La Blogosfera Asturiana Vese les Cares

Dende’l Conseyu de la Mocedá va a facese, enmarcáu na Escuela de Seronda, un Foru dedicáu exclusivamente a la Blogosfera Asturiana.
L’oxetivu ye crear un espaciu de debate d’esti soporte mediáticu onde poder analizar la importancia del blog como ferramienta de comunicación n’Asturies y un llugar pal xorrecimientu de la llingua asturiana, el so presente y futuru na rede. El foru vendrá complementáu con unes xornaes de formación nes nueves tendencies y téuniques nos blogs.
Otru foru d’interés que se va facer na escuela ye de Comunidaes Virtuales. Alministración, xestión y usu d’elles n’Asturies.

La wiquipedia diz pa referise al blog: “El blog, tamién conocíu como weblog o cuadernu de bitácores (llistáu de socesos), ye un sitiu web periódicamente actualizáu que recueye cronolóxicamente textos o artículos d’un o varios autores, apareciendo primero el más reciente, onde l’autor conserva siempre la llibertá de dexar espublizao lo que crea pertinente. Normalmente, en cada artículu, los llectores pueden escribir los sos comentarios y l’autor da-yos rempuesta, de forma que ye posible establecer un diálogu. L’usu o temática de cada weblog ye particular, hailos de tipu personal, periodísticu, empresarial o corporativu, tecnolóxicu, educativu, políticos, etc.”

El blog ye anguaño una ferramienta d’expresión pa los asturiano falantes mui utilizada, un exemplu de que l’asturianu pue ser perfeutamente una llingua vehícular con futuru y mercáu. Un exemplu de resistencia llingüistica, de que nun se puede poner portielles a la mar.

Dende’l Conseyu de la Mocedá invitásenos a dir a Xixón los díes 28,29 y 30 d’Abril a estes xornaes.
Tenéis tola información na páxina de Conseyu http://www.cmpa.es/ .

Lleer Más...

Face-y casu a Henry

Les unidaes d'Uviéu y Xixón rexistraron 600 infeciones sesuales de mozos en 2006.
Los especialistes alerten d'un puxu d'enfermedaes bacterianes ente la población xuvenil por mor del gran númberu de rellaciones ensin proteción
L'especialista Joaquim sarquella asegura que «L'escrotu agudu, el varicocele y la curvatura'l pene son les patoloxíes xenitales más comunes»

Los mozos asturianos nun son axenos al significativu rebrote de los contagios por enfermedaes bacterianes como la sífilis, la gonococia (gonorrea) o'l herpes xenital asociaos a práutiques sesuales de riesgu. Les dos unidaes especializaes n'infeciones de trasmisión sesual qu'hay n'Asturies (Hospital Monte Naranco, n'Uviéu, y centru de salú de Pumarín, en Xixón) diagnosticaron l'añu pasáu unes 600 enfermedaes d'esti tipu ente xóvenes de 20 a 24 años. Más de 200 especialistes debaten dende ayeri nel auditoriu d'Uviéu sobre problemes sanitarios, como les enfermedaes sesuales, rellacionaos colos vezos y estilos de vida de los adolescentes y xóvenes españoles.

La mélica María Luisa Junquera, responsable de la unidá d'infeciones de transmisión sesual d'Uviéu, aseguró qu'el aumentu d'esti tipu d'enfermedaes ye por que hai munchos mozos que baxaron la guardia nes rellaciones, sobre too con persones desconocíes, y nun utilizen preservativos. El virus del papiloma humanu (VPH), que pue desembocar en verruges xenitales, les clamidies y los herpes xenitales (por rellaciones orales ensin preservativu) son, por esti orden, les infeciones sesuales más comunes ente la mocedá asturiana. España ya tien la vacuna pa prevenir el virus del papiloma y el so efeutu más gacientu, el cáncer de cuellu d'úteru, pero'l Gobiernu nun considera prioritaria financiala con recursos públicos. Namai el 25 por cientu de los mozos y el 40 por cientu de les moces mantienen rellaciones sexuales con métodos anticonceptivos, según datos facilitaos pol direutor del serviciu d'androloxía de la Fundación Puigvert de Barcelona, Eduardo Ruiz Castañé, quien subrayó la «precocidá» de la cabera xeneración d'adolescentes españoles: "les primeres rellaciones adelantáronse a los 14 o 15 años. Castañé dixo qu'a eses edaes munchos adolescentes tienen «escasa madurez personal y orgánica» y en munches ocasiones mantienen les sos rellaciones «n'ambientes y condiciones pocu afayaizos» o baxu los efeutos del alcohol y les droges, lo que pue acarrear consecuencies de futuru, como los embarazos prematuros.

Esbillao de La Nueva España.

Lleer Más...

Asturblogosfera

"Corría detrás de la rapiega, caleyando monte abaxo, camín de La Fonte Bravial, onde se formaba el llagu la Xana, mientres pensaba en ochobre’79, cuando entré de nueche en lo de les pites y vi qu’un páxaru non, de bon agüeru precisamente, me había llevao tres. Ésta vegada nun la iba a dexar colar. Tábamos tratando del mio sustentu y ser un paráu n’Asturies ye percomplicao, ya tamos fartos que nos den trayasgaya. Al poco llegué al pueblu cola seguridá que tenía que tar cerca. Pasé por delantre de la Ilesia, onde’l cura taba dando misa en llingua asturiana. Entós avereme a la puerta entreabierta sintiendo al cura recitar: -“lux omnia vincit, sursum corda”-, mientres consagraba el vinu. Unos guajes sentaos, nel bancu esterior de la nave llateral, discutien si escuchar una cinta de los berrones o de llangres, creando’l requexu les discrepancies qu’alteraba la paz del pueblín. Ún paisano qu’entamó a reñilos, averose a mí, contandome que yeren los fiyos de nícer, el paisano que vive na casa que ta na parte alta del pueblu, que llamen el fortín del chamicu y que precisamente güei, taba enllena de xente, por mor de la esfoyaza. Entamé a xubir pa la casa, cuando vi dos paisanos que corrien escontra mí, gritando:- “¡¡¡ten cuidáu, qu’hay xelu!!! ”- “Val, ya t’oyí”- Retruque-yos, mirando pa un charcu solidificáu qu’había delantre mí, nel suelu. Yeren dos hermanos ximielgos de boina, xilecu, pantalón de pana y madreñes que se me presenataron como González y González. Ún de ellos garrome pol brazu y díxome: -“piedra que relluz, charcu de xuru”- y tiró encima’l agua xelada, fueyes del periódicu, Nueves d’Asturies, que llevaba, na mano, mientres me esplicaba que namai lu mercaba pa lleer les noticies del Real Uviéu y los testimonios asturianos. Acompañaronme pola caleya, mientres los sentía falar de l’Asturies d’anguaño, de les empreses que tan esfarrapando’l mundu y del nuevu alcalde de la FSA de las JONS, por que taba gusmiando tolo que podía. Llegamos a la puerta la casa. Los ximielgos, llamaron pegando cola curva’l cayáu, na parte d’arriba del cuarterón, mientres se sentíen cantar les primeres frases de la danza “ai, un galán d’esta villa”. Ún de los ximielgos rióse polo baxo mientres dixo –“de xuru que tan toos borrachos. Ye lo que Xabeldiz, cuando la xente entama a baillar, ye que ya tan mauros.”- El otru retruco-y –“espero que tamién te la mio ayalga y me convide a un cafetín con pingarates”-.
Fuera de la casa, el xardín de la borrina que formaba el patiu, animaba a tolos que diben caleyando por asturies, faciendo país, a averase al abellugu del calorín del llar y echar unos traguinos. Dientro, les mocines baillaben, presumiendo de les sos meyores ropes, como ayalgues galanes, mientres les vieyes tocaben panderos y panderetes, acompañaes de les melodíes que-yos salien del gargüelu. Munches de les moces pertenecien a la Asociación Cultural y Recreativa El Cascayu, una de les munches d'Asturies, nes que namai aceptaben muyeres. Yeren más d'ún, los mozos que naguaben por entrar nesi conceyu femenín, aun a sabiendes que nun yera más qu'un de dellos camientos d'un suañador, por que yera imposible, pero pa conseguilo, taben dispuestos a dir from Xixón to London a la pata coxa, con tal d'algamar el so obxetivu, o vende-y l'alma al mesmu trasgu d'areces..."

Perdonai los que nun tais. Sabemos que somos munchos más, aunque dellos ten morrienodo, o escaecios polos dueños. Cada poco ñacen otros nuevos que-y dan continuidá a ésti movimientu. Nun dexa de ser una forma más d'esparcimientu de la cultura asturiana, de manera totalmente altruista, llevada a cabu por xente anónima y ensin nengún enfotu más qu'usar la so llingua llariega como ferramienta pa cuntar coses, demostrando que va costa-yos desaniciala tolos fartones que nos quieren poner un trapu en focicu, polo menos mientres vivamos. Por too esto, Puxa la Blogosfera Astur, Puxa la nuesa cultura, L'Asturianu Llingua Oficial.

Salú ya TrayasgayA.

Lleer Más...

Movilidá

El diariu La Nueva España publica esta noticia na que señala que trabayadores asturianos firmen al añu más de 35.000 contratos n´otres comunidaes. Llión y Madrid, son los principales destinos.
Según l´Institutu Nacional d´Emplegu (INEM) los asturianos firmaron más de 35.000 contratos pa trabayar n´otres comunidaes durante l´añu 2005. Nel informe Indícase qu´Asturies ye una rexón con baxes tases de movilidá llaboral, pero sí tien un acusáu saldu negativu, porque son más quienes salen a otros territorios pa trabayar que quienes entren. Tener 35 años, ser home y trabayar en Madrid, esi ye´l perfil de los nuesos emigrantes.

Esbillao de Planetastur.

Aunque'l Presidente Vicente tea la picardía de camudar la nomenclatura de les rialidaes, pa siguir engordando'l velu, a través del cual, los asturianos intentamos ver lo que tenemos enfrente les narices, entá queda xente que nun sufre de ceguera impuesta y ye quién a dase cuenta que nun val que a la emigración de tola vida, la antroxemos col términu "movilidá", pa facela más prestosa y que determinaes persones, queden llibres de toa culpa. Cuando un políticu fala, cola altanería del poder, sobre un problema qu'afecta a un grupu de xente cercanu a tí, pué sentise rabia. Cuando fala d'un problema que t'afecta direutamente a tí y yes tú el que llames pol teléfonu a to casa pa saber de los tuyos, pagues el alquiler en Madrí y pienses cada día si merez la pena vivir amargáu a cambiu d'algamar un futuru llaboral adecuáu a la to formación, lo más normal, ye que, al sentir falar a determinaes persones que tienen la capacidá y la obligación de tomar decisiones pa facilitar la vida a los demás, cuantu menos, sientas odiu.

Marchar y nun volver o volver como un estrañu.

Lleer Más...

Música Como Entretenimientu IV

Nes romeríes d´antañu los bailladores facíen gala de les sos castañueles, nun solo lluciendo´l so bon tocar, tamien la orixinalidá los sos diseños. El material emplegáu pa facer esti llabor ye la madera, a poder ser que seya llixera y dura. La castañuela ta fecha por dos pieces netes enfrentaes ya enfalmaraes pel interior pa da-y más puxu a la so sonoridá. Xúnense les dos pieces per aciu d´un cordón que traviesa dos furacos a mou d´oreya, fechos en cada pieza na parte d´arriba. El mou de tocala ye caúna nuna mano metiendo pel cordón el deu corazón. Cutiendo, chasquiando y repiqueando, algamase arrancar un de los soníos más identificativu de la música popular. El tamañu les castañueles ye perestremáu y va dende los pitos , que se toquen suxetando nel deu pulgar y faciendo chasquíos, hasta les castañueles grandes qu´acompanguen al Bail.le d´Arriba na montaña astur-lleonesa que delles vegaes son más grandes que´l tamañu la mano. Los adornos tallaos nelles son del too personalizaos y n´ocasiones percomplexos artísticamente. Esto recálca entá más l´apreciu que siempres se-y tuvo a les castañueles.

Con rasgos asemeyaos a estes alcontrámosnos coles tarrañueles. Puen ser quiciabes una forma menos evolucionada de les mesmes. Tan feches por dos tablilles, que davezu son madera, que se toquen poniéndoles ente los deos y faciéndoles repiquear con xiros y güelpes de moñeca.

Publicación de L'Asociación d'Etnografía y Folclor Reija de Llangréu.

Lleer Más...

Axencia Asturiana d'Emigración

Ayeri, unu de marzu de 2007, de magar les 19:30 hores, cellebrose nel Teatru Filarmónica d'Uviéu l'actu de distinción a músicos, artistes y creadores culturales asturianos que collaboraron cola Axencia Asturiana d'Emigración.

Les distinciones consistieron nun grabáu numberáu del artista asturianu Astur Paredes, que ta nomáu "Páxaru Atlantis" y foi dáu a tolos grupos y artistes individuales que de forma direuta o indireuta, colaboraron cola Conseyería responsable de la emigración asturiana y de los centros asturianos del mundu. L'actu tuvo complementáu cola actuación en direutu de Vicente Prado "El Pravianu", Anabel Santiago y dellos artistes más.

Lleer Más...