I Sidra&Blogues Pola Oficialidá

Fai tiempu que se fala de proyeutos de xuntanza pola nuesa blogosfera. Cosa dificil nel universu esti del asturianismu. Pero la xente que fai blogues, somos persones rares y estremaes. Asina que dempués d'un primer acercamientu nel mes d'abril d'esti añu, baxo l'abellugu de la escuela de seronda, parez que llega la hora de formalizar esos contautos y xunir fuercies p'algamar un oxetivu común. A raiz de dellos comentarios ente diferentes blogs y dalguna qu'otra conversación privada, ñacen tres idees básiques:

1. Facer una primer quedada enbaxo'l nome "I Sidra&Blogues Pola Oficialidá", aprovechando la mani del C.A.O. del 24 payares d'Uviéu cola fín de conocese y falar de la creación d'una Xunta de Blogueros/es en Llingua Asturiana, y de la organización del "II Alcuentru de Blogueros/es en Llingua Asturiana" sobre'l mes d'abril de 2008.
2. Crear una Xunta de Blogueros/es en Llingua Asturiana, tomando les decisiones de los caminos a siguir.
3. Organizar de forma autónoma el "II Alcuentru de Blogueros/es en Llingua Asturiana", con tolo qu'ello conlleva (llugar, ponentes, material, suvenciones...) nestos siete meses que queden.

El guante ta echáu. Almítense idees, propuestes y tolo que se vos ocurra.

Un saludu, xente.

Lleer Más...

Métodu de Gaita

Por fín, a mediaos del añu 2007, acaba d'espublizase'l métodu definitivu pa deprender a tocar la gaita. Dempués de los intentos fallíos de Xuacu Amieva, Guti o la Conseyería, apaez asoleyáu na rede un métodu revolucionariu qu'amiesta los conocimientos musicales a les últimes tendencies na investigación docente, que tienen como fín cimeru, l'algamar que'l escolín deprenda'l mayor numberu de conceutos col mínimu esfuerciu pola so parte. Entá nun ta tornáu a la llingua de nueso pero ya se comenta que nun tardará muncho en tornase a delles llingües. Equi teneis l'enllaz pa poder velu en primicia:

http://www.oooooouch.com/

Lleer Más...

La Ciudá de Samartín

Samartín del Rei Aurelio ya pué presumir de ser la tercer ciudá más poblada de les Cuenques. El Conseyu de Gobiernu del Principáu dio lluz verde na tarde d'ayeri a la unificación nuna única urbe de L'Entregu, Sotrondio y Blimea. La ciudá de Samartín del Rei Aurelio contará con 17.000 habitantes nun entramáu urbanu de más de 7 kilómetros y pasará a sustituir a Sotrondio como capital del municipiu. La intención del Ayuntamientu, qu'acordó el cambiu de denominación na sesión plenaria cellebrada en ochobre del añu pasáu, ye puxar pola identificación del conceyu y reforciar la so presencia nos indicadores de carreteres. Nestes señales sólo apaecen reflexaos los nomes de llocalidaes, non de municipios.

Fonte: LNE

Lleer Más...

Nirudia, el Fotolog n'Asturianu

L'equipu de Nireblog llanza a la rede la nueva plataforma p'asoleyar fotologs de baldre y en delles llingües estremaes. Hasta agora entá nun esistía en llingua asturiana, pero fai pocos díes, la xente de Nireblog púsose en contautu por otros temes con TrayasgayA y xurdió la idea de tornar a llingua asturiana esti proyeutu nomáu Nirudia. Nirudia ye un sitiu onde facer el to Blog de Semeyes y Mapes totalmente de baldre y amás, conseguir tornalo nun actu de militancia al facelo na llingua de nueso. ¿Nun te prestaría tener un sitiu onde guardar les Semeyes de los llugares que te marcaron y poder enseñales a tol mundu?, pues esi sitiu nómase Nirudia. Animámosvos a toos y toes a facer medrar esti sitiu a la vegada que medra l'esparcimientu de la nuesa llingua na rede de redes.

Lleer Más...

Blog colos RSS de los blogs n'asturianu

Dende la nuesa falta de conocimientu del mundu la rede, los blogs y la web 2.0, llevamos un tiempu intentando trabayar sobre un proyeutu de sindicación de les RSS onde se xunten tolos blogs en llingua asturiana (a la espera que daquién de'l primer pasu d'un proyeutu mayor pol que munchos naguamos). D'esta manera, amás de tener un puntu d'alcuentru que sofite la nuesa comunidá y el conocimientu ente nós, pretendemos que seya una ferramienta práutica a la hora de saber quién y cuándo fizo una actualización na asturblogosfera.

Camentamos que con dellos blogs, sobre too de Gugara, tamos teniendo problemes cola direición de los RSS. Si tienes un blog en llingua asturiana y quies que tea nesa llista, namás tienes que mandar la to direición de RSS al corréu: trayasgaya@hotmail.com

Podeis ver la páxina na direición:

www.llinguablog.blogspot.com
www.llinguablog.blogspot.com
www.llinguablog.blogspot.com

Lleer Más...