L'agrupación d'Etnografia y Folclor Reija de Llangréu fúndase en 1955 de la mano de "Maite Gutierrez Olay" col nome de "Coros y Danzas de La Felguera" y camuda el so nome en 1978 n'homenaxe póstumu a un de los sos componentes, "Jorge Florez Lopez" conocíu como "Reija".Dende un entamu'l so principal esmolecimientu y porgüeyu diríxese a caltener ya esparder el folclor y la etnografía popular en tolos aspeutos. D'esi mou non solo representa los bailles y cantares tradicionales d'Asturies, sinón que tamién organiza charres, esposiciones y talleres de tradición, amás de cuntar con escuela de música y cultura tradicional.
Nes sos interpretaciones musicales trata de representar los bailles y dances tradicionales d'un mou asemeyau al que les xentes del pueblu representaben y representen nes romeríes y folixes populares. El so repertoriu abarca la totalidá d'Asturies, pero tien el so principal raigañu na tradición de la cuenca minera del Nalón.
En toos estos años, fueron numberoses les actuaciones feches tanto n'España como n'Europa. Ente elles hai que destacar la so presencia en festivales de Lille (Francia), Viana do Castelo (Portugal), Montpellier (Francia), Aero y Copenhague (Dinamarca), Utrech y Henguelo (Holanda), Serra da Estrela (Portugal), Festival Interceltico de Guingamp (Bretaña) y numberoses participaciones en festivales de folclor d'España.Cunta colos galardones "Arandanu de Plata" del Certamen de los Pueblos d'Asturies de Navelgas en Tinéu y el "Urogallo de Bronce" del Centru Asturianu de Madrid, en reconocimentu pol so llabor d'investigación.
AGRUPACIÓN DE ETNOGRAFÍA Y FOLCLOR 'REIJA' DE LLANGRÉU
DIREICCIÓN:
C/ Pintor Paulino Vicente, 2
Apartado de Correos 40, 33930 La Felguera (Llangréu), Asturies, Spain.
Teléfonos Contratación: 676691424 - 620624327
