La idea entama en xineru de 2009, onde dende'l blogue TrayasgayA entámase la primer edición de la votación al meyor blogue de 2008. Ensin nengún precedente nin experiencia, veíamos les votaciones como otra forma de xunir la comunidá bloguera, de facer ruíu, pa que'l mayor númberu de persones supieran que hai xente que se dedica a facer blogues n'asturianu y qu'encima, tienen la organización y la iniciativa necesaria pa entamar esti tipu de coses. Yera otra forma d'interactuar ente nós y de conocenos. Esti añu nun teníamos nidio si díbamos facer les votaciones por dellos motivos, pero llegáron-nos correos entrugando y animándonos a siguir coles votaciones y dempués de pidir ayuda a la rede, hebo xente que nos ofreció el so trabayu, sacando alantre un proyeutu inda mayor que'l que teníamos na tiesta.
El programa vamos dir desvelándolu nesti mes qu'hai hasta'l 20 de febreru. La razón ye que tenemos delles persones apalabraes pa dir a falar, pero tan pendientes de temes llaborales y nun queremos dicir mentires anunciando lo que nun ye. Si too sal bien, habrá tres charres curties. Una sobre la rede y los blogues, otra presentando ún de los últimos estrenos na rede n'asturianu, y otra dando anuncia a otru proyeutu que ta por salir próximamente. Les tres tarán feches por xente perinteresane a la que de xuru-yos podremos entrugar sobre munches otres coses. Si hai tiempu fadrémos tamién una mesa redonda, pa que tolos blogueros y blogueres que vayan, tengan la pallabra. Ensin escaecer la entrega premios que saldrá como resultáu de les votaciones al meyor blogue 2009. Hasta esi puntu ya habremos terminao colos blogues y sera'l tiempu de la sidra.
Cuando Ricardo Candás y yo, entamamos a da-y forma a esta idea, pusímonos en contautu con Eloy Antuña, responsable del Serviciu de Normalización Llingüística de Llangréu. Nun ye la primer vegada que falamos con él d'un tema paecíu, lo que pasa ye que nel pasáu la cosa nun pudo salir alantre, pero siempres nos mostró una predisposición inmeyorable. La collaboración ye total y la verdá ye que presta cuando la xente de la que dependes pa entamar esti tipu de coses, involúcrase, echate un gabitu pa sacar el trabayu alantre y búscase la vida pa tener tol material necesariu. Nun ye cuestión de facer la pelota, por que nun lo necesitamos, pero hasta agora el sofitu del Conceyu Llangréu al traviés d'Eloy Antuña, ye inmeyorable.
La diferencia col primer sidra&blogues ye importante, por que la propia bloguesfera ye diferente, el momentu ye diferente y nós tamién. Aquel primer sidra&blogues foi la primer toma de contautu d'una comunidá moza, muncho más inocente si se pue dicir, inclusu, como fai poco la nomaba Poli Mencía de Pingarates más adolescente . D'aquella teníamos la sensación que nos conocíamos toos y podíamos pone-y cara a tolos blogues, inclusu numeralos. La xente facía blogues a nivel personal, yera una época más casera y ensin intereses antroxaos. Lo que se lleía yera lo que se quería dicir y nun había dobles personalidaes, segundes intenciones nin blogueros fantasmes. Una de les coses que se falaron entós, yera'l monotematismu de la mayoría de los blogues, cosa qu'anguañu, paezme que ta más que superada. Güei ye más difícil saber cuántos blogues hai, cuántos tan operativos y de quién ye cada ún. Hubo xente que se dió cuenta del poder de la rede y de la influencia popular de la bloguesfera y apuntose al carru, sumando, pero tamién camudando el xeitu del movimientu. La edá media de los y les blogueres xubió en forma y por fín xuniéronse dellos escritores na nuesa llingua, dando rempuesta a aquella idea de Próspero Morán onde camentaba que na bloguesfera yera imprescindible que la xente qu'escribe n'asturianu, tuviere espacios propios.
Aquel primer sidra&blogues organizose de forma muncho más cenciella. Dempués d'una mani n'Uviéu pola oficialidá, un 24 payares, cuando se organizaron les marches caleyando dende dellos puntos d'Asturies. Nun había un guión nin un programa. Namás yera una excusa pa venos y charrar. Nesta segunda edición, la cosa ta muncho más ellaborada. Tamos ante un alcuentru blogueru con entrega "premios" embaxo'l nome de 2º Sidra&Blogues. Hai un conceyu que sofita l'actu y delles organizaciones como softastur y Xareos! xestión cultural que nos echen un gabitu regalándonos detalles pa dar na entrega premios. Les votaciones y los quiciavis mal nomaos premios, nun son más qu'otra excusa pa siguir faciendo ruíu y moviéndonos. Ye una páxina más na breve hestoria d'una comunidá onde los blogues más vieyos tienen ente tres y cuatro años.
Too esti xaréu entamámoslu nós, non por ganes nin ansia de protagonismu o manipulación, sinon por que daquién lo tenía que facer. Hai ya munchos proyeutos na rede n'asturianu, pero'l 90% tan entamaos poles mesmes persones y hai que da-yos descansu. Aunque nun tengamos munchos conocimientos n'informática, nun ye difícil ser creativu y entamar proyeutos nuevos pa que la comunidá siga medrando, entá queden munches coses por facer. Por too esto, encamentamos a tola xente que fai blogues na nuesa llingua, a la xente que tien curiosidá de cómo ye esti mundu y a los que-yos presta sofitar iniciatives pa caltener la nuesa cultura en xeneral, a que pasen el día 20 de febreru pola casa los alberti de Ciañu, nel Conceyu Llangréu. Por que'l 2º Sidra&Blogues ta fecho por blogueros y pa blogueros, ensin más intención nin oxetivu que siguir promocionando la nuesa llingua en toles estayes.
