La mani del sábadu foi un actu de llucha a la escontra de les inclemencies climatolóxiques coles qu'alboreció esi día. Por esi motivu, la asistencia vióse mermada considerablemente aunque nun impidió a cerca d'un millar de persones caleyaran poles cais d'Uviéu pidiendo que la llingua asturiana tenga el so sitiu dientro del sistema educativu públicu en condiciones dignes y de normalidá. La marcha foi camudada con respeutu al trazau tradicional que discurre a lo llargo la Cai Uría, rodeando ésta vegada el Campu San Francisco, onde la xente fizo otra demostración de civismu al discurrir tola manifestación esin nengún incidente y les gargantes de dalgunos llucharon ensin descansu escontra del fríu, l'aire y l'agua, glayando los cantares que son ya, tristemente tradicionales nestos casos. La marcha finó na Plaza de la Escandalera onde los manifestantes, xuntáronse alrodiu de les pallabres qu'Ester Fonseca pronunció nel discursu de pieslle. El fechu de facer un tiempu tan desapacible, nun dexó demostrar la teoría que diz que los sábados pola mañana hai muncha xente que tien que trabayar y los que son de les fasteres más orientales y ocidentales, cuésta-yos más averase a Uviéu que si se ficiera pola tarde. Teoría qu'esplica el ésitu d'asistencia de la cabera manifestación.
0 bilordios:
Publicar un comentario