TrayasgayA

Sobre la votación meyor blogue 2011

2012-01-09T07:42:00.005+01:00

Igual algunu pescanció que tamos na fecha de la tradicional votación al meyor blogue n'asturianu del añu pasáu y entá nun se sabe na sobre les votaciones. Va unos díes, falamos les tres persones que más trabayaron por esti proyeutu l'añu pasáu. Los tres teníamos la mesma idea enantes de falar por diferentes razones, nun siguir esti añu cola votación al meyor blogue en llingua asturiana. Con esto nun pretendemos que muerra esti proyeutu. Si alguien tien ilusión y ganes pa siguir con ello, ponemos les cuentes de les redes sociales, llogu y tolo que faiga falta a la so disposición. Entendíamos estes votaciones como un bien común y asina tien que siguir siendo, si daquién se fai cargu d'ello.

Nun somos de los que nos presta dexar proyeutos abandonaos, pero nel tarrén personal ya nun echamos tantu tiempu como enantes a la bloguesfera, nin si quiera al nuesu blogue. Anguañu, dellos proyeutos estremaos ocupen el nuesu tiempu. Esto, xunío a la rempuesta que los propios blogueros y blogueres dieron al caberu sidra&blogues, onde se entregaron los premios de les pasaes votaciones, fai que tengamos nidio qu'esti añu nun vamos ser nós, los que tiremos d'esti carru. Tolo que se trabayó fízose de votu propiu, con ilusión y ensin esperar na a cambiu, pero agora ye'l tiempu de tar a otres coses y d'entregar el relevu.

Dende equí, milenta gracies a la xente que trabayó por que l'asturianu na rede saliera de la corripa y tuviera repercusión al traviés d'estes votaciones.

Llora el Manglar

2011-12-21T11:04:00.003+01:00

El Centru de Referencia de la Cultura y la Llingua Asturiana Casa de los Alberti acueye la proyección del documental con guión y dirección de Leandro Velasco, que va tar presente nel actu. El documental va echase mañana xueves 22 d’avientu, a les 19:00 hores. N’acabando la proyección va abrise un tiempu d’alderique y coloquiu. L’actu organízalu PROYDE Asturies y cuenta cola collaboración de Conceyu de Solidaridá y Xusticia y l’Ayuntamientu de Llangréu.

El documental narra la llucha de la comunidá d’Olmedo, un llugar de población afroecuatoriano, contra una empresa camaronera que vien causando la destrucción del ecosistema y de los medios de vida de la comunidá. Demientres sieglos, esti pueblu vivío n’armonía cola naturaleza, pero esta rellación amenázala de muerte l’apaición d’esta empresa camaronera que quebró l’apacible esistencia de la xente d’Olmedo. La empresa construyó grandes piscines pa la cría industrial del llagostín tropical, destruyendo la viesca de manglar y los medios de vida de la población local. La comunidá d’Olmedo, amenazada pola coldicia d’esta empresa, entamó una llucha intensa, llogrando establecer aliances dientro y fuera d’Ecuador. Llora el Manglar ye la historia d’esa llucha, fraguada en compromisos d'amistá y hermandá, por sacar alantre la so propuesta alternativa de desarrollu. El documental promoviéronlu les ONGD PROYDE, Azacán Serso Castiella y Lleón y Aspa.

Duerna presenta "a mansalva" en La Felguera

2011-12-08T08:40:00.003+01:00

Duerna va presentar el so segundu trabayu, "A Mansalva" nel Nuevu Teatru La Felguera’l próximu 9 d’avientu a les 20:15 hores El preciu la entrada ye 3€.

A Mansalva ye un trabayu coproducíu por Duerna y Dani Álvarez que presenta la novedá de la incorporación de José Martínez a la voz y la guitarra y una montonera collaboraciones de gran nivel. Esti segundu trabayu musical presenta una gran variación de xéneros con temes mui baillables de producción propia y que beben de la tradición asturiana, italiana o bretona.

Pa la presentación d’esti trabayu musical, Duerna va tar acompañáu de les bandes de gaites Conceyu Llangréu y Conceyu Siero, amás del Coru Padre Coll, Tomás Fernández (saxo), Rubén Menéndez (trompeta), Orestes Barbachán (congues y bongos), Tante Blanco (guitarra llétrica), Marisa Valle Roso (voz), l’Agrupación d’Etnografía y Folclor Reija de Llangréu y Joaquín y Cintya (tangu).

Fonte: Serviciu de Normalización Llingüistica del Conceyu Llangréu.

Marisa Valle Roso en La Felguera

2011-12-01T21:47:00.001+01:00

El Nuevu Teatru La Felguera va acoyer la presentación del primer discu en solitariu de Marisa Valle Roso, De lo fondero l’alma. El conciertu va tener llugar a les 20:15 hores d’esti próximu vienres 2 d’avientu.

De lo fondero l’alma ye’l primer discu de Marisa Valle Roso en solitariu. Nelli, Marisa busca reflexar tola so trayectoria dientro la canción asturiana, dexando grabaes aquelles canciones que nestos años fueron les más representatives del so repertoriu. N’esti discu Marisa tamién pretende tocar diferentes estilos de la canción asturiana, d’esta manera, atopamos en De lo fondero l’alma canción del altu la lleva, arrieres, ayeranes, d’autor, vaqueira, etc. Marisa ta acompañada nesti trabayu musical por prestixosos músicos del altor del gaiteru Pablo Carrera, Xaime Arias al pianu, Rodrigo Sturm a la guitarra o les percusiones tradicionales d’Estefanía Moro. El conciertu va presentalu Fernando Valle Roso y la entrada ye llibre.

Xueves de Castilletes y Carbón

2011-11-02T17:33:00.004+01:00

Los xueves de castilletes y carbón trátase d’una actividá de dinamización cultural que ponen en marcha la Fundación Nuberu y l’Ayuntamientu de Llangréu. Estes actividaes van empezar esti xueves día 3 de payares en Ciañu y van acabar el día 4 d’avientu nel Nuevu Teatru La Felguera.

Estes xornaes culturales, De Castilletes y carbón, xiren alredor de les interrellaciones ente mina, música, lliteratura, toponimia, sociedá… y s’articulen nuna serie de ponencies sobre estos temes, Los Xueves de Castilletes y Carbón na Casa los Alberti, y rematen con un conciertu del grupu Nuberu nel Nuevu Teatru La Felguera’l día de Santa Bárbara.

Programa:

Fonte: Serviciu de Normalización Llingüistica del Conceyu Llangréu.

Exposición de Semeyes d'Ucrania y Rumanía

2011-09-23T16:21:00.003+02:00

La inauguración de la exposición "Una Mirada al Este" de Javier R. Linera, va ser el vienres 23 de setiembre a les 19:30 hores na Casa de los Alberti de Ciañu.

Dende que, na seronda de 1998 Javier Rodríguez Linera llegara a Lviv, ciudá nel occidente d’Ucrania, surdió nelli un interés especial pol este d'Europa, una zona acabante de dexar de ser l'otru llau del telón d'aceru. Compartir la vida con ellos primero y visitalos dempués, pero con otros güeyos bien estremaos de los del turista, dio como resultáu una colección de fotografíes de les cuales esta esposición ye una amuesa.

Una Mirada al Este quier amosar la vida n'Ucrania y en Rumanía al traviés d'una mirada interesada y empática qu'afaya la vitalidá de les sos xentes nel día a día. Estes semeyes quieren ser un ventanucu abiertu pel qu'entrever a esa familia de llabradores nos montes de los Cárpatos, a esi arguyosu home qu'enseña'l mapa de lo que foi la Gran Rumanía, a eses paisanes que ven pasar el mundu frente al so bancu… Xente que trabaya, que va al mercáu, que charra colos collacios, que fuelga nun parque. Xente normal a lo que-y debo abondo.

La esposición Una mirada al este del artista llangreanu Javier Rodríguez Linera va poder visitase na Casa los Alberti de Ciañu del vienres 23 de setiembre al xueves 28 d’ochobre.

Fonte: Serviciu Normalización Llingüística Ayuntamientu de Llangréu.

Galería en Flickr de Javier R. Linera.

Lesbianes fotografiaes por Lesbianes

2011-09-05T08:05:00.003+02:00

Esti vienres 2 de setiembre a les 18:00 hores inaugúrase na Casa de los Alberti de Ciañu la esposición Lesbianes fotografiaes por lesbianes. Esta muestra de fotografíes qu’organiza l’asociación Asina–Llangréu en collaboración con XEGA, COGAN y l’Ayuntamientu de Llangréu va poder visitase hasta’l próximu día 20 de setiembre en Ciañu.

Trátase de la segunda edición de la esposición colectivo itinerante PHOTOLES Lesbianes fotografiando lesbianes que l’asociación COGAN vien poniendo en marcha dende l’añu 2005 y que tien como principal envís el de consiguir la visibilidá lésbica. L’oxetivu de la esposición ye’l de dar amuesa de la riqueza y diversidá de la realidá lésbica, los sos matices y contrastes, amás d’ufiertar a les autores de les fotografíes un espaciu pa dar a conocer la so obra. La esposición PHOTOLES ye un certame que dende l’añu 2005 pon en marcha l’asociación COGAN y que percorriendo chigres, cafés, pubs, centros culturales, llibreríes y demás espacios fai visible la realidá lésbica.

Nueche Celta en La Felguera

2011-06-23T16:30:00.004+02:00

Con motivu de la cellebración de les fiestes patronales de La Felguera, San Pedru 2011, va cellebrase una nueche celta el domingu 26 de xunu, de magar les 23 hores, nel Parque Vieyu. Esto supón una novedá na programación de les fiestes felguerines, onde les charangues y les orquestes-pachanga veníen siendo la única banda sonora que se podía sentir a finales de xunu en La Felguera. La nueche celta ta entamada pola Sociedad de Festejos de San Pedro y sofitada pol Ayuntamientu de Llangréu. Esperamos que la xente responda, pa que nun se dexe de programar cultura asturiana nunes fiestes tan importantes como son les de San Pedru en La Felguera.

Nun escaecer tamién, la presentación videoclip Fiestes de prau del grupu Duerna, mañana a les 19:30 nel Cine Felgueroso de Sama.

Vídeu #acampadallangreu

2011-05-30T07:50:00.002+02:00

Si tas indignáu o indignada cola situación d'anguañu, si crees que nun somos mercancía en manes de políticos y banqueros, si te paez que la crisis tendría que pagala quien la causó, si tas fartuca o fartucu d'esta falsa democracia, si te paez que llegamos a una situación insostenible... Sal a la cai!

Pues dir a cualesquier de les acampaes que hai en dellos conceyos d'Asturies y participar activamente nes sos asamblees.

Concentración #acampadallangreu

2011-05-26T07:25:00.000+02:00

La xente que trabaya na #acampadallangreu na plaza l'ayuntamientu de Sama, ta entamando delles acciones sociales, charres y concentraciones. Los que nun podemos tar acampaos, tenemos que facer lo posible por sofitar de cualesquier forma. Una bona manera ye asistir a toles actividaes posibles.

Tola info, de los siguientes pasos a siguir, ta en:
http://acampanalon.wordpress.com/

Videu Manifestación pola Oficialidá 2011

2011-05-09T07:50:00.001+02:00

Otra vuelta más cumplimos col ritu, de la mani les lletres. El tiempu respetó y cumpliéronse tolos tópicos que se suelen dar nesti eventu. El futuru sigue siendo tan inciertu como tolos años anteriores que caleyamos pola cai Uría, pidiendo tener los mesmos drechos que'l restu los ciudadanos. Paez que ta a puntu d'entamar una nueva dómina políca n'Asturies, pero la situación llingüistica nun tien visos de meyorar. Sicasí, la sociedá astur, amosó una vegada más el so compromisu pa cola su cultura y la disconformidá cola situación de marxinamientu y allegalidá que vive anguañu la nuesa llingua.

Pa los que nun fuisteis, pa los que tais lloñe, esti videu val pa que sepais como foi. Pa los que fuisteis, val pa comparar si lo visteis de la mesma forma. Asina vivimos nós, la manifestación del 32 día de les lletres asturianes.

Güei como ayeri, Oficialidá pal asturianu!

V Edición Tolo d'Asturies 2011

2011-05-07T07:40:00.000+02:00

La edición d'esti añu de Tolo d'Asturies, será los díes 7 y 8 de mayu de 2011, na estación d'autobuses de La Felguera.

Sábadu 7 de mayu
Recintu ferial de la estación d'autobuses.

12 h. Apertura amuesa cultural Tolo d'Asturies.
12 h. Banda Gaites Conceyu Llangréu.
13:30 h. Jerónimo Granda.
22 h. CONCIERTU
Hector Braga + N'Arba + Los Berrones

Tol día:
Mercáu tradicional d'artesanía y gastronomía.
Feria del discu y del llibru n'asturianu.
Folixa y baille toos y toes con bandines tradicionales.
Animación con grupos de baille y música tradicional.
Talleres pa neñes y neños (animación, xuegos, artesanía y deportes tradicionales).

Domingu 8 de mayu

13 h. Banda de música.
13:30 h. Asturianada
18 h. CONCIERTU homenaxe a la tradición en la Pandereta.
Pandereteres de Fitoria + Les Filanderes.
19:30 h. CONCIERTU
Xuacu Amieva.

Tol día:
Mercáu tradicional d'artesanía y gastronomía.
Feria del discu y del llibru n'asturianu.
Folixa y baille toos y toes con bandines tradicionales.
Animación con grupos de baille y música tradicional.
Talleres pa neñes y neños (animación, xuegos, artesanía y deportes tradicionales).

21 h. Clausura de la V Amuesa Cultural Tolo d'Asturies de Llangréu.

Campaña en Twitter pola Oficialidá

2011-05-05T08:45:00.004+02:00

Dende fai unos díes y con motivu de la manifestación que va tener llugar nes cais d'Uviéu, esti vienres a les 19:30, la twittesfera n'asturianu ta movilizándose esparciendo los hashtag #oficialida y #asturianu cola fín de lleguen a ser Trending Topic. Esto ye, poner estes etiquetes ente les más nomaes del estáu dándoyos visibilidá sobre les miles d'etiquetes que usen al día nesta rede social. Ye cuasi una misión imposible, pero faciendo ruíu, algamamos que muncha xente d'otros pueblos y munchos asturianos tamién, se enteren que Asturies nun da cobertura llegar a la so propia llingua y que, dende fai más de venti años, hai un conflictu llingüisticu tapecíu polos medios de comunicación.

Por una vegada, usa tú a les redes sociales y esparce esta iniciativa, l'#asturianu tien que tener la #oficialida .

Da-y al Play el 6 de mayu

2011-05-03T07:15:00.000+02:00

El vienres 6 de mayu, a les 19:30, na Estación del Norte d'Uviéu, da-y al play una vegada más... movilízate!.

Vamos volver a demostrar que nun tamos d'acuerdu cola situación allegal de la nuesa llingua, que hai demanda social pa terminar con esta conderga a muerte. Vamos salir a la cai a dar otra llección de civismu, lluchando pol caltenimientu de la nuesa cultura. La protección de la nuesa llingua pasa por fuercia, pola aprovación d'una llei que la defienda, la caltenga y la promocione. Esa llei llámase OFICIALIDÁ.

Vémonos ellí!

Vídiu XXIII Conciertu pola Oficialidá

2011-04-18T12:44:00.003+02:00

Con pocos medios y con poques ferramientes, pero cola ilusión d'enseñar lo que foi el Conciertu pola Oficialidá de 2011 a los que nun pudieron dir. Cualesquier conciertu que fuera pola so 23 edición, sería noticia en tola prensa asturiana, pero esti non. Igual que la manifestación que va tener llugar el vienres 6 de mayu, a les 19:30 h. na Estación del Norte d'Uviéu. Son noticies que se tapecen polos medios de comunicación mayoritarios, pero anguañu, tenemos na rede una ferramienta afayaiza p'algamar que nun nos zarren nin la boca ni el pensamientu.

El 6 de mayu vémonos na manifestación d'Uviéu, pola defensa de la nuesa cultura.

Taller d'Instalación d'Ubuntu

2011-04-08T15:04:00.002+02:00

Si tabes pensando en camudar al software llibre, el 30 d'abril, na Fnac de Parque Principado, tienes una bona oportunidá. Piensa si quiés que'l to ordenador tea n'asturianu, funcione con software llibre y si tas fartu de fallos y virus.

Nós, ellí taremos... Ubuntízate!!

Primavera = Conciertos

2011-03-30T13:03:00.003+02:00

Llegó la primaverina col tiempu templáu, la sidre nuevo ta a puntu pasar de les pipes a los gargüelos y llegó tamién el tiempu de los conciertos. Cites anuales que lleven más de venti años cellebrándose.

La primer d'elles ye la XXIII edición del Conciertu pola Oficialidá onde Blima, Llangres, La Bandina, Toli Morilla, Misiva, K-Nalón, La Col.la Propinde y La Tarrancha van poner más d’ocho hores de música en direutu. El conciertu va a ser a les 19:00 hores del prósimu sábadu 16 d’abril, nes instalaciones de la Feria de Muestres de Xixón. La entrada ye de 8€ anticipada y 10€ en taquilla.

La Folixa na Primavera de Mieres, cellébrase esti añu, los díes 8 y 9 d'abril. Dempués de munches dudes y comentarios sobre si díbamos poder ver la edición d'esti añu, al final, cuatro grupos llocales van enllenar l'escenariu del parque Xovellanos de Mieres. Macadamia y Corquiéu van tocar el 8 d'abril y Blima y La Col.la Propinde el día 9.

Cursos d'asturianu en Llangréu

2011-02-18T13:12:00.003+01:00

El Conceyu Llangréu entama cursos de llingua asturiana de baldre. Unu ye de nivel d'aniciu y otru d'afondamientu. Los cursos van dase na casa la cultura de Sama, de llunes a xueves, de 19h. a 21h. El plazu de matrícula acaba el mesmu día qu'entamen los cursos, el 28 de febreru a les 19h.

Si quiés apuntate, pues llamar al teléfonu 984282925.

Tola información.

Semeyes del III Sidra&Blogues

2011-02-15T06:30:00.000+01:00

Pasó otra edición del míticu Sidra&Blogues y igual que la primera, nel añu 2007, tuvimos presentes. Tuvimos ellí, por una razón bien cenciella. Tenemos un blogue nuna llingua que ta en pelligru de muerte, intentamos actualizalu dacuandu, conectámonos a internet casi a diario y tamos al tanto de lo que pasa na bloguesfera y nes páxines que tan n'asturianu. Nun nos entra otra cosa na tiesta que, si se fai un actu d'esti tipu, intentar por tolos medios dir, por que ye la personificación d'una afición que nos lleva bien d'hores al cabu'l mes. Asina si se vuelve facer otra vegada, volveremos intentar tar presentes.

Por otru lláu, prestanos dicir que tenemos suerte de tener collacios y sobre too, tenemos suerte de tener collacios con talentu. Asina que nun queda más que agradece-yos la cobertura audiovisual que ficieron nesti III Sidra&Blogues.

Amás del vídeo, podeis ver la gallería de semeyes en: http://www.flickr.com/photos/sidrayblogues/

Vídeu Promocional III Sidra & Blogues

2011-02-10T06:02:00.000+01:00

Cartelu III Sidra & Blogues

2011-02-09T10:20:00.001+01:00

Ye la tercer vez que xente que fai blogues n'asturianu se xunta de forma organizada, pa falar y tomar daqué. Amás de conocer xente y poder falar de tolos temes que nos interesen, el sábadu 12 febreru en La Pola Siero, vamos poder asistir a un alcuentru blogueru, con charres, la entrega premios del meyor blogue de 2010 y una espicha, onde cada ún de los asistentes pue llevar daqué pa xintar, teniendo la bebida de baldre.

Vémonos el sábadu a les 17 h. na Casa Cultura de La Pola.

III Sidra & Blogues

2011-02-08T10:28:00.003+01:00

La Xunta de Blogues en Llingua Asturiana entama’l III Sidra&Blogues de la hestoria, too al rodiu de la bloguesfera n’asturianu. L’actu va cellebrase na Casa de Cultura de La Pola Siero, el sábadu 12 de febreru a partir de les 17.00 hores. Esti eventu va cuntar con:

· Charres:
o Presentación de Firefox 4, por Softastur.
o Un añu na rede de Ximiélga.me, por Mikel González
o Biblioteca virtual Mª Xosefa de Canellada, por Mar Martín

· Entrega de los premios a Blogues n’asturianu
o Meyor blogue por conteníu (según autores de blogues)
o Meyor blogue por diseñu (según autores de blogues)
o Meyor blogue (según llectores de blogues)

· Espicha nel Abre Cesar a partir de les 19.00 hores.

La Xunta de Blogues en Llingua Asturiana entamó’l I Sidra&Blogues nel 2007, depués el II Sidra&Blogues nel añu 2010 y agora'l III Sidra&Blogues pa dar conteníu y ambiente participativu y festivu al premiu al Meyor Blogue, que tamién va pola so tercera edición.

Agradecemos al so mediu qu’esparda esti llamáu col que convidamos a tol mundu, tenga o nun tenga blogue n’asturianu a participar n’él.

Los ganadores del meyor blogue

2011-02-02T12:57:00.004+01:00

Ya se espublizó el resultáu colos nomes de los ganadores del Meyor Blogue n'asturianu del añu 2010!

Na estaya de "Meyor Conteníu", el ganador ye... Fueya en Blanco.
Na estaya de "Meyor Diseñu", el ganador ye... González y González.
Na estaya del "Votu del Públicu", el ganador ye Conceyu Nacional de Liriu.

Norabona a los premiaos!!!

Amás d'esto, dende la Xunta de Blogues en Llingua Asturiana convídennos a asistir al III Sidra & Blogues que se va cellebrar enantes del 15 de febreru en La Pola, nel conceyu Siero. Como ya se fizo l'añu pasáu, nesti III Sidra & Blogues va a haber charres, la entrega premios del meyor blogue de 2010 y tiempu pa facer xuntanza al abellugu d'un chigre.

Terminaron les votaciones

2011-02-01T10:14:00.000+01:00

Ya terminaron les votaciones al meyor blogue n'asturianu de 2010. Inda nun se saben quién fueron los premiaos, por que hai que revisar los votos nulos, pero en un par de díes tará espublizao na páxina de les votaciones. Pa nós, los nomes de los ganaores ye lo de menos (será por qu'enxamás ganamos), lo importante y la capacidá organizativa y de movimientu que la nuesa cultura produz, al traviés de la xente que usa la llingua asturiana pa comunicase na rede. Lo importante ye que haya xente que entama esto y que otra xente-y dea sentíu participando y sofitándolo.

Un añu más, gracies.

Visita la páxina de les votaciones.

Escontra los despidos en Duro Felguera

2011-01-12T21:40:00.003+01:00

Una empresa más de la cuenca. La que lleva a La Felguera nel nome, la que nació a la oriella'l Nalón en 1858, la que sigui medrando na bolsa con ganancies millonaries y se esparció por mediu mundu, la que fizo multimillonarios a los dueños. Una empresa más que quier echar el pieslle en Llangréu, prexubilar de manera vergoñosa a los vieyos y echar a la cai a los mozos. Una empresa más que se xustifica cola crisis pa echar xente al paru col únicu enfotu de multiplicar le sos ganancies.

Duro Felguera, una empresa más... una empresa menos...

Manifestación el sábadu 15 de xineru nel parque vieyu de La Felguera de magar del 12 la mañana. Escontra los despidos en Duro Felguera. Llucha pol trabayu!!

100 blogues

2011-01-07T23:56:00.004+01:00

Tamos inmersos en plena votación, durante esti mes de xineru. La xente va sumando los sos votos, aunque entá hai tiempu y queden munchos díes. Esti añu nótase la participación de los llectores, medrando les visites a la páxina y la participación de la xente, al nun quedar arrequexao sólo a los y les blogueres.

Pese a los problemes que presentó la web los primeros díes, paez que ta too iguao, gracies al trabayu de la xente que se preocupó de poner too esto en marcha esti añu. Tanto los escritores de blogues como los llectores, tienen que pasar un cenciellu rexistru pa poder votar. Una vez votao, si tornen a entrar cola so cuenta, van poder ver los resultaos en toles estayes.

Tola información de les votaciones ta en:

La páxina de les votaciones

Twitter

Facebook

Fonte de la semeya

Votación Meyor Blogue 2010

2011-01-03T10:05:00.000+01:00

Ya tan abiertes les votaciones al meyor blogue del añu 2010. Esta ye la tercer edición d'estes votaciones que se afiten como una cita de vezu a primeros de cada añu. Nesta ocación, cambia la forma y el tipu de votación, dando-yos la pallabra a los llectores y xente que nun tien blogues, aunque se caltién la típica votación de los blogueros y blogueres. Les votaciones van tar abiertes hasta'l 31 de xineru de 2011 y puen facese calcando na dirección que vien darréu:

http://meyorblogueast.zobyhost.com/

Suerte a toos y toes, aunque nun teneis que escaecer que siempre que participeis, gana la cultura del nuesu pueblu y la resistencia ante los que nagüen por vela en nichu.

A votar!!

Queden pocos díes

2010-12-30T10:20:00.004+01:00

Queden muy pocos díes pa entamar a escribir una nueva páxina na hestoria de la nuesa bloguesfera n'asturianu. Una páxina que una vegada más, va necesitar del sofitu, l'andecha y la participación de toos y toes. Col nuevu añu, la bloguesfera en llingua asturiana llama a conceyu, enseñando al mundu la so vitalidá, la so capacidá d'organización y la determinación firme de llevar la llingua y la cultura d'un pueblu al llugar que se merez y non al nichu onde la quier meter la clas política d'anguañu.

Queden pocos díes...

Agora en Twitter

2010-11-09T12:05:00.000+01:00

Préstanos compartir la nueva cuenta de twitter de TrayasgayA. Les redes sociales nun son lo nueso, pero twitter vémoslo como un sistema de microblogues que amás de tar coneutáu con ximiélgame pue amestase al blogue tradicional, poro, faciendo un solu post pue apaecer espublizao en dellos sitios de la rede al mesmu tiempu.

La nuesa llingua sigue abriéndose camín, como fizo colos foros y los blogues, agora paez que-yos tocó a les redes sociales. Como Facebook danos noxu, cola so política d'apropiación de los conteníos de los sos usuarios, esti namás ye el nuesu granín d'arena a la normalización de la nuesa llingua nes redes sociales. Un bon sistema pa tener el blogue actualizáu ensin tantu trabayu.

Vémonos y lleémonos en twitter.

CAMINOS DEL MUNDU, TERCER ÁLBUM D'HÉCTOR BRAGA

2010-10-04T10:00:00.003+02:00

Grabáu y producíu íntegramente n'Asturies, va ser distribuíu por Algamar producciones.

Nel so tercer trabayu d'estudiu, Héctor Braga combina la so voz y los sos instrumentos (arpa, zanfoña, gaita, vigulín, chelo), con músicos d'otres escenes como rock, folk, pop o jazz. Baxos, guitarres, bateríes y pianos arropen la inconfundible identidá asturiana que Héctor representa, y llanza una innovadora propuesta de gran formatu. Ya a la venta n'internet y tiendes especializaes.

Más información:

www.musikaze.com/hector_braga
www.cdbaby.com/cd/hectorbraga2

Remocique de Llingua Blog [hestoria de la bloguesfera]

2010-09-27T09:10:00.000+02:00

Llingua blog ye la primer páxina tipu blogue que axuntó les rss de dellos blogues n'asturianu pa poder ver les sos actualizaciones cada vegada qu'espublizaben daqué nuevo.

Allá en setiembre de 2007 espublizábamos en TrayasgayA l'entamu d'esta páxina de sindicación de blogues. Nesi tiempu namás había un llistáu de nomes de blogues n'asturianu nomáu Directoriu LogAstur, que anguaño nun ta operativu. Foi entonces cuando conocimos lo que yeren los rss na Escuela de Seronda que se cellebró en Xixón, los díes 28, 29 y 30 d'abril de 2007. Esa foi la primer vez que delles persones que facíen blogues en lligua asturiana se xuntaben pa falar d'ello y pa sentir falar a otra xente llegaos de dellos puntos del estáu. Nuna d'eses charres explicose lo que yeren los rss y teniendo en cuenta que inda nun había na esi tema, aplicao a la nuesa bloguesfera, entamamos a caciplar con ello.

El resultáu foi Llingua blog una páxina que n'aquella época cubría un vacíu na nuesa bloguesfera. Fízose coles ferramientes que ufiertaba blogger y ensin tener munchos conocimientos. El principal fallu que tenía yera claru, les entraes más recientes nun se poníen na parte d'arriba y había que buscar les actualizaciones polos nomes de los blogues en vez de polos posts más recientes. Nun tardaron muncho en salir otres páxines de sindicación de blogues, feches con más medios, conociemientos y meyor resultáu. Al existir estes páxines con muncha más visualización, decidimos dexar Llingua blog como yera nun entamu, a modu de documentu gráficu de lo que foi la prehistoria de la nuesa bloguesfera, calteniendo los sos fallos y asina foi demientres dellos años.

Pero aprovechando les nueves ferramientes que blogger nos pon al alcance la mano, copiando delles de les ferramientes que facíen de wordpress el sitiu más completu (al nuesu entender) pa entamar un blogue, remocicamos Llingua blog, iguando dellos de los fallos del entamu y meyorando la visualización de les últimes entraes de los blogues que tenemos sindicaos al aparecer na parte d'arriba l'actualización más nueva. Sicasí, na parte d'abaxo siguimos calteniendo la versión orixinal de Llingua blog.

Tolivia Rural Jazz

2010-09-19T13:35:00.005+02:00

Tolivia entama esta nueche'l primer conciertu del so ciclu de Jazz. Los conciertos entamen güei, y finarán el 16 d'ochobre. La llocalidá llavianesa entama güei el festival «Tolivia Rural Jazz» cola actuación, de magar les nueve la nueche nel su centru social, de «Alfredo Morán Grupo» y «Mathew Simon».

«Jacobo de Miguel Trío», «Adrián Carrio Trío», «Jam Sesion» y «Mapi Quintana Grupo» completen el programa de la cuarta edición d'esti prestosu certame musical de Tolivia coles sos acutaciones el 2 y 16 d'ochobre a les 11 la nueche.

¿Descargo Firefox n'Asturianu?

2010-09-16T21:01:00.007+02:00

La xente de Softastur, dende'l so blogue tapaponga dieron anuncia va unos díes que ya ta disponible la versión del navegador Firefox en Llingua Asturiana y pue descargase de baldre.

Esta ye una d'eses hestories que nos presta esparcer por que supón el fín d'un trabayu fechu por xente anónimo ensin esperar nenguna compensación económica a cambiu y col únicu fín de caltener y promocionar la cultura la su tierra. Una de eses hestories que son tan escases anguañu. Por eso entre otres munches coses, merez la pena descargalu...

Descárgalu yá: http://www.mozilla.com/ast

La solidaridá del que menos tien

2010-09-09T09:02:00.000+02:00

Por razones que nun vienen al casu, llevamos unos meses metíos na organización d'un equipu de fúbol 7 que va entamar a xugar n'ochobre. A la hora de mercar les equipaciones, la xente mozo del equipu diose cuenta que tenía que facer un desembolsu importante de perres y planteose la necesidá de buscar un patrocinador que diera nome al equipu y estampara la so publicidá na camiseta. Los mozos entamaron a facer una campaña pa buscar una empresa, chigre o comerciu dispuestu a gastar 100 € y con eso, dar apoyu al deporte y la mocedá del conceyu. Mandáronse casi 100 correos elletrónicos, a parte de delles decenes d'intentos en persona y el resultáu foi tres correos contestaos explicando que nun podía ser posible por mor de la crisis, de los demás tamos esperando la rempuesta.

A base de muncho buscar, dos empreses llangreanes dixeron que sí faciendo un gran esfuerzu y dando un exemplu de solidaridá y altruismu. Nun son empreses grandones nin facturen millones a la selmana, pero los sos dirixentes son xente que piensa que la vida ye más que la pura rentabilidá.

Dende TrayasgayA queremos dar milenta gracies a la tienda de tatuaxes "Totem Tatoo" de La Felguera y a ETIMTA S.L. (escuela y taller de instrumentos musicales tradicionales asturianos) y esperamos que nel futuru, toles empreses grandones de la zona tomen exemplu, pol bien suyu y de toos.

Les imáxenes son propiedá de les respectives empreses.

I Troféu “CURRIVERÁS” de gaiteros/es mozos/es

2010-07-16T09:05:00.001+02:00

El Conceyu Cultural Curriverás, col enfotu de reconocer l´esfuerzu de los músicos más mozos que centren la so actividá na interpretación a la gaita asturiana convoca´l I TROFÉU CURRIVERÁS DE GAITEROS/-ES MOZOS/-ES.

Presta ver como la mocedá tien iniciatives como esta y ser organiza pa llevales alantre. Esta vegada ye en Barros, Conceyu Llangréu. Si tais interesaos nun dexar de lleer les bases y entrar nel so blogues. Dende TrayasgayA, el nuesu sofitu y la más sincera norabona por trabayar pola cultura'l país.

Equí podeis ver toles bases.

Y equí el so blogue: http://cuartetucurriveras.blogspot.com/

IV Concursu de Semeyes La Sidra

2010-07-07T12:53:00.002+02:00

Llegonos esta información al nuesu corréu trayasgaya[arroba]hotmail.com y préstanos esparcela pa que tenga la máxima participación y difusión posible.

BASES DEL IV CONCURSU DE SEMEYES LA SIDRA

1. Podrán participar toles presones (profesionales o aficionaos) qu’unvíen dalguna semeya dientru’l plazu siñaláu y nos soportes requeríos en ca casu

2. Namás podrán unviase semeyes rellacionaes cola sidre., la mazana o cualisquiera de los sos derivaos y conforme a les carauterístiques descrites nestes bases, siendo 5 el númberu másimu de semeyes presentaes por autor.

3. Nun entrarán en concursu infografíes, valorárase a les imaxes que representen el procesu fabricación y consumu la sidre en cualisquier aspeutu tantu dientru comu fuera d’Asturies.

4. Toles semeyes tendrán de remitise dientru’l plazu duración del concursu, de magar la so espublización na revista LA SIDRA (Ensame Sidreru) y fasta’l 1 de payares, nos soportes indicaos.

5. Les semeyes unviaránse en formatu dixital a la direición: infolasidra@gmail.com

6. Tendran remitise en formatu comprimíu en JPG y en tou casu con una resolución de 254 ppp y un tamañu de 50x70 cm, ensin marcos, tando la imaxe a sangre nel llienzu. Nel corréu tendrá figurar nome y direición del autor, nb. Teléfono y testu indicativu de pilpayu de semeya o semeyes.

7. Les semeyes tienen de ser necesariamente inédites, ello ye, nun tener ganao dengún otru concursu nin ser espublizaes en revistes, cartelos o folletos.

8. Un xuráu cualificáu formáu poles presones que designe LA SIDRA (Ensame Sidreru) seleicionará, ente les semeyes recibíes, les tres meyores.

9. LA SIDRA (Ensame Sidreru) reservase’l drechu a solicitar l’orixinal a los ganaores.

10. Les imaxes finalistes formarán parte de l’amuesa “Semeyes sidreres” que s’espondrá nel actu d’entrega de premios. Esta esposición podrá ser itinerante col oxetivu de da-y puxu la cultura asturiana de la sidre.

11. Ente les semeyes finalistes seleicionarán los tres primeros premios que tarán dotaos comu vien darréu:

1er premiu 600 € (500 € en metálicu y 100 € en llibros)
2u premiu 350 € (300 € en metálicu y 50 € en llibros)
3er premiu 150 € (125 € en metálicu y 25 € en llibros)

12. Los finalistes recibirán un diploma ya invitación a la espicha d’entrega premios.

13. Los premios a les meyores semeyes (previa comunicación per e-mail o teléfonu a los ganaores) fadránse públicos na revista LA SIDRA (Ensame SIdreru).

14. Les semeyes premiaes y una seleición de les meyores sedrán espublizaes na revista LA SIDRA (Ensame Sidreru).

15. Toles semeyes podrán ser espublizaes y nel so casu utilizaes por LA SIDRA (Ensame Sidreru), respetando’l so formatu d’imaxe y mencionando l’autor. La organización resérvase’l drechu d’espublización de les semeyes na revista, llibros y restu material que pudiere editar citando espresamente’l so autor.

16. El fechu de participar supón l’aceptación dafechu de les presentes bases.

I Romería de Primavera en Ciañu

2010-05-26T16:03:00.000+02:00

L’Ayuntamientu de Llangréu, en collaboración cola Asociación de vecinos S. Antonio de Ciañu, el Club d’Atletismu Lagueyu y la Escuela de Música Tradicional del AMPA del Conservatoriu Valle del Nalón organicen esta primer fiesta de primavera que va tener llugar en Ciañu’l próximu domingu 30 de mayu.

La Romería coincide cola primer carrera de Montaña Valle del Samuño Memorial Marcos Hernández y presenta una montonera actos que dende primer hora de la mañana’l domingu van llevar folixa y cultura tradicional per tol distritu llangreanu de Ciañu.

A les 9:30 hores, nel parque Ciañu, va tener llugar la salida la carrera, dempués habrá Alborada de gaita y tambor con desfile de cabezudos y xigantes y disparu de voladores. A les 11:30h van ponese talleres de baille a lo suelto colos monitores de l'Andecha Folclor d'Uviéu, y de xuegos tradicionales pa neños/es colos monitores d’ESPOR[A]. Dempués de recibir a los vencedores de la carrera va tener llugar la I Muestra de Cantares en Chigre coles Corales Santa Apolonia de Pañeda y José León Delestal. A les 14:00h y pa rematar los actos de la mañana va tener llugar la entrega Premios de la 1er Carrera Valle del Samuño Memorial Marcos Hernández. Yá de tarde, a les 17.30h, el parque de Ciañu va acoyer la ROMERÍA DE PRIMAVERA DE CIAÑU coles actuaciones de: Coru del IES de la Quintana, Profesores de la Escuela de Música Tradicional del AMPA del Conservatoriu “Valle del Nalón” (Anabel Santiago, Chus Solís, Héctor Braga, Pepín de Muñalen, Elías García, Chema Fombona y Pelayo Fernández) y l’"Ensame de Música Tradicional LLangréu".

Fonte: Serviciu de Normalización Llingüistica de Llangréu.

Mani de les lletres 2010

2010-05-08T15:39:00.008+02:00

Un añu más y esperamos que un añu menos, p'algamar la reconocencia total de los nuesos drechos como ciudadanos y pa se se asegure la continuidá de la nuesa cultura. La mani de les lletres de 2010 foi como les anteriores, pacífica, cívica y con más participación que nes dos últimes. Con determinación y casi ensin esperanza. Pero coles idees clares y la seguridá de lluchar hasta l'ultimu día pola defensa cultural d'un pueblu.

Enantes d'entamar la mani, cuando tol mundu va axuntándose delantre la estación, debaxo de los sos collores o aprovechando la cita pa saludar a esa xente que sólo ves nesti tipu de saraos, tolos años hai un momentu onde paez que nun va a haber tanta xente como otros años y que nesta ocasión la participación nun va responder.

A la hora de colocase y entamar a marchar pola Cai Uría, nun se sabe d'onde sal la xente pero casi siempre se algama enllenar tola Cai con un mosaicu de collores y glayíos. Esti añu la participación foi bien númberosa y quedó una marcha llarga y perguapa.

El Nuberu tuvo amenazante pero a la fín demostró que ta pola oficialidá, respetando la mani ensin descargar. Aunque de xuru que muncha xente del oriente y del occidente, que tenía que recorrer munchos kilómetros pa llegar a Uviéu, quedó na so casa al ver el día que taba faciendo.

Esta ye una esbilla de les semeyes que pudimos facer a les cabeceres. Demasiaes sigles y partíos pa un mesmu fín. A ver si llega el día que se pueda votar a toa esta xente, metiendo na urna una sola papeleta. De momentu, como fai más de venti años, siguimos lluchando pola oficialidá.

Mañana entama Tolo d'Asturies en Llangréu

2010-05-05T16:00:00.007+02:00

Otru añu más, y ya van cuatro, l'amuesa cultural Tolo d'Asturies convierte a Llangréu nel centru de referencia, durante cuatro díes, de la cultura y música asturianes. El conceyu Llangréu torna a sofitar en 2010 la cultura'l país con esti despliegue d'actividaes que van entamar esti xueves 6 de mayu cola inauguración oficial na Casa los Alberti de Ciañu a les 19:30h., y finar el domingu a les 19:00h. col homenaxe a la gaita asturiana na carpa asitiada na estación d'autobuses de Llangréu (al lláu del estadiu Nuevu Ganzábal). Ente mediu, música, puestos d'artesanía y gastronomía, actuaciones, feri del lliscu y del llibru n'asturianu y folixa asgaya.

A partir de mañana, vémonos en Llangréu.

Pincha equí pa ver el programa.

Pincha equí p'algamar más información.

Más borrachos que dinamiteros

2010-04-25T13:08:00.004+02:00

Por que les coses cambien irremediablemente y dir en determinaes direcciones ye más fácil por que son cuesta abaxo. Por que por más que nos estrañen o nos atristayen determinaes evoluciones, si miramos p'atrás, vemos con claridá el camín recorríu y la facilidá con que se fizo. Por que hai muncha xente que va col rebañu, tiren pa onde tiren. Por que ye un fechu que se afita cada vegada que tien oportunidá y nun paez que seya irreversible, quitando puntuales destellos de lluminosidá mental. Por eso en La Cuenca aguaño, somos más borrachos que dinamiteros.

Xune Presenta Rockmería en Llangréu

2010-04-19T16:42:00.003+02:00

El Centru de Referencia de la Cultura y la llingua asturiana Casa de los Alberti va acoyer el próximu martes 20 d’abril la presentación del llibru de Xune Elipe Rockmeria. L’actu va tener llugar a les 19:30 hores y s’enmarca dientro de les actividaes que l’Ayuntamientu de Llangréu pon en marcha pa celebrar el día’l llibru.

Xune Elipe, cantante del grupu asturianu Dixebra y director del sellu discográficu L´Agüañaz, va presentar en Ciañu, Rockmería (Publicaciones Ambitu), un llibru que, col sotítulu d’Un repasu a la música popular del sieglu XX, busca resumir las música más combativa y comprometida de la nuestra historia. Al traviés de les sos páxines, descúbrense estilos como’l folk-rock inglés, el ska xamaicanu, el raï de la Kabilia, el zydeco de Luisiana, el rock del este d’Europa, el Rock Bravú de Galicia, el Rock Radikal Vascu... y artistes y grupos que conformen un verdaderu universu sonoru representativu de la diversidá humana y cultural del planeta. Nél nun se van alcontrar productos comerciales prefabricaos, nin grandes éxitos: namás música sincera y auténtica fecha con actitú y rebeldía. Son soníos, estilos y propuestes que, dende un ámbitu local y ensin escaecer los sos raigaños (musicales o llingüísticos), supieron trescender más allá hasta convertise n’universales. Rockmería tien un carácter divulgativu, asequible pa toes aquelles persones que quieran adientrase per delles de les músiques populares más prestoses del sieglu XX.

Fonte: Serviciu Normalización Llingüística del Conceyu Llangréu.

Caciplando col Movie Maker

2010-04-06T13:22:00.001+02:00

Esti ye un vídiu que grabamos nel festival Tolo d'Aturies en La Felguera, Conceyu Llangréu, nel añu 2008. Va tiempu que teníamos pensao pone-y audio por que'l orixinal sentíase permal pola mala calidá de la cámara cola que se grabó. Ya habíamos sentío que'l windows movie maker yera bien cenciellu y afayaizu pa editar vídiu, pero enxamás nos habíamos puesto a caciplar con él. Polo menos, al final vese daqué...

Que nos perdonen lo linuseros, ubunteros y demás xente que llucha pol software llibre, pero cuando la incultura informática tien el nuesu nivel, ye lo que hai... ;-)

La Sanidá Pública y los Trabayaores

2010-03-29T09:12:00.003+02:00

Ta pasando una cosa increible col Serviciu de Salú del Pincipáu d'Asturies y los sos trabayaores interinos y eventuales. Pa trabayar nel SESPA, en cualesquier categoría, hay unes bolses de trabayu onde vas garrando puntuación segun vayas trabayando. Una vez a l'añu (o cuando-yos pete) actualícense los méritos y vas garrando una posición na bolsa de trabayu que te permite dir trabayando cada vegada más. La cosa mala d'esti asuntu ye que segun termines la to formación, pases años al paru por entrar na bolsa de trabayu del sistema públicu de salú asturianu col enfotu de que dalgun día llegues a tener los puntos suficientes pa poder trabayar de contínuo. Pola contra los tos compañeros que decidieron dir pa la privada, tan trabayando dende'l primer día, ensin más procesu de selección que tener un conocíu trabayando, ser muyer o tar dispuestu a trabayar en condiciones precaries.

Na última actualización de méritos que convocó'l sespa que ta abierta durante esti mes, sorprénden-nos cola noticia que puntua igual el tiempu trabayáu en hospitales públicos que en hospitales privaos del tipu "El Centro Médico" o la "Clínica Asturias", amás d'otros. Una bona forma de premiar a los cientos d'eventuales que lleven años chupando paru pa tar dipuestos a sacar les castañes del fuéu al SESPA nel mesmu momentu que los llamen, aunque seya con dos hores d'atelación y aunque tengan que dexar la so casa pa dir a trabayar a un pueblu del oriente, o a sitios tan dixebraos del centru d'Asturies como Ibias o Degaña.

Paeznos perbién que tengas una empresa privada y que vistas a los tos trabadores como a principiu del sieglu 20, pasandote pol forru la comodidá, ergonomía o hixiene. Nun nos paez tan bien que prefieras tener trabayadores d'un solu sexu en determinaes categories, por que eso ye discriminación, pero que la to empresa privada puntue na bolsa de trabayu de la sanidá pública igual que los hospitales públicos, cuando pasen esi tipu de coses y la selección de personal obedez namás a criterios personales (trifásicos y d'apunte dixital) y la puntuación de méritos nun ye recíproca pa con la rede pública de salú, cuando menos ye vergoñoso y inxusto.

Too esto pasa angüaño col Sistema de Salú Públicu d'Asturies, amás d'otres munches coses como zarrar plantes p'aforrar personal y tener a la xente ingresada en urxencies o en sales de corta estancia abiertes pa casos especiales o retrasar 2 meses el pagu al personal temporal y dexar ensin sueldu a milenta trabayaores. Lo que pasa ye que too esto nun sal na prensa, debe ser que nun interesa...

Nuna iniciativa ensin precedente, los y les trabayaores interinos y eventuales axuntáronse nuna asociación pa lluchar polos sos drechos ante la indefensión por parte de la clas sindical y los continuos ataques de la patronal "pública".

Ficieron un blogue: http://asevinse.blogspot.com/

Vídeos del II Sidra&Blogues

2010-03-15T08:21:00.000+01:00

Por fín ya tan editaos los vídeos que se grabaron nel II Sidra & Blogues. La calidá de la imaxe nun ye la que nos hubiera gustao pero sirven perbién como rexistru audiovisual de lo qu'aconteció en Ciañu el 20 de Febreru.

Hai que dar les gracies a Ricardo pol trabayu que fizo.

Nel blogue de les votaciones puen vese el restu de los vídeos, un total de 7.

El Sidra&Blogues na TPA

2010-03-01T08:00:00.000+01:00

Esta foi la noticia qu'espublizó la TPA nel so telediariu de les 14 h. del 20 de febreru de 2010. Foi una pena que nun pusieran tolo que se dixo, pero una noticia d'un telediariu nun da pa más y hai que confiar en que se faiga un bon resume. Quedámos colo positivo, que polo menos molestáronse en venir a grabalo y sacalo. Tamién foi una pena que les cámares de la TPA, al final nun asistieran a grabar el Sidra&Blogues.

Paecíanos importante grabar la noticia pa subila a la rede pa que quedara a modu d'archivu na rede. El problema yera que nun teníamos nin los medios nin los conocimientos pa facelo. Al traviés de youtube punsímonos en contautu colos usuarios Sanyallana y Alborecer, pidiéndo-yos el favor de grabalo y subilo a les sos cuentes. Los dos contestaron rápidamente y dellos minutos dempués d'emitise ya se podía ver nel youtube. Milenta gracies a los dos, asina da gustu.

Anxo Lorenzo en La Felguera

2010-02-24T08:01:00.000+01:00

El sábadu 27 de febreru a les 20:15 hores, el Nuevu Teatru La Felguera va acoyer la presentación del nuevu discu en solitariu d’Anxo Lorenzo. El músicu gallegu va tar acompangáu pa la ocasión pola so banda habitual, esto ye: Xosé Liz al bouzuki y la guitarra; Begoña Riobó al violín; Álvaro Iglesias al contrabaxu y Roberto Milla al bodhram. El so nuevu discu en solitariu ye una clara amuesa del trabayu d’Anxo Lorenzo, un nuevu conceptu de músicu que nunca nun ve barreres cuando esperimenta cola música tradicional y cola contemporánea y que tamién tien l’habilidá d’amestales suavemente pa convertir esta xunión en nuevos ritmos y melodíes vibrantes y fresques.

Anxo Lorenzo, gaiteru, compositor y productor del Grupu SPIRITU (986), tien consiguío la unánime alabanza de la crítica pola perfecta fusión ente tradición y modernidá, xuntando’l soníu de la gaita cola más vanguardista producción musical. La so música suena davezu nes televisiones y radios nacionales más importantes y utilizóse como sintonía pal Xacobeo 99 y programes de televisión como Luar, Galicia para el Mundo, Con Perdón y Os Tonechos; asina como pa documentales, publicidá y les bandes sonores de películes como El Gran Marciano y El Tuno Negro.

Semeyes del II Sidra&Blogues

2010-02-22T08:00:00.001+01:00

El II Sidra & Blogues ya ye hestoria y pasa a formar parte d'una páxina más del llibru familia de la nuesa bloguesfera. Podríamos facer un balance, valoraciones y sacar conclusiones, pero de xuru que nun díbamos a ser oxetivos, entós vamos dexalo pa otra xente. Lo que sí podemos dicir ye que nos prestó en forma. Una cosa que nos llamó l'atención sobre manera foi el repartu de tarees que se fizo ensin falar una pallabra. Cada ún sabía lo que tenía que facer, nun facía falta dicira nada, toos sabíamos cual yera l'oxetivu y onde se podía ayudar. Asina da gustu.

Vamos intentar axuntar toles semeyes del II Sidra & Blogues nuna gallería de Flickr. Si tienes dalguna semeya pues mandala al corréu trayasgaya@hotmail.com y pondrémosla na gallería. Podeis ver les semeyes en:

http://www.flickr.com/photos/sidrayblogues

Hasta otru añu... esperemos...

Entrevista pa la tpa

2010-02-19T16:07:00.004+01:00

Esta tarde a les 18 h. vamos facer una entrevista pa los informativos de la tpa. Recibimos la llamada ayeri y la idea ye entrevistanos falando del II Sidra&Blogues y de la blogosfera en xeneral. Dempués vamos dir a entrevistar a un blogueru delantre'l so ordenador trabayando col so blogue.

Préstanos que los informativos de la tpa se hayan puesto en contautu con nós pa da-y promoción a esti actu y se hayan interesao pol movimientu blogueru n'asturianu. Dixéron-nos que van llevar una cámara pa grabar unes tomes del II Sidra&Blogues. Too esto paez que saldrá nos informativos de les 14 h. de mañana sábadu 20 de febreru.

El Programa del II Sidra&Blogues

2010-02-15T08:00:00.000+01:00

Ya tenemos zarráu el programa d'esti segundu Sidra&Blogues. A les 17 hores la xente de la Escuela de Musica Tradicional de la A.P.A. del Conservatoriu Valle del Nalón va facer una actuación nel parque de Ciañu pa dir calentando motores y que la xente se vaya averando a la Casa los Alberti. Dende equí préstanos dar les gracies a la xente de la escuela música por ofrecenos el so sofitu y participar nel sidra&blogues de manera totalmente altruista.

De magar les 17 h. vamos facer la presentación del actu y dar pasu a les charres daes por David Guardado, Poli Mencía y marquinos. Dempués de sentilos falar y de les correspondientes tandes de preguntes, entamará la entrega del premiu al meyor blogue de 2009, segundu y tercer puestu y meyor diseñu.

Nesi puntu de la tarde llega'l tiempu de la sidra. Diremos a tomar unes botellines a un chigre del pueblu pa falar de forma más informal.

Asina que si el 20 febreru, sientes gaites nel parque de Ciañu, ye que'l II Sidra&Blogues ta a puntu d'entamar!!

Sobre'l Programa del II Sidra&Blogues

2010-02-10T01:47:00.004+01:00

Paez que ya tenemos el programa zarráu de lo que va a ser el II Sidra&Blogues. En pocos díes sacaremos a la lluz, horarios, ponentes y conteníos. Sólo esperamos que nun haya cambios d'última hora, por eso entá nun espublizamos na definitivo, por que cuando lo faigamos, esperamos nun tener que facer nengun cambiu.

Otra cosa que nos tien intrigaos ye l'asistencia de xente. Nun entamu teníamos miéu que la poca asistencia deslluciera l'actu. Pensábamos en facelo nuna sala pequeña pa que nun quedara desanxelao. L'otru día nuna de les reuniones pa preparar l'eventu entamamos a cuntar cuanta xente sabemos de xuru que van asistir y ente los premiaos, blogueros colos que tenemos rellación y conocíos, enseguida llegamos a 15 persones.

Esti ye un bon sitiu pa dicinos si vas dir al II Sidra&Blogues y poder facenos una idea de la cantidá de xente que nos vamos xuntar.

Declaraciones p'Asturies.com II

2010-02-08T15:43:00.003+01:00

L'añu pasáu votaron 41 blogues. Nuna segunda edición de les votaciones, lo rialmente importante paeznos afitase y crecer, cosa que pasó colos 52 d'esti añu. Hebo una participación bona en relación col númberu de blogues que pue haber na nuesa blogosfera. Esto nun quier dicir que namás tengamos 52 blogues activos, de xuru que hai munchos más. Estos 52 son los que tan activos nel ampliu sentíu de la pallabra, los que se actualicen periódicamente, pero que amás, tan sollertes de lo que pasa na bloguesfera y participen d'ella, perdiendo'l tiempu en mandar unes votaciones a un corréu, d'un proyeutu col que ganamos toos. Pa fomentar les votaciones y llegar al mayor númberu de blogues posible, dedicámonos a dexar mensaxes en tolos blogues n'asturianu qu'atopamos pola rede, sicasí, hai dellos blogues de los que nun tuvimos rempuesta, aunque tienen una gran actividá d'actualización... ye una pena.

A mediaos d'esta selmana espublizaremos los ganadores na páxina de les votaciones y dempués pondremos tolos resultaos de los blogues que tuvieron dalgun votu. Viendo los primeros puestos paeznos que la xente votó conteníos orixinales y de calidá, bien lloñe del copia y pega y del actualizar a lo lloco. Tamién ye verdá que muncha xente votó por afinidá personal política o temática. Los tres primeros puestos tan bien diferenciaos. El ganador tien 14 votos de diferencia pa col segundu y esti 9 pa col terceru.

Paeznos perimportante que los tres ganadores vayan el día 20 de febreru a Ciañu al II Sidra&Blogues. En breve, pondrémonos en contautu con ellos pa verificar la so asistencia. Dellos blogueros ya nos avisaron que van dir al Sidra&Blogues, la verdá ye que esperamos que la xente se anime y participe, por que esi va ser el verdaderu varemu pa saber si el Sidra&Blogues foi un éxitu o non.

Siguimos trabayando nel alcuentrua pa conseguir ponentes, aunque la verdá ye que la xente collabora asgaya los problemes vienen por horarios de trabayu y compromisos personales.

Dende equí animamos a tola xente que fai blogues n'asturianu a participar d'esta folixa bloguera ensin precedentes n'Asturies.

Declaraciones p'Asturies.com

2010-02-02T01:07:00.002+01:00

La idea entama en xineru de 2009, onde dende'l blogue TrayasgayA entámase la primer edición de la votación al meyor blogue de 2008. Ensin nengún precedente nin experiencia, veíamos les votaciones como otra forma de xunir la comunidá bloguera, de facer ruíu, pa que'l mayor númberu de persones supieran que hai xente que se dedica a facer blogues n'asturianu y qu'encima, tienen la organización y la iniciativa necesaria pa entamar esti tipu de coses. Yera otra forma d'interactuar ente nós y de conocenos. Esti añu nun teníamos nidio si díbamos facer les votaciones por dellos motivos, pero llegáron-nos correos entrugando y animándonos a siguir coles votaciones y dempués de pidir ayuda a la rede, hebo xente que nos ofreció el so trabayu, sacando alantre un proyeutu inda mayor que'l que teníamos na tiesta.

El programa vamos dir desvelándolu nesti mes qu'hai hasta'l 20 de febreru. La razón ye que tenemos delles persones apalabraes pa dir a falar, pero tan pendientes de temes llaborales y nun queremos dicir mentires anunciando lo que nun ye. Si too sal bien, habrá tres charres curties. Una sobre la rede y los blogues, otra presentando ún de los últimos estrenos na rede n'asturianu, y otra dando anuncia a otru proyeutu que ta por salir próximamente. Les tres tarán feches por xente perinteresane a la que de xuru-yos podremos entrugar sobre munches otres coses. Si hai tiempu fadrémos tamién una mesa redonda, pa que tolos blogueros y blogueres que vayan, tengan la pallabra. Ensin escaecer la entrega premios que saldrá como resultáu de les votaciones al meyor blogue 2009. Hasta esi puntu ya habremos terminao colos blogues y sera'l tiempu de la sidra.

Cuando Ricardo Candás y yo, entamamos a da-y forma a esta idea, pusímonos en contautu con Eloy Antuña, responsable del Serviciu de Normalización Llingüística de Llangréu. Nun ye la primer vegada que falamos con él d'un tema paecíu, lo que pasa ye que nel pasáu la cosa nun pudo salir alantre, pero siempres nos mostró una predisposición inmeyorable. La collaboración ye total y la verdá ye que presta cuando la xente de la que dependes pa entamar esti tipu de coses, involúcrase, echate un gabitu pa sacar el trabayu alantre y búscase la vida pa tener tol material necesariu. Nun ye cuestión de facer la pelota, por que nun lo necesitamos, pero hasta agora el sofitu del Conceyu Llangréu al traviés d'Eloy Antuña, ye inmeyorable.

La diferencia col primer sidra&blogues ye importante, por que la propia bloguesfera ye diferente, el momentu ye diferente y nós tamién. Aquel primer sidra&blogues foi la primer toma de contautu d'una comunidá moza, muncho más inocente si se pue dicir, inclusu, como fai poco la nomaba Poli Mencía de Pingarates más adolescente . D'aquella teníamos la sensación que nos conocíamos toos y podíamos pone-y cara a tolos blogues, inclusu numeralos. La xente facía blogues a nivel personal, yera una época más casera y ensin intereses antroxaos. Lo que se lleía yera lo que se quería dicir y nun había dobles personalidaes, segundes intenciones nin blogueros fantasmes. Una de les coses que se falaron entós, yera'l monotematismu de la mayoría de los blogues, cosa qu'anguañu, paezme que ta más que superada. Güei ye más difícil saber cuántos blogues hai, cuántos tan operativos y de quién ye cada ún. Hubo xente que se dió cuenta del poder de la rede y de la influencia popular de la bloguesfera y apuntose al carru, sumando, pero tamién camudando el xeitu del movimientu. La edá media de los y les blogueres xubió en forma y por fín xuniéronse dellos escritores na nuesa llingua, dando rempuesta a aquella idea de Próspero Morán onde camentaba que na bloguesfera yera imprescindible que la xente qu'escribe n'asturianu, tuviere espacios propios.

Aquel primer sidra&blogues organizose de forma muncho más cenciella. Dempués d'una mani n'Uviéu pola oficialidá, un 24 payares, cuando se organizaron les marches caleyando dende dellos puntos d'Asturies. Nun había un guión nin un programa. Namás yera una excusa pa venos y charrar. Nesta segunda edición, la cosa ta muncho más ellaborada. Tamos ante un alcuentru blogueru con entrega "premios" embaxo'l nome de 2º Sidra&Blogues. Hai un conceyu que sofita l'actu y delles organizaciones como softastur y Xareos! xestión cultural que nos echen un gabitu regalándonos detalles pa dar na entrega premios. Les votaciones y los quiciavis mal nomaos premios, nun son más qu'otra excusa pa siguir faciendo ruíu y moviéndonos. Ye una páxina más na breve hestoria d'una comunidá onde los blogues más vieyos tienen ente tres y cuatro años.

Too esti xaréu entamámoslu nós, non por ganes nin ansia de protagonismu o manipulación, sinon por que daquién lo tenía que facer. Hai ya munchos proyeutos na rede n'asturianu, pero'l 90% tan entamaos poles mesmes persones y hai que da-yos descansu. Aunque nun tengamos munchos conocimientos n'informática, nun ye difícil ser creativu y entamar proyeutos nuevos pa que la comunidá siga medrando, entá queden munches coses por facer. Por too esto, encamentamos a tola xente que fai blogues na nuesa llingua, a la xente que tien curiosidá de cómo ye esti mundu y a los que-yos presta sofitar iniciatives pa caltener la nuesa cultura en xeneral, a que pasen el día 20 de febreru pola casa los alberti de Ciañu, nel Conceyu Llangréu. Por que'l 2º Sidra&Blogues ta fecho por blogueros y pa blogueros, ensin más intención nin oxetivu que siguir promocionando la nuesa llingua en toles estayes.

II Sidra&Blogues

2010-01-25T07:04:00.001+01:00

El sábadu 20 de febreru, de magar les 17 h. na casa los Alberti, nel parque de Ciañu, Conceyu Llangréu, la comunidá bloguera n'asturianu tien la segunda cita oficial de la so hestoria. Esti segundu Sidra&Blogues naz a raiz de les votaciones al meyor blogue n'asturianu de 2009. La idea d'entregar premios o detalles de reconocimienu a los que salgan ganadores de les votaciones, complétase cola idea d'un alcuentru blogueru, teniendo en cuenta el vacíu que hubo dende'l I Sidra&Blogues de payares de 2007. Dende esi tiempu nun hubo munchu movimientu como comunidá o grupu, sacantes una mesa redonda en L'Arribada col correspondiente vídiu grabáu pal progama "nós" de la tpa y poco más.

De los alcuentros casi siempres salen otros proyeutos, conozse xente y siempre te pues enterar de daqué. La idea ye que'l 20 febreru nos veamos tolos blogueros y blogueres del país en Ciañu, poder asistir a una charra sobre la rede y l'asturianu, una presentación d'una de les últimes novedaes na rede y la presentación d'un nuevu proyeutu que va asoleyase dientro poco. Si tenemos tiempu una mesa redonda ente los asistentes y dempués entregar los premios a los meyores blogues de 2009. Dempués d'eso, vendrá'l tiempu de la sidra, indispensable pa falar y compartir idees de forma afayaiza, n'algun chigre de la zona. Nun damos los nomes de los ponentes entá, por que dellos tan pendientes de temes llaborales que nun podrán iguar hasta última hora.

Esta idea nun ta etamada por nengun grupu lliterariu, nin partíu políticu, nin agrupación de nengún tipu. Ye'l resultáu de la xuntanza de dellos blogueros a nivel individual con ganes de facer coses pa que la bloguesfera n'asturianu siga puxando. Esto nun va tener sentíu ensin l'asistencia de tola xente que fai blogues na nuesa llingua, por que pa ellos ye. Dientro de munchos años, vamos poder dicir que tuvimos nel segundu Sidra&Blogues de la hestoria d'Asturies, que foi en Ciañu, Llangréu y que la bloguesfera siguió na llinia que lleva na rede, demostrando compromisu, capacidá de trabayu y al marxe de lo que digan les mentes pensantes del país, dando-y vida a l'asturianu.

La primer rede social n'asturianu

2010-01-10T22:49:00.003+01:00

Acaba de ver la lluz la primer rede social en llingua asturiana, ximielgame.net de la mano d'Altuxa.com. Como inda ta en prebes les invitaciones pa probala sólo se van mandar a los blogues que hayan participao na votación al meyor blogue y que rellenen esti formulariu. Un pasu más na normalizacion de la nuesa llingua na rede, que naz del duru trabayu de xente anónimo que trabaya tolos díes pola so cultura ensin esperar na a cambiu.

Actualidá sobre les votaciones

2010-01-06T13:20:00.002+01:00

Hasta agora un total de 22 blogues ya mandaron les sos votaciones. De momentu, los votos tan bien repartíos ensin que ningún blogue se despegue de la tiesta.

Préstanos aclariar que la puntuación que se da con 1 puntu, ye na más pola estética del blogue. Esta puntuación sumarase al total pa esbillar el meyor blogue, pero dará llugar a una mención especial, esbillando tamién al blogue con meyor estética o diseñu.

Aunque mandamos dellos correos a varios medios informativos d’Asturies, pocos fueron los qu’espublizaron esta iniciativa, asina que si tienes la posibilidá, encamentámoste a movelo pa que se entere el mayor númberu de xente posible.

Nos díes que vienen darréu, vamos tener dellos alcuentros pa sacar alantre algun proyeutu que tenemos asociáu a la votación al meyor blogue y a la comunidá bloguera en xeneral.

Tai sollertes…

Entama la votación al meyor blogue 2009

2009-12-31T23:02:00.000+01:00

A partir d'agora y hasta el 31 de xineru queda abiertu'l plazu de votación al meyor blogue en lllingua asturiana de 2008.

Pa coordinar esta votación estrenamos un sitiu web:

http://www.votalmeyorblogue.webcindario.com/

diseñáu por Ricardo Candás y un corréu elleutrónicu:

votalmeyorblogue@gmail.com

que ye a onde hai que mandar los votos. Nesta páxina puen lleese les bases onde se pue atopar dalgun cambiu comparando cola votación del añu pasáu, como la votación al blogue con meyor estética, diseñu o imaxe.

Amás de la xente que trabayó pa desendolcar esti proyeutu y la que va trabayar pa coordinar les votaciones, too esto nun existiría ensin la xente que (mal)gasta parte del so tiempu nuna cosa tan marxinal y friqui, como ye facer un blogue nuna llingua que dicen que nun existe y ensin les blogueres y blogueros que reconocen el trabayu fechu y sofiten esti proyeutu mandando un corréu a votalmeyorblogue@gmail.com cola so votación.

La imaxe ye un diseñu de González y González.

Habrá votación al meyor blogue 09!

2009-12-30T21:11:00.004+01:00

Dempues de pidir ayuda a la rede, la bloguesfera n'ast respondió y gracies al gabitu de dellos collacios, tamos trabayando pa entamar la votación al meyor blogue n'asturianu del 2009. Comparando cola votación del añu pasáu, va a haber dellos cambios, que esperamos sean pa meyor. Un sitiu nuevu onde votar, un corréu nuevu y una sistemática nueva. Esperamos que tola xente que tien un blogue en llingua asturiana pase y dé el so votu. Amás tamos en trámites d'intentar sacar alantre dalguna sorpresina más...

Esti añu la cellebración d'esta votación nun podía haber llegao a ser posible ensin el gran trabayu de Ricardo Candás y l'altruista collaboración de González y González y Marquinos

La nuesa intención ye sacar a la lluz la páxina de les votaciones alrodiu el 1 xineru si too va bien, pa que se pueda votar durante tol mes de xineru y sacar los resultaos nel mes de febreru.

Tar sollertes.

dudes cola votación blogue 09

2009-12-25T20:17:00.003+01:00

Acabamos de recibir un corréu entrugando si vamos a entamar una votación al meyor blogue de 2009.

L'añu pasáu foi la primer vegada na hestoria que se facía esta votación. Al final, el balance foi más que positivu, al votar más de cuarenta blogues diferentes y tener un bon seguimientu y rempuesta por parte la nuesa comunidá bloguera. Les conclusiones d'esa votación puen vese equí. y tola votación nel blogue que se fizo pa la ocasión.

Teníamos pensao que fuera la primer votación de munches otres, pero la verdá ye qu'esti caberu añu, pasaron munches coses y nun tenemos el tiempu llibre que teníamos enantes y que ye necesariu pa entamar estes hestories, lo que se ve reflexao nes actualizaciones del nuesu blogue y na iniciativa pa entamar nueves idees.

Sicasí danos pena qu'esta iniciativa muerra y quede na anécdota d'un añu aisláu na hestoria la nuesa bloguesfera. Asina que nos próximos díes vamos pensar si entamamos la votación de 2009... Si dalgunu o dalguna tien tiempu pa echar un gabitu, agradezse y sabemos de xuru qu'ente tres persones, esto faise cola gorra...

Duerna, nuevu folk del nalón

2009-12-13T20:24:00.003+01:00

El grupu Duerna, procedente de la cuenca’l Nalón, ta acabante de sacar la so primer maqueta titulada “Dende’l chigre”. Duerna nació a finales del pasáu añu 2008, con una formación na que l’armónica y les composiciones propies garren especial importancia. El so repertoriu ta basáu en pieces pa baillar (muñeires, tangos, llixeros, sones d’arriba, rumbes, xotes...etc).

La maqueta grabóse a lo llargo la seronda nos estudios Luna Music de Llugo (Llanera). Ta compuesta de cuatro temes, instrumentales y cantaos, nos que podemos sentir tanto composiciones propies como igües de pieces tradicionales. Nel myspace del grupu (www.myspace.com/duerna) pue vese un videu promocional y oyer d’algún tema. Contactu nel telefonu 627 386 217.

Los mélicos vieyos y la xubilación forzosa

2009-12-08T15:25:00.006+01:00

Hai un revuelu ente la clas médica que trabaya na sanidá asturiana, dende fai dellos meses. El Sespa propon retirar a 1.511 profesionales sanitarios, d'ellos, 331 facultativos, nel plazu de seis años.

Los mélicos nun quieren retirase, pero nun ye por dedicación nin por amor al trabayu o a los pacientes. Les perres y l'estatus faen qu'ancianos que ronden los 70 años tean escondíos poles redes de la sanidá cobrando sueldos millonarios. Al pensar en too esto, vienme a la mente la hestoria de la fábrica de quesos. Si tú tienes una empresa de facer quesos con otros tres collacios y toos cobrais 10 €, pue ser qu'el direutor de la empresa cobre 15 €. Pero a poco llistos que seais, en vez de nomar un direutor, podeis nomar a un xefe de sección, por exemplu de la sección de "Alimentación y extracción de llechi", que tamién cobrará 15 €, otru será'l responsable de la sección de "Curáu y empaquetamientu del quesu" que tamién cobrará 15 € y otru l'encargáu de la sección de "Venta y transporte de los quesos" que cobrará lo mesmo. Si sois más llistos entá, metereis a trabayar a xente mozo, con capacidá pa trabayar munches hores con un altu nivel d'atención, con capacidá de resolución de problemes y con capacidá d'aprendizaxe de les nueves téuniques de fermentación de los quesos. Esta xente mozo, como nun tien antigüedá nin complementos especiales cobren 8 €.

Pero como sois vieyos, nun podeis quedar de nueche a atender les oveyes (menos los que tengais munchu focicu y nun querais renunciar nin a un céntimu) y negareisvos a facer guardies na quesería, pero tar tranquilos que si faceis 10 quesos más a la selmana, cobrareis más o menos lo mesmo. Si la cosa va bien y sois reconocíos dientro'l mundu'l quesu, podeis llegar a les 10 de la mañana, metevos nun despachu mientres otros faen los quesos, a lleer el periódicu y marchar temprano a tomar el vermú, por que de tarde teneis que trabayar na quesería privá que teneis en casa.

Esto ye una cuestión de perres, como too. Es Sespa sabe que xubilando a la xente de mayor edá, aforra munches perres, por que son los que más cobren, bien por el cargu que tengan o pola antigüedá, amás al camudar la llei, aprovechen pa meter otros cambios en favor de la empresa.

Al xubiláu, sólo-y queda espatuxar metiendo miéu a la población, por mediu del sindicatu mélicu y el colexu de mélicos, anunciando l'apocalipsis de la sanidá por falta de mélicos, aunque igual yera una bona oportunidá pa que tornara tola xente que tuvo que marchar de casa pa poder trabayar en puestos rellacionaos cola so formación o pa formar a los profesionales que tan equí. Pero caro, esto ya tenía que haber entamao va tiempu, pa que la xente que quedara pudiera sustituir al xubiláu y ésti nun se garre a l'actividá llaboral col argumentu de que "nun hai naide que faiga esti trabayu y teo que quedar hasta los 70 pa formar a compañeros que nun saben".

Anda, que nun hebo tiempu ni na...

Pero bono, tener en cuenta qu'esto na más ye una opinión y la hestoria de les oveyes, na más un cuentu que me contaba mio güelu de guah.e. Ca ún ye soberanu y dueñu de les sos conclusiones y opiniones... igual que vós.

La noticia en El Comercio.

La noticia en La Nueva España.

L'Encierru en La Felguera

2009-12-05T00:33:00.003+01:00

El Nuevu Teatru La Felguera va acoyer, güei vienres 4 y mañana sábadu 5 d’avientu, l’estrenu de la obra L’Encierru. Esti estrenu coincide cola entrega de la medaya de plata que l’Ayuntamientu de LLangréu concede al Grupu Teatru Kumen pola so trayectoria enriba les tables, más de 20 años de trabayu y 50 obres de teatru estrenaes.

La obra L’Encierru tien llugar nos primeros años de la transición, cuando un grupu sindicalistes pertenecientes al comité nacional d’una organización sindical, decide encerrase nun pozu mineru pa denunciar una serie problemas esistentes nel sector. Cuando tán baxando pel planu inclináu que comunica col pozu, los guardies xuraos corten la lluz, polo que tienen que percorrer un buen cachu’l camín a escures. Esti ye l’empiezu l’espectáculu que güei vienres 4 y mañana sábadu 5 estrena’l Frupu Teatru Kumen nel Nuevu Teatru La Felguera, la obra va empezar a les 20:15 hores.

L’Encierru fala de les hores vivíes por unos sindicalistes mineros dientro un pozu’l Valle’l Nalón. L’encierru llévenlu a cabu pa forzar una negociación sindical cola empresa tres dellos meses de fuelgues y movilizaciones; y cuenta les rellaciones personales que surdieron ente los sindicalistes y cómo la so cultura sindical llega a condicionar les sos vides y les de tolos de la so rodiada. L’Encierru tamién cuenta cómo s’incorporaron les muyeres un mundu tan machista y lo difícil que-yos fue sobrevivir nél.

FICHA ARTÍSTICA L’ENCIERRU

Matías: Cos Cueva Álvarez
Luisín: Ernesto González Argüelles
Pedro: Chus Prieto Pedregal
María: Laura Suárez Martínez

FICHA TÉCNICA L’ENCIERRU

Títulu: L’Encierru
Testu orixinal: Jose Ramón López Menéndez
Dramaturxa, dirección y puesta n’escena: Jose Ramón López Menéndez
Ayudante de dirección: Paula Moya García
Traducción al asturianu: Eloy Antuña Zamarro
Diseñu y realización de vestuariu: Azucena Rico
Diseñu y realización d’escenografía: Teatru Kumen/Nuria Trabanco Franco
Diseñu d’illuminación: Ángel Díaz Iris
Diseñu Gráficu: Marcelino de la Fuente
Fotografía: Pablo Iglesias

La $GAE y la tradición

2009-11-19T13:14:00.005+01:00

La selmana pasá la Sociedad General de Autores y Editores (SGAE) reclamaba al Ayuntamientu de Cabranes 7.500 euros por una serie d'actuaciones musicales cellebraes nesti municipiu ente los años 2002 y 2008. De momento, el resultáu tendrá qu'esperar al xuiciu, que se va cellebrar el próximu 30 de payares.

Segun Héctor Braga: el problema de fondu ye que na SGAE nun se controla debidamente lo que cualquiera rexistra. Nun ye ético valese d'un material ayenu pa lluéu recibir compensación. Nun ye llícito pintar la fachada d'una catedral y que lluéu el pintor cobre entrada. Nun ye ético qu'un cocineru cobre drechos cada vez que otru ponga l'aceite a la mesma temperatura qu'él pa facer una tortiella de patates. El músicu tradicional ta al serviciu de la música qu'interpreta, y non por ello ye menos profesional que cualesquier.

Tola noticia en lva.

Llangréu entama la wikipedia minera

2009-11-15T23:37:00.004+01:00

L'Ayuntamientu de Llangréu impulsa la primer rede social n'internet vinculada de forma específica a la minería. El proyeutu «Archivo Histórico Minero» quier desarrollar una gran fondu documental sobre'l sector extractivu con imáxenes, testimonios y archivos sonoros en dellos idiomes pa que puedan ser consultaos na rede por toes aquelles persones que lo deseen. L'oxetivu ye que sean los propios usuarios los que aporten los sos documentos y los «suban» a la páxina web. Un equipu d'expertos sería l'encargáu de recoyer, clasificar y catalogar los documentos recibíos de los usuarios.

Anguañu, ya ta en marcha una web que sería l'entamu de la futura rede social sobre la minería. Esta plataforma dixital, http://www.archivohistoricominero.org/, muestra a los internautes un total de 400 imáxenes aportaes por 70 fotógrafos e investigadores de les comarques carboneres, una pequeña selección de les más de 10.000 que componen el fondu documental del proyeutu.

Equí la noticia en lne.

Homenaxe a Nuberu en Llangréu

2009-11-05T12:59:00.006+01:00

Vienres 6 de payares a les 11:00 hores, nel Centru de Referencia de la Cultura

y la Llingua Asturiana Casa de los Alberti de Ciañu.

L'Ayuntamientu de Llangréu organiza y acueye un actu de distinción y reconocencia a la la trayectoria del grupu musical Nuberu. Nesti actu, l’Academia de la Llingua Asturiana va facer un homenaxe a Nuberu, historia viva de les cuenques, en reconocencia al compromisu d’esti grupu musical pa cola cultura popular y la llingua asturiana, amás de pol altor de la so contribución al caltenimientu de la identidá del pueblu asturianu.

Talu actu va tener llugar el vienres 6 de payares a les 12:30 hores nel Centru de Referencia de la Cultura y la Llingua Asturiana Casa de los Alberti de Ciañu.

Nuberu, 30 años ya llovió

2009-10-07T19:00:00.006+02:00

Esti miércoles 7 d'ochobre va tener llugar la inauguración oficial de la esposición Nuberu, yá llovió: 30 años d'Historia. La esposición va poder vese en Ciañu, na Casa los Alberti, del 7 d'ochobre al 11 de payares.

Dempués de trenta años enriba los escenarios, Nuberu despidióse de los escenarios en 2008. A lo llargo del añu, un númberu cada vegada mayor de siguidores del grupu contribuyeron colos sos personales tributos pa facer a Chus Pedro y Manolo una despidida a lo grande. Nuberiegos d’enantes y d’agora xuntáronse pa compartir alcordances, idees, canciones ya imáxenes, nun se perdieron conciertu nengún y ficieron de la despidida de Nuberu una fiesta compartida que continúa en 2009 cola esposición Ya llovió. Trenta años de Nuberu. Por muncho que lloviera dende 1978, bien xuntos, trenta años caben nuna esposición. Esti ye l'enfotu de Yá llovió. Trenta años de Nuberu: un repasu n'imáxenes y soníos pela trayectoria del grupu musical Nuberu. Pero l'amuesa tamién ye un percorríu per trenta años esenciales de la historia d'Asturies, nos que les canciones de Chus Pedro y Manolo pasaron de ser la banda sonora de la transición a convertise nun patrimoniu cultural. Una historia nel tiempu y más p'allá.

Fonte: Serviciu de Política Llingüistica del conceyu Llangréu.

Sarcasmu Llangreanu

2009-09-05T00:39:00.003+02:00

Sobren les pallabres...

Carrerona Sidrera 2009

2009-08-31T21:15:00.003+02:00

Oxetivu: conseguir andar toles sidrerías de la Villa n'una nuechi. Espectáculu garantizáu. Xente ensin 'fondo físicu' abstenese.

BASES:

-Pa la participación nesta CARRERONA SIDRERA VILLAVICIOSA 2009 ye recomendable haber participao nes ediciones anteriores o, nel so defectu, alguna preba del circuítu sidreru oficial, talque Festival de la Sidra de Xixón, Fiesta la Sidra de la Villa, Festival de la Sidra de Nava, o daqué asemeyáu qu’aseguren en cierta midía una forma física a l’altura del prestixu del eventu y que permita completar el circuitu previstu tiesos/es y con dignidá.

-Pa dáse por completáu’l circuítu ye obligatoriu beber como mínimu UN CULÍN de sidra en CADA ESTABLECIMIENTU. El/la que nun cumpla con esta condición, veráse allugáu/ada a les disposiciones sancionadores que’l restu participantes decidan, col consiguiente riesgu pal ‘infractor/a’ teniendo en cuenta que les condiciones ‘humanes’ y humanitaries van dir empeorando a midía qu’avanza la preba.

-Pa minimizar daños, antes d’escomencipiar la preba y de llánzase a beber culinos como topineros/as, cada participante forrará l’estómagu col correspondiente güevu cocíu que-y será facilitáu pela organización. Amás, hai previstes delles paraes técniques pa la cosa de la xinta o l’avituallmientu, sin perxuiciu de lo que nel discurrir de la preba los/es participantes decidan.

-Col fin d’evitar pérdides humanes, o humanos perdíos, los/es participantes dirán identificaos con una camiseta de color verde col dibuxu oficial de la preba y col so nome. Amás la organización dará a caún y caúna un mapa col itinerariu. RECOMIÉNDASE ENCARECÍAMENTE MEMORIZÁLU ANTES D’ENTAMAR A BEBER.

-Sicasí lo anterior, na midía lo posible, los y les participantes mantendránse xuntos y en grupo, sobre tóu una vez te avanzáu l’itinerariu y les condiciones de la preba (y de los/es participantes) entamen a tornase más dures. Si pese a tóu algún/a s’estravia perehí, recomiéndase siguir la primer persona que topemos con una camiseta verde: nun aseguramos cientu por cientu que seya participante de la CARRERONA, pero les posibilidaes aumenten abondu si la persona en cuestión escora pelligrosamente pa los llaos y va falando daqué asemeyáu al checu.

-La CARRERONA daráse per finalizada en cuanto que se tenga sellu y/o firma de tolos establecimientos visitaos nesta mesma acta.-LA ORGANIZACIÓN NUN YE RESPONSABLE DE LESIONES, ACCIDENTES Y ‘EFECTOS COLATERALES’ DERIVAOS DE LA PARTICIPACIÓN NESTA CARRERONA. CÁUN Y CAÚNA QU’AGUANTE LA RESACONA COMO PUEDA Y SIN QUEXASE…COMO UN PAISANU COÑO!!

-La participación nesta CARRERONA conlleva la aceptación de les presentes bases.

Operación Pandemia: la gripe A

2009-08-25T17:43:00.007+02:00

Dicen qu'esti vídiu nun va durar muncho colgáu na rede, por que ye un d'esos tesmimonios que muestren verdaes incómodes. Cada vegada qu'hay una guerra, un atentáu o una pandemia, llama l'atención que siempres hai un tresfondu económicu que benificia, irónicamente a los mesmos. Si non, les muertes pasen ensin pena nin gloria, como ye'l casu d'África. Nel primer mundu, hai la ventaxa de que la manipulación mediática y el miéu fai el mesmu efeutu qu'un golpe d'estáu estratéxicamente sovencionáu en cualesquier pais del tercer mundu. L'oxetivu ye provocar que muncha xente quiera lo que tú vendes.

Ehí teneis la rede pa comprobar tolos datos que da el vídiu. Namás hai un error cuando fala de la "Campaña de vacunación masiva contra la gripe porcina del año 2009". En rialidá faise referencia a la campaña de vacunación masiva escontra la gripe porcina del añu 1976 que tuvo como resultáu múltiples muertes y parálisis.

Ca ún que saque les sos conclusiones...

Selmana de Músiques

2009-08-19T09:27:00.002+02:00

Esta ye una bona selmana pa la xente que-y preste la música de raigañu, de baldre y que tenga tiempu, nesti mes d'Agostu pa poder disfrutar d'ella.

Güei entama el novedosu festival Xixón 5º40'. Esta primer edición pretende ser l'entamu d'una cita afitada na programación estival de Xixón. Ente dellos actos qu'integren el progama, vamos poder disfrutar de conciertos de nivel internacional y actuaciones a lo llargo'l día por delles llocalizaciones de Xixón. La cultura atlántica llega a la capital de la costa verdi de la mano de la conceyalía de cultura tradicional y llingüa asturiana del ayuntamientu Xixón.

Pue vese'l programa enteru y tolos detalles na páxina del festival.

Po otru lláu, Baiña, cellebra el so festival + o - celta esti Vienres, con un cartel formáu por «Dixebra», «Llangres», «Patriband Folk Orl.lestra» y Anabel Santiago.

Actualizaciones nel blogue de Compra Venta

2009-06-30T18:28:00.002+02:00

A día de güei, acabamos de facer delles actualizaciones nel nuesu blogue de compra venta. El fechu de qu'entá esista esti blogue ye casi un milagru, por que ya van delles vegaes nes que nos plantegamos piesllalu debío a la poca participación de la xente. Un blogue de compra venta ensin ánimu de llucru vive exclusivamente de los productos que la xente nos manda al corréu trayasgaya[arroba]hotmail.com, ensin los cuales, nun esistiría práuticamente. Dende que entamó el blogue en agostu de 2006, espublizmos dellos anuncios de coses vien estremaes, tantu pa mercar como pa vender, pero la mayor parte les veces, yeren de xente allegao que nos lo dicía de pallabra.

El blogue sigue na mesma llínia, pero con casi tres años d'esistencia, danos pena piesllar ún de los blogues más vieyos, entá n'activu y el que camentamos ye'l primer y únicu blogue de compra venta en llingua asturiana. La blogosfera n'asturianu tien un públicu bien reducíu de llectores y si lo extrapolamos a esta fastera de la compra venta, sacamos les mesmes conclusiones o entá menores, pero a día de güei, hai novedaes nel nuesu blogue de compraventa.

Si tienes daqué pa mercar, vender, regalar o dar n'adopción, mándanos un corréu a trayasgaya[arroba]hotmail.com

Podeis visitalu pinchando equí.

Llangréu Suena

2009-06-27T15:56:00.003+02:00

Nel entamu de 2009 ñaz Llangréu Suena, una organización xuvenil llangreana, col fin de plantegar alternatives al ociu en el nuesu conceyu. Ante la nula presencia d'actividaes culturales y programación musical de los grupos de música mozos, del conceyu y d'alrodiu, esta organización entama el so segundu festival, coincidiendo coles fiestes San Pedrines de La Felguera. Esti nun ye'l primer festival de música alternativa qu'entamen, ya que'l 28 de marzu pasáu tuvo llugar el I Polution Fest nel club xuvenil de Villa.

Los conciertos van cellebrase na estación d’autobuses de La Felguera el vienres 26 y sábadu 27 de xunu, de magar les 19:30 hores.

Más info en fnast.net.

Enllaz al blogue de Llangréu Suena.

Edubuntu en Llangréu

2009-06-19T00:34:00.002+02:00

La Casa la Cultura de Sama acueye la presentación de la versión n’asturianu d’Edubuntu.

Softastur, en collaboración col Ayuntamientu de Llangréu, presenta esti vienres 19 de xunu dende les 18:00 hores la versión de software educativu y n’asturianu d’Edubuntu. Edubuntu ye una distribución del sistema operativu GNU-Linux que s’empobina a escolinos y escolines de 3 a 18 años puesta en marcha internacionalmente por prestixosos educadores y tecnólogos.

Edubuntu ye una derivación oficial de la distribución Linux Ubuntu, destinada pal so usu nel ámbitu escolar. La meta fundamental d’Ubuntu ye proporcionar al educador, con conocimientu técnicu limitáu, habilidaes pa instalar un llaboratoriu de cómputu pa dempués poder alministralu ensin necesidá de mayores conocimientos específicos. Edubuntu busca llograr una xerencia centralizada en configuración, usuarios y procesos, xunto con una instalación pa poder trabayar en collaboración en clase. Igualmente tien como meta recopilar el meyor software llibre y con fines educativos. Edubuntu ye una ferramienta más que demuestra que la enseñanza col asturianu como llingua vehicular ye posible.

Esta iniciativa parte de Softastur, una plataforma ensin ánimu de lucru formada por programadores, alministradores de sistemes, profesores y traductores en llingua asturiana dedicada a la traducción y desarrollu de software llibre n'asturianu. Aprovechando la ocasión de la presentación d’Edubuntu va facese una preba de clase n’asturianu en dellos niveles y asignatures.

Art Nalón 2009

2009-06-12T09:34:00.004+02:00

Ya ta abiertu’l plazu de presentación a los certámenes del programa cultural ArtNalón qu'entama l'Ayuntamientu de Llangréu. Esti añu, el Art Nalón 2009 incluye concursos en dellos campos, como: artes escéniques, fotografía y curtiometraxes. Les obres podrán presentase siguiendo les bases hasta'l día 21 d’agostu.

Les bases de tolos concursos equí.

La dificultá de votar a UNA en Llangréu

2009-06-07T15:36:00.003+02:00

Casi tolos años pasa algo raro coles papeletes d'UNA, el día les votaciones, nel conceyu Llangréu. L'añu pasáu pudimos comprobar como había delles aules de votación onde les papeletes de tolos partíos taben desprecintaes y les d'UNA seguíen coles brides de plásticu a les 11 la mañana, imposibilitando garrar una ensin que tolos presentes se enteraran de a quién dibes votar. Una vecina del conceyu tuvo que pedir un cuter pa romper les brides ella mesma.

Esti añu nel distritu llangreanu de La Felguera, un votante averose a la so mesa pa exercer el so drechu al votu. Al nun atopar papeletes d'UNA nin dientro, nin fuera de la cabina, miró nel aula d'al lláu pa ver si les teníen y vió un monton d'elles nes mesmes proporciones que les de los demás partíos. Garró un puñáu y foi al aula onde taba la so mesa. Entrugó a la xente de les meses si nun había papelestes d'esi partíu, ya que tuvo que dir por elles a la clas d'al lláu. Llevantose la presidenta d'una de les dos meses y un representante políticu ensin identificar, que lluéu supimos que yera del PP. Ente los tres nun atoparon les papeletes, pero la presidenta sacó un acta del xulgáu onde se dicía que la UNA había presentao papeletes n'asturianu y que nun taben homologaes, polo que ella entendía que nun valíen y los votos diben ser nulos. El votante enseñó les papeletes de la otra clas que taben redactaes nun perfeutu castellán. Dixéron-y que igual eses papeletes les habíen sacao a posteriori y que nun diben valer, pero que ante la duda diba facer una llamada de teléfonu pa comprobalo. Dempués de dellos minutos esperando al teléfonu a la espera de recibir información de cómo proceder, respuenden-y que pare la votación y espere otra llamada, por que si les papeletes en castellán valen, nun tuvieron enriba la mesa dende'l entamu la votación.

La presidenta diz que se tienen que parar les votaciones hasta nuevu avisu, col correspondiente acumulamientu de xente y la situación tensa que nesi momentu había nes dos meses elleutorales con toles mirades (de representantes de les meses y vecinos) apuntando al votante que namás quería exercer el so drechu en igualdá a tolos demás. Al ver la situación, el votante, que ya había introducío la so papeleta ensin saber si yera válida o non, diz que va colar del colexu y que tornará dempués pa saber en qué quedó la cosa.

Cuando se atopa na cai, a cien metros de colexu, apaez el representante socialista diciendo que ya apaecieron les papeles y que taben enriba la mesa. El votante extrañase que apaezcan xusto nel momento nel que abandonó la clas y el representante políticu retruca a la defensiva, diciendo que "no pensarás que la pusimos nosotros, a nosotros que más nos dá". El votante, con una sensación de tar, efeutivamente nun colexu, pero non en temes ellutorales precisamente, acompaña al representante políticu hasta l'aula pa ver que les papeletes taben na mesa. Al entrar atópase coles votaciones reanudaes y con el representante del PP, entá sin identificar, que vien ellevando'l tonu de voz y diciendo: "antes de montarla, mira bien!!", "Lo primero que dijiste fue que lo había que impugnar!!", pallabra qu'enxamás salió de la boca del votante en nengún momentu. El votante ante los ataques del representante popular y la mirada de los vecinos dixo que lo primero que fizo foi entrugar si había papletes d'esti partíu, entós foi cuando se llevantó la presidenta de la mesa y el propiu representante del PP y ente los tres nun les atoparon, aunque agora tuvieren en mediu la mesa, perfeutamente visibles. Sí ye verdá que pudieron tar ehí dende'l entamu, pero tapecíes con una tacu de papeletes d'otru partíu, lo que sigue siendo una irregularidá.

Dempués d'esta discusión y de que la presidenta de la mesa llamara l'atención a los representantes del PSOE Y PP y al votante por falar acaloradamente en tonu altu, ante la xente que siguía votando, el votante dicidió colar, al ver que nun diba a sacar na en claro y encima lu habíen acusao con coses como: "cómo sabemos que no fuiste tú el que quitó las papeletas" o comentarios como "bueno, hombre, si no había papeletas hasta ahora y ya las hay, ya está solucionado, ¿no?". Mientres el votante colaba, el representante del PP pidió-y unes fríes disculpes.

Amiguinos, paez que nel 2009 la democracia nun ye igual pa toos y realmente ye percomplicao votar a UNA en Llangréu.

xunidá y elleiciones

2009-06-05T19:43:00.005+02:00

Llega otra vegada más la folixa del xuegu democráticu, aunque na versión más descafeiná que pue ufiertar. Esta versión ye la de les elleiciones europees, onde se decide a que xente se yos va pagar una temporada de viaxes y fartures, too ello condimentao con un sueldu d'espatarrar (como pal gobiernín pero a nivel européu...). La xente asturianista llamentase como otres veces por nun tener una opción xunitaria y el día dempués del escrutiniu verá les ilusiones polos suelos y plantegarase si merez la pena emplegar el votu nel ideal románticu de ser fiel a unes idees abocaes al fracasu elleutoral, dixebraes en miseries de 500 o 1000 persones que piensen como tú el día la votación. Por que de xuru qu'eses persones, el día dempués nun piensen toes igual, tres del mazazu moral que vien siempres detrás.

La cosa va meyorando, por que onde fai años había más partíos, esta vegada, los votos asturianistes, van esparcese ente tres partíos (¿qué-y pasó a la uras-pas?) y eso falando de xente asturiano, ye bien poco. Toos sabemos que la xente atrai a xente y que un sólu partíu siempres taría más cerca d'algamar dalgún conceyal nes municipales o'l soñáu diputáu nel gobiernín. Incluso nos llegó'l rumor fantasma qu'aseguraba que la situación política d'anguañu del asturianismu taba fríamente calculada y sabiamente subvencionada por representantes de partíos mayoritarios a los que-yos interesa que les coses sigan asina y nun se asoleye un movimientu nacionaliegu con represantación política. Nesta vida ye too posible, dende les conspiraciones na solombra, hasta les payes mentales de dalgún illumináu que-y presta inventar guiones policiacos y d'espíes.

Sicasí, el día del escrutiniu siempres nos quedará la resignación de la dixebra política, esi ye'l únicu responsable del númberu irrisoriu de votos. ¿Imaxinais que tolos partíos asturianistes se axuntaran nuna coalición y el númberu de votos siguiera siendo'l mesmu qu'anguañu tienen por separao?, esi día nun diba a haber resignación posible nin na a lo que-y echar la culpa. La desilusión y la frustación diba a ser criminal, quiciavis definitiva. Asina que pensándolo bien, igual tamos meyor asina, teniendo daqué tan nidio a lo que-y echar la culpa.

Fai tiempu falaba con un collaciu sobre cuál sería la solución a los enfrentamientos y les postures irreconciliables de los partíos asturianistes. El mio collaciu díxome que tendríen que morrer tola xente que ta agora nesos partíos y ñacer una nueva xeneración d'asturianistes cola mente clara y les idees non viciaes. Agora pienso que nun tenía razón, por que hai coses que se van traspasando de unos a otros, como herencies mentales y la xente mozo pue tener odiu a una determidada cosa por un fechu puntual que pasó ente dos paisanos, onde se fraguó una enemistá personal, el mesmu día que'l rapaz mozu dexaba de cagar nel pañal pa entamar a facelo nun orinal de plásticu.

A vegaes paez que tamos dando vueltes a lo mesmo como un burru nuna noria, caminando pa nun atopar el final del camín. Sicasí, el domingu 7 de xunu, volveremos a malgastar el votu, p'arrepentinos al día siguiente. Ye asína, que vamos facer...

Info sobre les elleiciones.

Entama Tolo d'Asturies 09

2009-05-12T23:14:00.003+02:00

Esti xueves 14 de mayu entama l'amuesa de cultura asturiana Tolo d'Asturies. Esti añu, cola so tercer edición, Tolo d'Asturies afitase como la gran feria d'asturianía de la Cuenca del Nalón. Exposiciones, charres, cursos, actuaciones, conciertos, puestos, artesanía, feria del discu y del llibru, talleres pa neños y neñes, gastronomía, deportes tradicionales y muncho más.

Tolo d'Asturies ye una amuesa cultural asturiana patrocinada pol Ayuntamientu Llangréu y la Conseyería de Cultura y Turismu del Principáu y organizada pola Agrupación d'Etnografía y Folclor "Reija" de Llangréu. Esti gran proyeutu entamó, fai agora tres años, al presentar la idea, xente del grupu Reija, al ayuntamientu llangreanu, tres quedar un furacu na programación del conceyu, pola desparición de la Feria d'Abril Sevillana que se facía anualmente na estación d'autobuses. Aprovechando'l sofitu de l'ayuntamientu, el Grupu Reija dexó de organizar el so Festival del Folclor pa entamar el primer Tolo d'Asturies. Agora dempués de tres ediciones, ye tiempu d'afitase y demostrar que la xente quier disfrutar, aprender y participar de la so propia cultura.

El programa y tola información.

V Mercáu tradicional del valle del nalón

2009-05-08T00:09:00.002+02:00

Durante los díes 8, 9 y 10 de mayu el pueblu de sienra va a reslladase n’el tiempu (1850-1920), onde tendrá llugar un mercáu de los d'enantes. El pueblu transformarase y, casi por arte de maxa, podremos disfrutar de la vida tal como yera visitando la escuela, la casa tradicional, col so llar y la so habitación, el colmau, el chigre, la barbería, el llavaeru, …. Y como tamos de mercáu nun puen faltar los mercaderes y artesanos qu’amás de vender los sos productos, mostrarán el qué facer de los sos oficios, tales como: panaderu, queseru, zapateru, alfareru, carpinteru, talla de piedra, modistes y bordaores, la sanadora, artesanos de azebache y plata, y munchos más.

El pregoneru recorrerá el pueblu anunciando los actos que van tener llugar y dará d’alguna noticia interesante. Por cualquier rincón podremos alcontranos colos Señores , el siñor cura, la parexa la guardia civil, la llavandera, el ganaderu coles vaques, el buhoneru cola so mercancía, el copleru ciegu, el bandurrieru y los guajes que venden El Filandón (el periódicu del Mercáu). En cualquier momentu podremos disfrutar del son de la gaita y el tambor, y de los bailles, cantares y xuegos del Grupu Folclóricu “Blimea”. Y munchu cuidau al escurecer, que los trasgos puen cambianos daqué de sitiu, les xanes puen volver llocos a los homes o la güestia pué intentar
llevanos.

PROGRAMA

VIENRES 08 DE MAYU

DÍA DE LOS ESCOLINOS
A les 10:00, estruendu de volaores anunciará el entamu del V MERCÁU TRADICIONAL VALLE’L NALÒN. Inauguración coles autoridades del Ayto. de Samartín del Rei Aurelio. Que van dar pasu a distintos personaxes de la dómina interpretaos po’l grupu teatru’l “REFAXU” y el grupu teatro “LA CASCAYA”.
A les 11:00, actuación de títeres, magos, malabaristes que se encargarán de recibir a los escolinos de toa asturies que vienen de visita.
De 12:00 a 14:00 y de 17:00 a 20:00 xuegos pa neños ( rana , aros, boliches, chapes, zancos, llave…)
A partir de les 17:00 la bandina “LOS DEL ORICIU FRESCU” van acompañanos no que queda de día colos sos sones.
A les 17:00 actuación de malabares cola Cia. DE CIRCO “EL ÑERU LOS CORÍOS” y el mago “MARIO LARREA”.
A les 19:00 actuación del grupo folcloricu Blimea na so sección infantil en cualquier rincón de Sienra, darréu fadrán la so actuación los mayores del “GRUPU FOLCLÓRICU
BLIMEA”.
A les 20:00 cantares nel chigre del mercau a cargu del coru “ SAN ANDRÉS” de L’entregu.
A eso del escurecer, nueche máxica onde van visitanos los personaxes de la mitoloxía asturiana ( paparrosoya, cuélebre, nuberu, trasgos, xanes…)
Pa finar el día, na plaza del pueblu vamos echar unos bailes amenizaos pola bandina.
“LOS DEL ORICIU FRESCU”.

SÁBADU 09 DE MAYU

DÍA PA MERCAR
A les 12:00 apertura del mercáu con estruendu de volaores y el son de la gaita y el tambor.
A lo llargo del día vamos poder ver muestres d‘oficios en vivo en los puestos del mercau, y ver tratos de ganao, y dalgunes ocurrencies intepretaes polos grupos de teatru’l “REFAXU” y “LA CASCAYA”, los dos de Blimea.

A partir de les 12:30 vamos sentir los sones de la bandina “LOS DEL ORICIU FRESCU” per tolos rincones del mercau, acompañándonos hasta finar el día.
A les 13:00 cantares de les PANDERETERES DE XIXÓN nel llar.
A les 18:00 los neños del “GRUPU FOLCLÓRICU BLIMEA” van a invitamos a xugar, baillar y canciar con ellos.
A les 18:00 toparemos per cualesquIer rincón del mercau a les “PANDERETERES DE XIXÓN”.
A partir del les 20:00 nel chigre del mercáu cantares de chigre a cargu del coru “SAMARTÍN” de sotrondio.
A les 19:00 los malabares de la CIA DE CIRCO “ EL ÑERU LOS CORÍOS” y el mago “MARIO
LARREA” van a entretenemos coles sos mañes.

Al escurecer un estruendu de volaores de luz, collor y soníu van a despertar a tolos seres mitolóxicos que nos visiten nel mercáu. Dempués del fueu vamos poder baillar y canciar cola bandina, nel chigre’l mercáu.

DOMINGU 10 DE MAYU

ROMERIA N’HONOR DE LA VIRXE DE LOS DESAMPARAOS DE SIENRA.
A les 11:00 la alborá de la gaita y el tambor anunciará el entamu del día y, comu tolos díes, los personaxes de los grupos de teatru EL REFAXU Y LA CASCAYA, van facenos pasar un bon día.
A les 12:30 salida de la procesión n’honor de la virxe los desamparaos dende ‘l Miramar, acompañá pola gaita y el tambor y los cantares del ramu a la patrona de la fiesta.
A les 13:00 misa na capilla sienra
Al finar la misa puya’l ramu y darréu baille a lo suelto na plaza’l pueblu. Amenizáu pol Grupu folclóricu Blimea.
A les 17:00 representación d’una obra teatru costumista a cargu del grupu teatro ‘EL REFAXU.
n’acabando’l teatro pasacalles de la Bandina’l grupu folclóricu blimea, hasta finar el mercáu.

El textu fízonoslu llegar xente del grupu folklóricu Blimea.

Más info en http://www.gfblimea.blogspot.com/

Manifestación pola Oficialidá

2009-05-07T23:08:00.003+02:00

El vienres 8 de mayu a les 18 hores, na estación de la Renfe d'Uviéu, la xunta pola defensa de la llingua asturiana convoca la mani de les lletres del 2009 col llema "agora tenemos la pallabra". Dempués de la mani, va facese el tradicional actu de l'academia de la llingua. Esperamos que seya la más multitudinaria de la hestoria, aunque los medios de comunicación tradicionales se enfoten en tapecelo y nun da-y repercusión.

Mira tolos detalles.

Conciertu Alfredo González en La Felguera

2009-05-06T10:17:00.011+02:00

Sábadu 9 de mayu a les 20:15 hores. Preciu: 4 €. Nuevu Teatru La Felguera.

El próximu 9 de mayu, dientro de la programación d’Encuentrautores09, Alfredo González va actuar en Llangréu. El Nuevu Teatru La Felguerá va acoyer un conciertu d’esti cantautor turonés que nel añu 2008, cola publicación del so primer trabayu n’asturianu “La Nada y tu”, tien ganao una montonera premios (Premiu al meyor cantar en llingua asturiana08 por el cantar “La nada y tu; Premiu de la Crítica de la RPA al Meyor Discu d´Autor, por La nada y tu; Premiu Amas al Meyor Lletrista; Premiu AMAS al Meyor Videoclip, por “El último taxi” de Sr. Paraguas).

Alfredo González tien grabaos hasta la fecha dos discos en castellán: “La vida de alquiler” (autoedición, 2003) y “Dudas y precipicios” (DFX Records, 2003). “La nada y tu” (Ámbitu/L’Aguañaz, 2008) ye’l so primer trabayu n’asturianu. “La nada y tu” ye un discu ente’l pop y la música de cantautor nel que’l cantautor de Turón indaga n’asturianu nos territorios del amor y de la muerte. Nesti trabayu Alfredo trabaya con testos propios y otros d’autores asturianos, poniendo música a poemes d’Antón García, Pablo Texón y Xandru Fernández y otros.

“La nada y tu”, canción que da títulu al últimu discu d’Alfredo González ye un tema que’l turonés compunxo sobre un poema d’Antón García. “La nada y tu” ganó’l Premiu al Meyor Cantar en Llingua Asturiana 2008 y con esti tema Alfredo González va representar a la música asturiana na próxima edición del festival Liet Ynternasjionaal qu’esti añu va tener llugar na ciudá frisia de Ljouwert/ Leewarden (Países Baxos).

El textu ta sacáu de la nota prensa de la oficina de política llingüistica de Llangréu.

Quinta temporada de Camín de Cantares

2009-04-27T22:07:00.004+02:00

El nuesu collaciu, Xose Anton Ambás, fainos llegar información sobre la nueva temporada del exitosu programa de la tpa, Camín de Cantares:

Esti sábado entamó la quinta temporada de "Camín de cantares", trece capítulos nuevos qu'entamen col programa dedicáu a Benina Quilo, una muyer de noventa y abondos vecina de La Ren na parroquia de Cardo, conceyu Gozón. Ye una mina del repertoriu de Peñes mal estudiáu y poco conocio. La reellaboración va facela TUENDA tocando dos xirandiyes del repertoriu de Benina.

Nel blogue folkenlared, podeis ver esti capítulu enteru.

Crónica del Conciertu pola Oficialidá

2009-04-26T20:27:00.005+02:00

Pasó'l conciertu pola oficialidá del añu 2009, dempués de 21 años que se entamara'l primeru. La sensación que nos quedó dempués de tar ellí foi la gran asistencia de xente. Nun sé si esa sensación ye rial, pero paecionos qu'hebo muncha más xente que otros años y que tol mundu permaneció na carpa dende que tocó'l primer grupu hasta que fino'l caberu. La organización por parte de los componentes de la Xunta foi impecable, amosando la experiencia de años anteriores.

La fórmula de los dos escenarios funcionó perfeutamente, faciendo'l cambiu de grupos dinámicu y ensin cargar a la xente. La única anécdota foi el fechu de marchar la lluz al final del caberu cantar de Dixebra. Nun supimos la causa, aunque notros conciertos que tuvimos y pasó daqué asemeyao, foi por que dalgun llistu intentó sabotiar el cuadru de la lluz pa facer una graciosá. Aunque nesti casu nun sabemos si foi asina. Al quedar a escures y sin música, la xente y los propios componentes del grupu Dixebra, aprovecharon pa cantar los clásicos llemas pro-oficialidá, nos escasos minutos que tardó en tornar la lluz.

Llama l'atención lo entregada que tuvo la xente baillando con tolos grupos y la presencia de mocedá, de toa condición y estilu, que acompañaben a les cares clásiques d'estos eventos. Dellos grupos llamentaron siguir tocando pola oficialidá y naguaron por que, pa otru añu se entame'l primer conciertu DE la Oficialidá.

VII Alcuentru de Pandereta Gallega ya Asturiana

2009-04-23T22:02:00.004+02:00

El sábadu 9 de Mayu va cellebrase por sétima vez la convivencia astur-galaica alrodiu la pandereta. L'alcuentru será, como ye vezu, en El Sabil, nel Conceyu de Santu Adrianu. Contarase cola participación dos grupos de cantu tradicional: -Veña que vai! (O Morrazo-Galiza) y Pandereteres de Nerbia (Asturies). El preciu, incluía cena-confraternización; dormir nel albergue y l'almuerzu, ye de 35 €.

Les inscripciones realizaranse direutamente nel albergue El Sabil: tlf. 985 761 472. http://www.elsabil.net/

El Rei y la Cuenca

2009-04-17T20:02:00.005+02:00

El Rei d'España vino a Llangréu a ver el centru de formación d'HUNOSA. La Cuenca ya nun ye lo que yera, pero a vegaes sigue demostrando que equí pasaron coses y piénsase d'una determinada forma. Aunque nes elleiciones municipales, gane'l PP nel distritu de La Felguera, aunque na fachada la Ilesia de sama haya unes lletres alcordándose de los caíos por Dios y por España (igual que nel vieyu edificiu de La Salle), aunque na metá de les cases, inda tean el yugu y les flechen enriba los portales y a pesar de tantes coses, que tapecen la memoria, y no engañen cola pantasma del comodismu burgés falsamente sustentáu por unes prexubilaciones vergoñoses y a la fín, fatales pal futuru y el presente.

Sicasí, aunque a vegaes parezca lo contrario, les coses son por algo y si el Rei d'España vien a Sama, lo más fácil ye que pase esto, aunque a l'alcaldesa nun-y guste y se sienta "atristayada, dende'l puntu de vista municipal", falando de la falta respetu. Podríamos falar muncho sobre'l respetu, col Rei y cola propia alcaldesa.

Amás del asuntu de les banderes y los cantares, los trabayaores d'Enferbús y de Diasa tamién se manifestaron ayeri pola tarde con motivu de la presencia del monarca, reclamando una solución pa los sos respeutivos problemes llaborales.

Ayeri'l Rei vino a la cuenca. Sí, a la del Nalón...

La noticia en LNE.

La noticia en El Comercio.

XXI Conciertu pola oficialidá 2009

2009-04-07T23:05:00.004+02:00

La Xunta pola defensa de la llingua asturiana acaba d'espublizar el cartelu del XXI conciertu pola oficialidá. Na so páxina pue lleese lo que vien darréu:

El XXI Conciertu pola Oficialidá va entamar el sábadu 25 d’abril a partir de les 19:00 nel Campus d’Humanidaes de la Universidá d’Uviéu. Ellí va instalase una carpa xigante y dos escenarios de grandes dimensiones que van alternar ensin descansu les actuaciones de Tuenda, Los Gatos del Fornu, Skama la Rede, Felpeyu, La Bandina, Dixebra y Skontra. Más de siete hores de buena música n’asturianu, de reivindicación y de folixa.

Tola info na páxina de la xunta.

Folixa na Primavera 2009

2009-03-31T01:48:00.006+02:00

Entama la temporada de conciertos folquis cola mítica Folixa na Primavera de Mieres, que ya tien el so cartelu espublizáu. El vienres día 3 d'abril van tocar los asturianos Llan de Cubel. Los compañeros d'escenariu pala nueche del vienres van ser los scotish The Battlefield Band. Na nueche del sábadu va ser el turnu de Dixebra xunto colos irlandeses Altan.

Esti añu, la folixa fai una apuesta pola calidá y la veteranía. Nun ye raro, por que esta ye una de les cites folquis más veteranes y afitaes del país. Equí van un par d'enllaces por si quereis más información:

http://www.ayto-mieres.es/99/9903/990301/?idioma=esp&code=2501

http://masquegaites.blogspot.com/2009/03/la-folixa-na-primavera-tira-de-clasicos.html

L'Azabache d'Oles

2009-03-27T16:33:00.005+01:00

L´azabache ye una variedá de lignito. De collor negru brillante, vien d'una familia d'árboles xurásicos que se extinguieron fai unos 60 millones d'años, al mesmu tiempu que los dinosaurios, según datos del primer estudiu científicu sobre l'orixe d'esti fósil.

Ye un material perfrágil, poro, la so extracción siempres foi artesanal, siendo de talla difícil cuando se intenta esculpir figures con abundantes detalles y calaos. Trabáyase con llima y tornu, garrando mediante una pulimentación adecuada un brillu intensu que nun baxa col pasu del tiempu. Ta formáu por una mezcla heteroxénea de material carbonáceu orgánicu y materia mineral, constituida principalmente por vitrinita, compuestu orgánicu que deriva de la lignina, la celulosa y otros, presentes nes plantes vasculares con semilles.

El plenu Municipal del Ayuntamientu de Villaviciosa aprobó la modificación puntual de les normes subsidiaries del planeamientu pa favorecer la extracción d'azabache. En poco más dún añu Oles va contar cola única mina abierta d'azabache en toa Europa, tornando a Asturies a ser cabezalera a nivel munidal xunto con Whitby no que cinca a la extracción y calidá del azabache.

http://www.azabachedeasturias.com/azebache.html

Blogue con entamu y fín

2009-03-13T00:44:00.004+01:00

Na blogosfera n'asturianu tamos avezaos a los blogues que tienen un entamu, un día determináu y esi día que suben la so primer entrada, nun piensen nel momentu que'l blogue va espublizar el so caberu post. Ye como entamar una rellación con una moza y nel momentu que-y das el primer besu, tas pensando en ónde y como va ser el día que lo dexes. Munchos blogues entamen como una promesa d'añu nuevu, d'eses que se faen los primeros díes de xineru de tolos años, aunque la experiencia diznos qu'eses promeses nun se cumplen asina como munchos blogues muerren nel escaezu del so autor. Esta forma de blogue, quiciavis seya la forma clásica y na nuesa blogosfera correspuende a la gran mayoría de los blogues.

Pero si lo pienses un momentu, nun tien por que ser asina. Un blogue pue componese d'una sola entrada y tener un entamu, un cuerpu y un fín perfeutamente cerráu de forma que cuente una hestoria, cumpla la so misión y nun dexe nengún filu descolgáu. Güei préstanos enseñavos un blogue n'asturianu con entamu y fín. Unu d'esos sitios que'l día que se fizo la primer entrada, ya taba condergáu a tener un post final irremediable, pase lo que pase. La Cuenca On Tour 2008 ye'l blogue d'un viaxe fechu en setiembre de 2008 por cuatro mozos de la cuenca'l nalón. Un blogue que ya nun va tener nengun post más, por que ya contó la so hestoria y ya ta terminada, pero que tamién forma parte de la nuesa blogosfera y la maxa de la rede y les visites que vaya recibiendo, van facer que seya asina durante dellos años.

http://lacuencaontour.blogspot.com/

Del bable nes escueles al bable nes esqueles

2009-03-07T22:09:00.004+01:00

Pasó la mani d'esti sábadu 7 de marzu. Pocu a pocu, la xente foi agrupándose delantre la estación, dexando atrás esos momentos d'incertidumbre nos que paez que nesta ocasión va a batise un record hestóricu, del mínimu d'afluencia. A la fín, la xente sal de debaxo les piedres y salvo glorioses excepciones, casi siempres hai la mesa xente en númberu con casi les mesmes cares.

La marcha entamó pasaes les 5 la tarde de delantre la Estación del Norte d'Uviéu. Esta vegada el tiempu acompañó y aunque taba nublao, nun cayó ni una gota y la temperatura yera agradable. Les diferentes organizaciones desplegaron los baberos y los cánticos clasicos entamaron a sentise. Nesta ocasión sintiéronse glayíos referentes a la situación de la llingua na Universidá y nes escueles.

Caleyamos pola Cai Uría y torcimos a la mandrecha al llegar al parque San Francisco pola Cai Conde Toreno, entamando un recorríu inéditu. Llegamos a la sede la U.X.T y tiramos a la manzorga pa llegar a aconceyanos delantre'l edificiu de la Coseyería d'Educación y Ciencia, onde se leyó el comunicáu que ye vezu, por parte d'una integrante de la Xunta Pola Defensa de la Llingua Asturiana.

La xente responde a les agresiones sufríes a la nuesa llingua por parte de l'alministración asturiana, mostrando disconformidá, y pidiendo cambios y dimisiones. Ye verdá que podía (o tenía) que haber habío muncha más xente, pero tal y como ta la conciencia social del pueblu asturianu, paeznos que la vindicación pro drechos llingüisticos dió otra llección de civismu, comportamientu, fidelidá y poder de convocatoria. Vémonos na siguiente...

Nueva Manifestación!

2009-03-04T17:42:00.001+01:00

Tola información na páxina de la Xunta.

Fayona d'Eiros D.E.P

2009-02-25T19:52:00.004+01:00

La Fayona d'Eirós, yera una gran faya afitada cerca del pueblu d'Eirós, nel conceyu de Tinéu. Pertenecía a la familia fagus sylvatica, tenía un altor de 28 mts, una copa de 30 mts y un diámetru de tueru de 4,45 metros. Créese que superaba ampliamente los 200 años d'edá. Foi declarada Monumentu natural el 27 d'abril de 1995.

Fai unos díes pudimos lleer na prensa que'l fuerte temporal de vientu había tirao abaxo la Fayona d'Eiros. Ya pasaron cinco semanes y la faya sigue tirada en suelu esin que'l gobiernu asturianu haya actuao nin decidío que se pue facer pa salvala.

A estes altures paez que la replantación ye casi imposible por mor del gráu d'intensidá de rotura de los raigones, asina que tan planteándose face-y un tratamientu pa caltener el troncu secu o face-y un sistema que permita lleer los son aniellos, pa calcular la so edá y conocer los cambios qu'hebo n'Asturies en tou esi tiempu. Tamos falando d'un árbol de más de 200 años declaráu Monumentu Natural.

Qu'en Gloria Tea...

Equí pue lleese la noticia.

Xardinería de Guerrilla

2009-02-18T01:13:00.005+01:00

La Xardinería de Guerrilla llega por primer vegada a Asturies, nes cais d'Uviéu.

Nos años 70 esta xente fueron los primeros en usar el términu xardinería de guerrilla pero la inspiración más cercana vien del xardineru británicu Richard Reynolds, aunque esto nun ye más que una versión de les tradicionales sestaferies llevaes al activismu urbanu. La sestaferia yera un trabayu fechu en comuña al que se solía dedicar un día enteru. Esi trabayu yera fechu polos vecinos d'un pueblu pa iguar les caleyes y zones comunales.

Equí ta tola información y semeyes.

Gozález y González los meyores de 2008

2009-02-02T09:24:00.003+01:00

Llegó el fín del plazu de les votaciones y ya tenemos el primer ganador del primer concursu de blogues n'asturianu de la hestoria. Préstanos dar la norabona al blogue:

González y González

Con 50 puntos, y una diferencia de 12 puntos col segundu clasificáu, la blogosfera n'asturianu acaba d'esbillar al blogue de los hermanos González como el meyor blogue en llingua asturiana de 2008. Felicidaes!!!

El podium ta completáu por El Xanu'l Caborniu con 38puntos y La verdá ye mentira con 37 puntos.

Norabona a los tres y gracies a tolos que votasteis. Nesti casu paeznos que tamién gana la nuesa blogosfera, demostrando dinamismu, actividá y xuntanza. Si tienes un blogue ya pues entamar a trabayar por él y si nun lu tienes, piensa que l'añu que vien, el to sitiu pue ser el que gane.

A títulu personal, paeznos que los tres primeros votaos son una bona representación de lo que ye un blogue dinámicu y de calidá asina que les votaciones, en xeneral paécen-nos xustes. Pero por enriba de too esto préstanos abondo la capacidá de movilización de la nuesa blogosfera, demostrando la so vitalidá. Cuando too esto entamó y entá nun teníamos conciencia de comunidá, aquel meme foi el primer ventanu pol que miramos al patiu'l vecín. Casi dos años más tarde, conocémonos e interrelacionámonos con naturalidá. Naide pue negar que aunque la nuesa blogosferina nun se podía comparar cola gallega nin con la de nengún otru sitiu, por tar basada nel ideal románticu de defensa de la inxusta situación de la nuesa llingua, y esa situación ye única n'Asturies, toos tábamos dalcuerdu que yera una blogosfera en pañales. A día de güei y gracies a tola xente que decidió facer, lleer y dexar un comentariu nun blogue n'asturianu, podemos dicir que a esi guah.e en pañales, ya-y salió un diente.

Norabona a toos y toes.

Música Tradicional en Concechu Quirós y L.lena

2009-01-29T11:03:00.009+01:00

Por mor de la nevá que cayó suspéndense les presentaciones hasta nuevu avisu.

El día 7 de Febreru ye la presentación del discu "Música tradicional en concechu Quirós". A esti actu podrá asistir tou aquel que quiera y la entrada será de baldre. La presentación va tener llugar el día siete Febreru en Bárzana, a les 19:00 Hores na Casa Cultura.‏

Por otru lláu, el dia 6 de febreru será la presentación del DVD "Música tradicional en conceyu L.lena" a les 19:00 hores nel Teatru VItal Aza de La Pola. L.lena.‏

Paeznos perimportante sofitar estos actos por que son la esencia mesma de la nuesa cultura en formatu non comercial, asina qu'ellí nos vemos.

La semeya y les anuncies son cortesía de Xose Antón "Ambás".

Últimos díes de les votaciones

2009-01-28T12:52:00.005+01:00

La blogosfera n'asturianu respondió otra vegada más a la llamada a conceyu, p'afitase como comunidá, esta vez en forma de votaciones al meyor blogue n'asturianu. El plazu de votaciones ta a puntu de terminar, ya que sólo queden tres díes. Aunque falta tiempu, paez que la victoria de los hermanos González ta nidia pero los puestos de podium entá puen camudar. La rempuesta foi perbona, aunque de xuru que ainda queden dellos blogues que nun mandaron el so votu. Viendo los resultaos llámanos l'atención el fechu de que dos blogues que cesaron la so actividá ten ente los cinco meyores, lo que afita que dos del meyores blogues n'asturianu ya nun tan activos. Tamién nos sorprende que un blogue tan reciente como La verdá ye mentira se atope nel segundu puesto, lo que tien munchu méritu ya que ta perclaro que hai que facer un blogue de muncha calidá pa llamar l'atención de la xente en tan pocu tiempu. Otra cosa que nun esperábamos yera atopar blogues que nun conocíamos y más nos puestos d'arriba de la clasificación.

Hasta agora, votaron 40 blogueros a un total de 35 blogues estremaos, con diferentes puntuaciones. Queda nidio la bayura de la nuesa opinión. Aunque paez que'l ganador nun va ser por casualidá ya que la diferencia de puntuación ye abundante. El cambiu que hubo nes bases una vegada entamáu el concursu, supuso tou un aciertu y la xente supo entender y adaptase a les nueves normes.

Amás de la calidá de los blogues votaos, sabemos que l'afinidá en xeneral (política, personal...) foi ún de los parámetros que les y los blogueros tuvieron en cuenta pa tomar les sos decisiones. El mayor problema col que nos atopamos foi asegurar que un blogueru o bloguera nun mandara más de un votu al tener dellos blogues con delles personalidaes. Esti ye un tema complicáu que habrá que mirar bien pa otros años, ya que ye perfácil engañanos y trespasar les bases de les votaciones. Con too y con ello, acabamos de participar na primer votación al meyor blogue n'asturianu de la hestoria y queden tres díes pa que fine. Gracies a los qu'echasteis un gabitu y a ver si pa otru añu se fai más y meyor. Un saludu a toos y toes.

Manifiesto por la Lengua Común

2009-01-23T17:29:00.004+01:00

Dende fai unos díes ta moviéndose esti corréu pola rede. Ponémoslu equí pa que lu podais lleer:

La canal de televisión Telecinco sofita dende güei el 'Manifiesto por la lengua común', que 'l pasáu 23 de Xunu asoleyó un ensame d' inteleutuales en Madrid. La canal comparte los petites d' esti ensame d' inteleutuales, ente los que s' afaya Mario Vargas Llosa, Fernando Savater o Álvaro Pombo, que piden al parllamentu español aperiar una normativa p' afitar que 'l castellán seya la llingua oficial de tol territoriu y la única 'que puea ser emplegada polos sos ciudadanos'. Telecinco ye la primer televisión que s' enxerta nesti manifiestu. Amás, Telecinco dixo nel informativu del mediudía, que pon a dimposición del coleutivu qu' entama esta iniciativa, la so canal de televisión pa dar sofitu a esti proyeutu.

Si ellos roblen el manifiestu, nós apagamos Telecinco. ¡Xuntos podemos! Apaga Tele5.

El Sespa aforra a costa la to salú

2009-01-14T00:24:00.005+01:00

El Seviciu de Salú del Principáu d'Asturies ye un organismu públicu sovencionáu cole perres de los y les asturianes, pero a vegaes, comportase como'l patrón más inflexible d'una empresa privada. L'Hospital Valle del Nalón ye bonoa preba d'ello. Nun tamos falando d'abusos y de la llaceriosa situación de les contrataciones del personal d'esti hospital (que daría pa otru post...), sinon, de la xestión interna de los diferentes servicios y plantes.

Casu rial colos datos camudaos:

Nolo Argüelles Baragaño, ye un paisanu de la cuenca, ex mineru, d'ochenta años y con silicosis de gráu III a más d'otres enfermedaes polmonares y d'otra mena que nun vienen al casu. Al ponese malu, la so fía llévalu al Hospital del Nalón pol serviciu d'Urxencies por que taba bastante afogáu. Al llegar ven qu'hai muncha xente esperando na sala espera y el personal del centru anda revolucionáu. Nunes hores, el paisano ta nuna camilla col tratamientu que lu va meyorar de momento, pero en vez de tar nun box habilitáu, tien la camilla en mediu'l pasiellu, tapada con un biombo y viendo xente correr p'alantre y p'atrás. A les siete hores el paisano meyora, pero la fía sabe que ye de momento y entruga si nun va quedar ingresáu. El mélicu d'urxencies da-y l'alta y diz que l'hospital ta sobre-saturáu pola epidemia de gripe. Al salir, la fía de Nolo, entérase que esi hospital tien dos plantes enteres piesllaes, mientres so pa tuvo nun pasiellu, p'aforrar perres.

El fechu de piesllar plantes, ya ye vezu vieyu nesti hospital. Suele facelo nel branu y n'avientu. D'esta manera aforra munches perres en material y sobre too en personal, ya que utilicen a los trabayaores de la planta piesllada pa dar los díes a los demás trabayaores del hospital. Aguanten coles plantes piesllaes hasta que la situación ya ye insostenible o hasta que sal na prensa, por que de cara a la opinión pública queda feo que Nolo tuviere siete hores nun pasiellu mientres había dos plantes piesllaes y queda feo mandar un paisano entranpiáu pa casa pa que a los dos díes vuelva a tar n'Urxencies. Aquello de pan pa güei y fame pa mañana...

Podeis lleer la noticia equí y tamién equí.

La semeya ye de la páxina'l sicepa.

Villacore 09

2009-01-08T17:30:00.004+01:00

El Villacore 2009 va tener llugar los díes 9 y 10 de xineru, nel club xuvenil de Villa (Riañu, Llangréu). Los conciertos entamarán a les 19.00 hores y el preciu sedrá de 10 € por día, pudiendo mercase un bonu de los dos díes por 16 €.

Si quiés enterate de quién va tocar cada día, de como se pue llegar a Villa en trasporte públicu o coche, o d'onde pues dormir, pincha equí.

Fnast, información musical asturiana

2009-01-07T17:05:00.004+01:00

Fnast.net, información dixital del panorama musical fechu n’Asturies, abre la so primer edición dixital nesti mes de xineru ufiertando, aparte de les noticies que s’actualicen diariamente, delles caxigalines más. Pa esti primer mes del añu el mediu de comunicación dixital espubliza dos entrevistes audiovisuales a dos grupos bien distintos en cuanto a trayeutoria y estilu, un reportaxe musical y otru d’actualidá social, un artículu d’opinión na columna mensual y delles reseñes de novedaes discográfiques.

Suerte con esti proyeutu, esperamos que fnast seya una páxina que dure munchos años y un referente no que cinca a la música de nueso. La verdá ye que tien bona pinta la cosa, a ver si teneis suerte.

Pues visitar esti sitiu tan prestosu calcando equí.

El Meyor Post de 2008

2009-01-01T12:38:00.004+01:00

Fino'l 2008 y paez que neste feches, siempres ye vezu echar los güeyos p'atrás. Los balances del pasáu y los proyeutos del futuru suelen mecese n'añu nuevu cola resaca y les ilusiones.

Aprovechando que la blogosfera n'asturianu ta votando el meyor blogue del añu 2008 y siguirá votando durante tol mes de xineru, prestábanos espublizar equí, el que pa nós ye'l meyor post de 2008. Naquelles xornaes que'l Conceyu la Mocedá entamó en Xixón fai dellos años y que me paez que supuso el primer actu de la hestoria alrodiu la blogosfera n'ast, xente que sabe d'esti asuntu, díxonos que un bon post tenía que ser curtiu, más o menos de 200 pallabres, por que a partir d'ehí el llector cansaba y dexaba de tener interés. A esto hai que sumar que la rede ye un inframundu rápidu, con más información de la que podemos retener. Asina que'l bon post tien que ser rápidu, direutu y cenciellu, pero neses tres característiques hai que meter el mensaxe que te interese tresmitir, si ye posible adornáu con sesu, humor o violencia, pa asegura-y una bona recepción por parte del llector.

Pensando nestes carauterístiques y pensando no que nos reímos el día que lu vimos, paeznos que'l meyor post de 2008 ye La Oficialidá va llegaaaarrrr… del blogue González y González, que curiosamente ta a la tiesta de la votación a meyor blogue. Norabona a los hermanos González y esperemos que sigan ufiertándonos ayalgues como esta.

¿Cuál te paez a tí que foi el meyor?

Instala Ubuntu en Llangréu

2008-12-29T20:58:00.005+01:00

La xente del colectivu Softastur va organizar una Install Party, en Llangréu. Softastur ye un grupu de xente que collabora tornando Ubuntu al asturianu y otros proyectos de software llibre. El fín ye instalar Ubuntu de baldre a tola xente que vaya col so ordenandor a les escueles Dorado de Sama, el vienres 16 de xineru de 2009 de 17 a 21 hores. Podeis facer toles entrugues nel corréu ubuntizate[arroba]softastur.org

Tola información equí.