Volvimos de L'Arribada

17.9.08

print this page
send email

Como vos cuntamos n'anterior entrada d'esti blog, TrayasgayA participó na mesa redonda que se fizo dientru de L'Arriba, alrodiu del mundu de la Blogosfera n'asturianu. Podría cuntavos que foi un éxitu, mui prestoso y onde sacamos unes conclusiones interesantísimes. Pero como nun nos gusta decir mentires, nun lo vamos a facer. Poco tiempu, experiencies demasiao estremaes o demasiao nueves nel mundu de la blogosfera. Había xente mui interesante como Pablo Texón, Xandru Fernández o Fernando de la Fuente d'Asturies.com, que dexuru teníen un montón de coses que cuntanos. Pero nun hubo tiempu.
Prospero Morán habrió'l debate con una pequeña ponencia sobre les 2.0 y les redes sociales, bla, bla, bla. Y de siguío siguimos falando los que tabamos ellí y cuntando les nueses experiencies como blogueros.
El debate monopolizámoslu La Esfoyaza y TrayasgayA cuando falemos de los dos alcuentros de Blogs n'Asturianu que se ficieron.

Conclusiones:
Prestonos falar cola Esfoyaza.
Grabemos un vidiu pa la TPA por PMP (Prospero Moran Productions)
Prestonos Falar cola Esfoyaza

Dende TrayasgayA queremos dar les gracies por invitanos a participar na mesa y decir que seguiremos participando en toes aquelles iniciatives, actos y demás verbenes que tenga como fin promover la cultura del país.

6 bilordios:

Pataca dijo...

Na charra viose dafechu'l porqué muncha xente del asturianu s'axunta agora al tema de los blogues: autopublicidá, autopropaganda, autopromoción... Como siempre.

Ehí namái vi 4 blogueros (Ricardo, Xandru, Iris y tu... y a Xandru cuéntolu porque ye un blogue mui especializáu na música y non d'autopropaganda como escritor) y llueu un non-blogueru que si sabía de lo que falaba (el d'Asturies.com). Lo demás too yera xente que ve la bloguesfera como ferramienta de publicidá de lo suyo o xente nuevo nel mundín.

Y claro, d'ehí surde'l discursín -equivocáu enforma- de Próspero Morán: los blogues nun tienen audiencia, tán estraos d'erros na información, tán morriendo, nun valen pa ganar perres (anque él si que tien unes subvenciones del Principáu que meten mieu, por una plataforma de blogues que nun usa naide), etc.

Esti paisanu (y otros que taben sentaos na mesma mesa) nun ye a pescanciar que xente anónimo quiera facer dalgo usando la llingua asturiana o internet ensin nengún interés económicu. Ye dalgo alieníxena pa él. Y cuido qu'eso ye talamente la esencia de la bloguesfera. Ehí tuvo perbién Ricardo Candás retrucándo-y, cuasi la única voz de blogueru que se sintió. Prestó nesi sen tamién l'acusación de SPAM d'Asturies.com al corripiu Gonzali (que lleva blogues como L'Asturies Lliberal, Humberto Gonzali, La Mavea, Llongalendo y demás clones) y la so suxerencia d'un cursín d'ética pa blogueros.

Una pena, amás, que nun s'aldericare. Si pa daqué sirvió, cuido, ye pa que vos enfotáreis en facer otra xuntanza de blogueros esti añu onde -ehí si- esista alderique y bon intercambiu d'idees. Anguaño la bloguesfera espoxigó abondo y de xuru que vais pañar blogues y xente nuevo.

Ricardo dijo...

Gracies Trayasgaya y pataca. Vais poneme colloráu ;)

Xulio Nel dijo...

Lo del III Alcuantru de Blogues... yá lo tuvimos comentando La Esfoyaza y yo... Esta vez p'atraer más xente había que facer un blogs&fabes...
Respecto a lo de L'Arribada, qué más puedo decir... A Prospero nun lu entendí... Qué coyones fala esi home?? "fonderamente nidio" jeje...
Toos sabemos d'onde vien Humberto...
Yo quedeme con ganes d'escuchar a los realmente interesantes de la blogosfera asturiana...
Ónde andarán? Pal III Alcuentru hai que invitalos.

Dígotelo yo dijo...

Anque ando un poco descolgá del tema blogueru hubiera prestáome tar per ellí. Espero que se faiga esi III Alcuentru y contái conmigo pa lo que seya.

Laura

Ricardo dijo...

Camiento que será'l II Alcuentru, non el III, o ye que me lu perdí?

Humberto dijo...

Da mano, da-y les gracies a la xente de "Trayasgaya" pola so presencia na Arribada. La presencia de la bloguesfera nesti eventu cultural paezme que fuera importante, y curiosa. No negativo axunto a la curtiedá de tiempu, pola mor de la densidá'l programa, la implicación más que regular de los autodenomaos "blogueros". Y vien esto a collación de lo qu'escribe "pataca". Vamos ver. Amás de nun participar, o de nun asisitir, paezme, y dígolo col tol ciñu, que como pasa en munches faces del asturianismu equí tamién topamos col "capiellismu". Permíteme "pataca" que faiga dalgunes puntualizaciones. Si bien nun voi ser yo'l que ñegue calter de "blogueru" a nengún; en razón a qué criteriu unos son y otros nun son. Nun lo soi pa entender. Amigu/a míu/a; nun taremos tracamundiando coses o ye que ser "blogueru" amás de tener, caltener y actualizar un blogue va ser una especie "tribu urbana", o d'elite de nun sabría qué. Otra cosa que m'esmuelga ye la to espresión "...xente nuevo nel mundín". ¿Nun verás esto como un clú?, porque si afayes esti criteriu d'antigüedá como base pa estremar a componentes de la "blogosfera", entós, ¿qué pasaría si yo mesmu, pongamos por casu, aplico esti mesmu criteriu pa estremar categoríes dientro de los "defensores de la llingua"?. Si fice'l mio primer poema con dolce años, en 1974, ¿cómo allugaría esto la distancia ente los dos?. Per otra parte, nun puedo pasar ensin comentariu eso de la "corripia Gonzali". ¿Ye'l términu "corripia" el más atopadizu pa referise a unos blogues, que nel casu de dos en concreto, son los que más visites tienen de los fechos na nuestra llingua?. Y como son los que tienen detrás a xente que trabaya (equí pues camentar que col envís que te paeza), ye normal qu'asoleyen más posts qu'otros. O va ser agora malo trabayar pol asturianu. Y pa terminar, una dulda, esta pa Xulio Nel, ¿qué quies dicir con aquello de "Toos sabemos d'onde vien Humberto...", pues noto un daqué minusvalorante. Refiéreste a la mio trayectoria como escritor en llingua asturiana, al mio trabayu como defensor de la llingua en Conceyu Bable o na Xunta Pola, a la mio xera de xestor cultural, o tamos otra vuelta mentando venceyamientos políticos. En nengún casu nun me paez que desvalorice la mio contribución al mundu la bloguesfera. ¿O igual ye qu'equí tamién se dan "carnés"?.
Bono, too esto ye lo que ye, opiniones, consideraciones y entrugues, que me paecen pertinentes p'arriquecer l'alderique sobre les bitácores y la llingua asturianu. Y faigolo, torno a dicilo, col más grande afleutu pa con vós y ensin más otro qu'aidar a la pluralidá nesti "mundín".
Un abrazu. Humberto Gonzali.