Tiense conocimientu de la gaita n´Asturies dende la Edá Media. El calter popular fizo que s´aplicase en munchos ámbitos de la cultura tradicional asturiana, de mou que ye casique imposible camentar na nuesa música ensin que nos venga a la tiesta la imaxe de la mesma. D´esi mou pue vese la presencia la gaita acompangando la misa, la procesión, el baille o la tonada. En cuantes a la so morfoloxía podemos dicir que la gaita asturiana ta formada de fuelle, asientos, soplete, punteru y roncón.
El fuelle ye cenciellamente´l pelleyu enteru d´un cabritu, que-y sirve a la gaita como depósitu d´aire, y al gaiteru como aida auxiliar pa suministrar esti al instrumentu y facelu sonar. Cúbrese´l fuelle con una funda de tela, normalmente de panilla llisa o terciopelu, qu´amas d´adornu fai tope nel infláu. Delles vegaes remátase con flecos de colores per tolo llargo les sos partes llibres. Los asientos son los güecos de madera que xuníos al fuelle sirven pa insertar les estremaes pieces a esti. Per aciu del soplete metese l´aire nel fuelle. Nel interior tien una válvula que nun dexa que l´aire salga una vegada que ta dientro. Nel otru estremu una boquiella, de la mesma madera que´l restu del soplete, de güesu, metal o cualesquier otru material asemeyáu, que ye la que s´introduz nos llabios.
Les pieces en tubu nomaes “prima”, “tercia” y “copa” formen el roncón de la gaita. Nel so interior un “payón” que fai d´acompangamientu de la melodía del punteru en tonu menor a esti. El “payón” ye caña con llingüeta, fecha principalmente en cañavera, que s´inxerta nel estremu superior de la “prima”. El punteru tien forma tubu cónicu y ye l´encargáu de la melodía. Tien once furacos, d´estos, ocho, son de dixitación y los otros nomaos “troneres” son acústicos y nun s´usen nesta. Nel estremu superior del punteru, nel encax col so asientu, allugase la “payuela”. La función del punteru ye modular ya amplificar el soníu qu´esta produz. La madera cola que se fai lo mesmo asientosque punteru, roncón y soplete, ye madera de calidá. Amás de los adornos del fuelle, engalanasela gaita con flecos nel roncón y pompones de flecu que colinguen d´elli. El mou de tocar la gaita asturiana ye con una dixitación semi-zarrada. Llevántense los deos de la mano drecha, que se ponen debaxo, d´un n´un y tapando col restu, y cola manzorga, que se pon enriba, pue llegar a llevantase hasta tres. Nel casu gaiteros zurdos, ye de pescanciar qu´al revés.
Publicación de l'Asociación d'Etnografía y Folclor "Reija" de Llangréu.
