"Dos meses dempués d'echar a volar, l'aerollinia de capital asturianu Air Asturias echa'l piesllu, a lo menos de manera provisional, suspendiendo tolos sos vuelos dende'l 26 de xineru en p'alantre. El presidente d'Air Asturias, José Antonio Fernández, dio ayeri una rueda de prensa estraordinaria n'Avilés pa esplicar les causes que llevaron al cese d'actividá de la compañía, que se produz pocos díes dempués de qu'Air Asturias anunciare una mengua nos sos servicios con Lisboa y Madrid.
Fernández esplicó que la decisión d'echar el piesllu yera "un actu de responsabilidá" que yera preciso facer "enantes de que les consecuencies nun tuvieren torna posible y fueren negatives pa usuarios, trabayadores y empreses". "Ye un mal pa la empresa, pero un mal menor puesto que siguir cola actividá supondría un dañu irreparable".
Ente les causes qu'obligaron al cese d'actividá Fernández refirióse a "la baxa demanda d'usuarios". Anque-y echó la culpa d'ello a los malos horarios de vuelu que se-y concedieron a la empresa, Fernández reconoció que "les ventes y ocupaciones de los vuelos "nun se correspondieron coles espectatives que teníemos" y que l'enfotu que teníen nel mercáu potencial nun cuayó. El directivu comentó que la empresa entamare con una estratexa fuerte p'asitiase nel mercáu enantes de que llegaren a Asturies otros operadores de baxu coste y reconoció como que los costes d'operación d'Air Asturias disparáronse por dellos factores, ente ellos el determín d'ufiertar un "serviciu de calidá", emplegando un avión de primer nivel y menguando la capacidá d'asientos del mesmu pa que los pasaxeros s'afayaren nel aparatu.
El responsable de la empresa repitió delles vegaes que nun va haber persones dañaes pol pieslle, descartando cualquier semeyanza col casu d'Air Madrid, y esplicó qu'a los pasaxeros con billete mercáu que nun acepten la devolución del importe va buscáse-yos sitiu en vuelos d'otres compañíes. En cuantes a los trabayadores, el directivu esplicó que los sos contratos van dir cancelándose acordies col "devenir de la compañía" y que'l touroperador "Air Asturias vacaciones" va siguir funcionando pel momentu. José Antonio Fernández sorrayó'l fechu de que pesllar agora les actividaes de vuelu "permite salvar la compañía y dexar la puerta abierta pa un futuru", comentando Fernández la posibilidá d'entamar vuelos tresoceánicos."
Fonte: Asturies.com
0 bilordios:
Publicar un comentario