichu nome de pila yera usáu con profusión polos habitantes del Noroeste d’España, daqué que guarda cierta analoxía colo que sucedía na isla de Britania, donde’l llatín Pelagius yera a menudu un trasuntu del galés Morgan, que significaba nacíu del mar. Basándose nesti datu, dalgunos autores como Ignacio Gracia Noriega llanzaron una interesante hipótesis que supón que l’antropónimu Pelayo foi introducíu n’Asturies por aquellos celtes británicos que, inmigraren por mar dende la so patria nos sieglos V y VI, estableciéronse (según indica’l Parroquial Suevo) en Britonia, la rexón del Monasteriu Máximo y el territoriu de los astures. Nesta llinia dizse incluso la posibilidá de que’l propiu Pelayo fuera d'ascendencia británica .
En cualquier casu, lo cierto ye que les informaciones proporcionaes tanto poles cróniques cristianes como poles islámques presentanoslu como un personax estrechamente vinculáu a Asturies, y que poseía propiedaes fundiaries na rexón. D’esti mou, el testamentu del rei Alfonso III (recopiláu pol padre Flórez na so España Sagrada) menciona que Pelayo tenía tierres en Tiñana (Siero), non mui llonxe de Lucus Asturum, una de les ciudaes más importantes de l’Asturies romana y prerromana. Pola so parte, la crónica Rotense, señala que tres la so fuxida de Córdoba Pelayo abeyugose en Bres (Piloña) en plenu corazón del territoriu de los luggones argandenos y cerca de la so capital, Paelontium (Belonciu).
Asína mesmo, tanto Al Maqqari como Ibn Jaldún, atribuyíen oríxenes asturianos a Pelayo, y el primer d’ellos, al describir los socesos de Covadonga, califica’l personax d’asnu montesín, una denominación mui poco apropiada pa un pretendíu miembru de l'aristocracia goda y que fai pensar más bien nun caudiellu procedente de les montañes y apartáu de los refinaos centros de cultura romanovisigóticos. Los relatos d’otros cronistes musulmanes como Iban Al-Akir o Al-Nuwairi faen referencia a un llugar denomináu la roca de Pelayo conquistáu por Muza na so campaña de los años 712-714, y que los hestoriadores identifiquen col cerru de Santa Catalina, onde s'asentaben la primitiva ciudá de Xixón . El fechu de que’l topónimu portase’l nome de Pelayo bien a dicir qu’esti personax yera d’aquella’l gobernante llocal de la villa. En tal casu, el matrimoniu de Munuza cola so hermana Adosinda tendría como oxetivu reforciar el pautu ente l’aristocracia astur y los nuevos dominadores árabe-bereberes. Cabe señalar nesti puntu que'l rei Silo (ñacíu nel sen d’una familia de l'aristocracia pésica de la rexón de Flavionavia ) yera de madre musulmana y gracies a esta rellación de parentescu pudo concertar la paz con Al Ándalus.Por último nun puede dexar de resaltase'l fechu de que la transmisión del poder nel senu de la Monarquía Asturiana llevábase a cabu siguiendo regles d’orixe indíxena, residuos d’una anterior estructura matriarcal: Asina, la muyer a menudo transmitía drechos hereditarios al marido, como sucede nos casos de los reis Alfonso I y Silo qu’acceden al poder gracies a les sos muyeres Ermesinda y Adosinda, ambes de la familia de Pelayo. Sólo n’época posterior, a partir de Ramiro I, impónse definitivamente la socesión por llinia patrillinial.

10 bilordios:

Anónimo dijo...

dicen que fernando alonso ye gallegu...,q nacio en la coruña no te jode.estos gallegos vaya como flipen.hay q tizalos a tos.

Anónimo dijo...

Ta perbien Xulín, coyonudu, esti artículu, si señor.

Anónimo dijo...

Una cousa: ¿Qu'ía hispanorromanu? ¿Nun se puéi falar de asturromanu? ¿Nun podría ser Pelayo Asturromanu, cumo gran parte del pueblu asturianu? ¿Nun ía l'Asturias "asturromana"?

Anónimo dijo...

Chamicu, ta clarísimo que'l términu astur-romanu ye válidu.
Pero Hispania yera un circunscripción administrativa superior (yera una provincia) na qu'entraba Asturies (el convetu xurídicu astur) polo tanto un astur-romanu yera tamién un hispanu no que se refier a términos alministrativos. Agora, si nos ponemos andecheros...

Anónimo dijo...

Acabo de dame cuenta que'l comentariu anterior nun yera de Chamicu... Polo que-y pido disculpes a Chamicu y a
Anonymous por trasfulcalos... Esti tema ye interesantísimu... Cuál foi el verdaderu estáu de romanización n'Asturies? Ta claro que en munches ocasiones podemos falar de Astur-romanos... pero en delles, y yo creo que son abondes, tendríamos que falar namás d'astures... ya que la romanización nun foi nin homoxenéa nin xeneral nel país...

Anónimo dijo...

Nun t'enteres Xulín!!!!

Anónimo dijo...

Ye'l blog esti... que ta mal diseñau...pon el nome debaxo d'una raya... esto qué ye??
Quién diseño esto?? Taba como una oveya...
Xulio Nel for pesident!!

Anónimo dijo...

"El defensor de Xulio Nel, Club de fans de Xulio Nel..." Pa mi que tienes desdoblamientu de la personalidá. Típica psicosis bipolar con delirios puerperales.

Anónimo dijo...

Pa un llibru que lleisti... yera de psicosis bipolar... No, si yo tengo una suerte...

Anónimo dijo...

No, home non. Nun foi nun llibru, vilo en Gran Hermano.