Les Fiestes de San Pedru na Felguera

El domingu 2 de Xunetu de 2006, comu clausura de les fiestes de San Pedru na Felguera tuvo llugar la ya tradicional "Gira a Castandiello". Una fiesta en pelligru pergrave por mor de los cambios radicales que la Sociedá de Festeyos de San Pedru (muergamu privau que xestiona les fiestes col sofitu económicu de los sos socios) introduz na popular folixa felguerina. Ye cierto que la fiesta camudó en forma nos caberos años, igual que camudó la vida y la forma d'ociu na mocedá, que ye'l braveru pegoyu d'esta folixa. Esti foi'l desencadenante de que l'anterior direutiva entamara colos cambios que cada añu mantienen comu si d'una tradición se tratara.

Unu de los primeros foi vaciar la fuente de la Plaza Merediz, onde finaba el desfile de baxada del prau, xuntandose y bañandose tolos romeros n'ella. Esi foi un de los sos primeros llogros. Merecía la pena güeyar el focicu que se nos quedó al llegar al la plazoleta y ver que nun había una gota d'agua. Esi añu entamó la "Fiesta de la Espuma", un inventu que introduxeron sin cuntar cola opinión de la mocedá Llangreana, alegando problemas na seguridá de la xente cuandu se bañaben na fuente ya que nun taba habilitada pa esi fin, por tener munches esquines y caños de metal onde unu podía mancase. Cuandu se ficieron obres n'esa fuente nun se pensó en solucionar esi problema sinon que amás punsieronse arbolinos y plantes alrededor pa dificultar l'accesu y asina poder argumentar que "nun nos podemos bañar por qu'estropiamos les plantes", mas torgues ye imposible. De la seguridá na "Fiesta de la Espuma" nun voy dicir na, tou'l que haya tao en una sabe lo que piquen los güeyos y lo facil que ye cayer y quedar enterrau n'espuma cola dificultá añadía pa respirar. En fin... nótase que los de festeyos nun lo probaron.

N'esa época llegaron a intentar que nun se tirara agua metiendo mieu a la xente con amenaces basaes en mentires comu que iben a echar multes o que s'estropiaben los instrumentos de les charangues. Qu'aguien me esplique que pinten les charangues baxando de la gira a la misma vegada que los romeros. ¿Nos Sanfermines tamien desfilen cuandu baxen los toros? ¿o ye que van a echar multes a los paisanos que suelten los sos toros pela cai?. Con tola xente intelixente que organiza y diseña les nueses fiestes nun se-y ocurrió a naide alternatives coherentes pa que convivan les dos formes d'entender la gira, la rempuesta foi intentar eliminar les costumes que nun comulguen cola so forma de pensar, la rempuesta mas fácil y fascista.

Menos mal que imperó la coherencia nel sen de la fiesta y l'agua enxamas dexó de ser el pegoyu mas representativu de la nuesa folixa. A cambiu d'esto, siguieronse camudando otres coses comu'l sitiu onde se tiren los fueos el caberu dia o el sitiu del entamu del desfile hacia el prau de Castandiello. Curiosamente tantu los fueos comu'l desfile danse nel mismu llau. Un parque de nueva creación sospechosamente cercanu a la sidrería de festeyos.

Otra cosa llamativa nes fiestes felguerines ye la cantidá de perres que se gasten en contratar a un númberu tan elevau de orquestes y nun traer a d'algun grupu conocíu que ye polo que nagua la mocedá. Tola vida nos llamó l'atención que pueblos comu Cuturrasu, Ciañu o inclusu'l barriu de La Pomar, tuviera meyores conciertos que La Felguera. Ensin mencionar que tolos años contraten a un grupu folclóricu de San Esteban de les Cruces escontra los que nun teo na pero, paezme vergoñosa por parte de la Sociedá de Festeyos que nun contraten a nengún de los grupos que hay en Llangréu ni a nengún de los escolinos que estudien nes estremaes escueles de música tradicional de La Felguera (mirai un poco pa Mieres haber si sacais dalguna conclusión).

Pa finar llamentamos dicir qu'esto nun tien pinta de camudar, mas bien tolo contrario, güeyando la nueva moda de reinventar una procesión sacando'l santu de paseo pol Parque Vieyu. Prestarianos que sepan que puen manipulanos por que tiene el poder pa facelo, pero pué quedayos bien nidio que en nengun momentu nos tan engañando.