La Sidra Como Tien Que Ser. Parte I. La Sidra o Sidre.

La sidra o sidre ye'l nome que se-y da n'Asturies a la bebida alcohólico fecho del zume de la manzana. Sidre ye palabra propia de la parte centro-oriental del país y sidra de la centro-occidental. Como sidra coincide cola palabra castellana, ye lo que se ta imponiendo nos conceyos onde simpre se dixo sidre. Pero les dos formes son igual d'asturianes.

L'aniciu de la palabra ye hebréu y, al pasar al griegu, nesta llingua llamóse "síkera". Paez ser que nomaba cualquier bebida fecho con fruta que nun fora la uva. La llingua latina valió depués d'intermediaria y la palabra llegó col Imperiu Romanu a la Península Ibérica llatinizada como "sicera". L'idioma asturianu, que nun ye otro que llatín evolucionao, adaptólo como sidre o sidra.

El xeógrafu romanu Estrabón, sesenta años enantes de Cristo, dicía que los ástures bebíen "zytho", una bebida alcohólico que dellos estudiosos piensen que pudiera ser la sidra. El casu ye que na Edá Media, allá pelos sieglos VIII y IX, nos documentos que recueyen los compres, ventes, mandes, donaicones... que facíen los asturianos d'aquelles dómines paecen cada poco les palabres pumares y sidra. Munches veces, vese que la sera s'usa pa pagar trabayos, mercar coses y hasta s'ofrez pola salvación del alma.

Poco sabemos de cuándo y quién bebía esa sidra. Pue suponese que debía ser bebida pa díes señalaos y pa xente llano, porque paez ser que nun yera del gustu de la xente rico.

Na segunda metá del sieglu XVIII hubo un aumentu curiosu de la demanda de sidra coincidiendo con una medría de la población y con un aumentu del desarrollu agrícola. Plantáronse tantes pumares a costa de praos y de tierres que dalgunos pensadores de la época echaron les manes a la cabeza al ver cómo la xente asturiano sacrificaba la escanda o'l maiz pa tener sidra. Y eso que yera un bon negociu facelo porque los precios xubíen ensin aparar. Nesos años tamién medró la esportación de la sidra, que se vendía de continuo non solo a Galicia, Vizcaya y Santander, sinón a Francia y Inglaterra. Por exemplu, en 1794 el cientu por cientu de los alimentos ellaboraos que salieron del puertu de Xixón pa esportar foi sidra.

Nel sieglu XIX, cola emigración a América, aumenta'l mercáu y ye cuando naz la sidra axampanao, que ye sidra con gas añidío. Tamien l'aumentu del mundu urbanu alredor de la industria y el comerciu fai paecer otru tipu de bebedor diariu o de fin de selmana nes tabiernes, diferente del consumidor rural que bebe en delles fiestes y depués de dalgunes xeres más dures. Otru cambéu fundamental nos vezos foi la entrada nes tabiernes de les muyeres, fenómenu que, al paecer yá empieza a dase dende últimos del sieglu XVII.

Esbillao del Llibretín de la sidra, "La Sidra Como Tien Que Ser", de la Xunta Pola Defensa de la Llingua Asturiana.