Pasó la mani ensin que fuera de nueche nin que lloviera. Fizo un bon tiempu nun sábadu que animaba a que la xente se averara a Uviéu pa mostrar la so postura ante'l gobiernu, los medios de comunicación y la sociedá en xeneral. La participación foi como la de veces anteriores, ensin medrar nin menguar. La sensación de desencantu taba presente ente la xente qu'asiste a estos saraos, más por compromisu militante-románticu que por moral o ilusión. Les mesmes cares colos mesmos glayíos. Otru comportamientu modélicu de "los del bable", demostrando que una reivindicación de más de 25 años, pue siguir faciéndose con tol civismu y respetu que a nós, nun nos tienen.
Caleyamos Cai Uría p'arriba y torcimos en direicción a la catedral, p'amontonanos delantre d'ella na so plaza. Nun escenariu, Xosé Antón "Ambás" fizo'l comunicáu de rigor y Anabel Santiago cantó un par de pieces enantes de que la xente colara.
La mani del 4 d'ochobre de 2008 ya ye hestoria. Cola so manipulación sobre cifres d'asistentes y el so vacíu por parte de los medios de comunicación "serios" que ya ye vezu. Pero tar tranquilos, que segun tan les coses, paez que va siguir habiendo munches más.
0 bilordios:
Publicar un comentario