26.10.07
Delles coses sobre'l 24 de Payares

La xente de TrayasgayA va tener una xornada completa el 24 de Payares. Al "I Alcuentru Sidra&Blogues" y la convocatoria de la mani a les 18 hores na estación del norte d'Uviéu, améstense les diferentes marches que se van facer dende dellos conceyos, col enfotu de llegar a Uviéu a la hora de la mani. Nós, vamos dir cola marcha del Valle del Nalón que va salir a les 11 la mañana del Parque vieyu de La Felguera. Esti martes, 30 d'ochobre a les 7 la tarde, va tener llugar nes Escueles Dorado de Sama, un conceyu onde asistirá xente del C.A.O., representantes de delles organizaciones que sofiten y van asistir a la marcha y xente a nivel individual, que van dir p'algamar información o material, sobre'l día de la convocatoria. Si quiés dir o saber más del tema, pues averate'l martes 30 d'ochobre a les 7 la tarde poles Escueles Dorado de Sama.


El petu que veis na semeya d'arriba, va vendese el día 24, tanto a la xente que va llegar nes marches como los que sólo van asistir a la mani. Habrá dellos collores y el preciu d'un petu y un pin, va ser de 5 €.


Por otru lláu, ya se esbilló el chigre onde va tener llugar l'alcuentru de blogueros, dempués de la mani. Podeis atopalo en http://www.24payares.wikispaces.com/

 
Díxolo Tin a les 5:17 PM | Dir a la páxina d'esta entrada | 2 Bilordios
22.10.07
Nuevu Cursu de La Escuela de Música Tradicional de Reija

Nesti mes d'ochobre, ta acabantes d'entamar el nuevu cursu académicu 2007/2008 na Escuela de Música Tradicional del Grupu Reija. Esta veterana escuela nel Valle del Nalón, entama otru añu más el cursu, col mesmu porgüeyu col que nació, el d'esparcer y compartir la parte de la cultura asturiana que tien que ver col folclore y la música tradicional. Les materies que se van impartir estu añu son:

  1. Gaita Asturiana.
  2. Tambor Tradicional.
  3. Curdión Diatónica.
  4. Baille Tradicional.
  5. Panderu y Pandereta.
  6. Folclor y Tradición.
  7. Llinguaxe Musical.

Pa ponete en contautu cola dirección de la escuela, namás tienes que mandar un corréu a: info@reija.as o bien llamar al teléfonu 676691424. Tolos martes y xueves, pues pasar poles aules del Colexu Públicu Eulalia Álvarez Lorenzo de La Felguera.

Equi pues descargar la fueya de matrícula:

http://www.reija.as/reija/index.php?option=articles&task=viewarticle&artid=18&Itemid=


Esbillao de http://www.reija.as/ -----------------------------------------------------------


En cuantu a la evolución de la convocatoria del "I Sidra&Blogues", sigue abiertu el filu de discusión en http://www.24payares.wikispaces.com/

Esti xueves, tolo más, vamos averanos a Uviéu pa esbillar un chigre afayaizu y ver si podemos falar col chigreru pa que nos reserve una mesina pal sábado. Un saludu.

 
Díxolo Tin a les 2:08 PM | Dir a la páxina d'esta entrada | 1 Bilordios
17.10.07
Caravana pola Oficialidá nel Suroccidente

El Conceyu Abiertu pola Oficialidá sigue cola campaña pa llevar la reivindicación de la oficialidá a tolos conceyos d’Asturies. Pa ello, la organización, qu’axunta a docenes d’asociaciones, convoca pal sábadu 27 d’ochobre, una Caravana pola Oficialidá pel suroccidente asturianu. La marcha va percorrer los conceyos de Cangas, Tinéu, y Allande.

Siguiendo la filosofía qu’acompaña a les caravanes feches hasta agora, la movilización y les actividaes que l’acompañen van ser entamaes poles organizaciones y colectivos de los propios conceyos, asinamesmo les actuaciones musicales van correr a cargu d’artistes llocales.

Atopao en: Asturnews.

 
Díxolo Tin a les 1:11 PM | Dir a la páxina d'esta entrada | 0 Bilordios
10.10.07
Páxina d'Alcuentru del "I Sidra&Blogues"

Cola fín de tener una páxina neutral onde aldericar sobre'l "I Sidra&Bogues", asina como apuntase, dase de baxa y falar ente nós, sobre tolo que tien que ver con esi día, acabamos de facer un sitiu wiki que tien como direición http://www.24payares.wikispaces.com/ . Equi pue atopase'l testu de la convocatoria, la llista de blogs apuntaos y enriba hai una pestaña que pon "discussions" onde podemos facer un filu d'alderique. Lo primero qu'hai que decidir ye'l chigre onde se va facer. Paeznos que tien que tener tres carauterístiques:
  1. Que tenga sidre.
  2. Que tea cerca d'onde fina la mani.
  3. Que se pueda esplicar de forma fácil cómo llegar pa que la xente que nun ye d'Uviéu, nun tenga problemes.
Pa tolo demás, vémonos en http://www.24payares.wikispaces.com/


Salú.
 
Díxolo Tin a les 1:14 AM | Dir a la páxina d'esta entrada | 3 Bilordios