El buenu, el feu y el malu [camisetes TrayasgayA]

Dempués de munchu tiempu ensin diseñar imáxenes pa plasmales na ropa, llega un nuevu diseñu na llínia de camisetes TrayasgayA. Nesta ocasión ye una adaptación a la nuesa llingua del títulu d'una famosa película del oeste cola imaxe del so protagonista. Una imaxe basada nel fenómenu friki-pop que val pa siguir sumando na llibertá de creación de diseños, fechos por TrayasgayA. De xuru que nun será l'ultimu...

Lleer Más...

Cantaruxare

Esti fin de selmana organizose nel muséu del Pueblu d'Asturies, en Xixón, un alcuentru alrodiu la pandereta con representantes gallegos, cántabros, vascos, castellanos y asturianos. L'alcuentru nomáu""PANDERETERES" consistió en conciertos y dellos talleres cola pandereta como intrumentu principal. Con esti nome podía pensase que los homes nun tenien representación nes formaciones d'estos dies pero nun foi asina. Eliseo Parra de Castiella y los representantes vascos yeren paisanos. D'Asturies casi toles formaciones fueron femenines pero tamién hubo una esceición nel domingu. Pa zarrar estes xornaes foron convidaos Ambás y Ramsés pa dar un conciertu con dellos materiales recoyios por ellos mesmos. A lo llargo l'actuación ficieron un repasu polos ritmos baillables del repertoriu asturianu d'oriente a ocidente con diecisiete pieces. Nesi conciertu, aprovecharon pa presentar un proyeutu novedosu nel panorama musical asturianu, el primer grupu de pandereteros de la hestoria d'Asturies. Llámense "Cantaruxare" y tan formaos por Paulino, Diego, Ambás y Ramsés. Col convide a Paulino y a Diego nel conciertu d'Ambás y Ramsés, la nueva formación tocó pieces del repertoriu que tan entamando a preparar.

Ambás comentó nel conciertu que nun fai falta denguna xustificación a crear un grupu d'homes pandereteros igual qu'una gaitera nun tien que xustificar por qué toca un istrumentu que foi d'homes tradicionalmente, pero tamién apuntó que nos sos trabayos d'investigación, apaecieron interesantes datos d'esta minoría de pandereteros que tamién existieron na nuesa música tradicional y amás, pudieron grabar a tres bonos tocadores de los conceyos de Ibias, Quirós y Mieres. La tradición de la pandereta n'Asturies, ye verdá que foi mayoritariamente una tradición pegada a les muyeres, pero tenemos datos y grabaciones d'una minoría d'homes que tamién tocaron pal baille con estilos diferentes. "Cantaruxare" quier ser la reivindicación d'esa tradición d'homes mal estudiada y conocía n'Asturies.

Lleer Más...

Asina Non

Too sigue igual, cerrao en falso, ensin escuchar al pueblu. La conderga a muerte sigue sumando díes col enfotu del cabezón recalcitrante, vergoñosamente contradictoriu. La verdá ye que nun teníamos munches ilusiones, d'ehí que la desilusión nun seya grande. Ellos reafírmense na so postura, dende l'altor de la poltrona, echando los güeyos p'abaxo con una mirada que paez animanos a siguir reafirmándonos, tamién, nos nuesos pasos. Ye la reafirmación del que namás tien el gabitu de la razón, de la hestoria y de la yercia al futuru. Polo menos nun xueguen al engañu y muestrénse traidores a los raigaños, pero a puertes abiertes, sin ambigüedaes nin illusiones. Ye lo bono de los fascistes, que se sabe que lo son y puen vese fardar d'ello a poco que los mires, de forma que nesi sen, enxamás te sientes traicionáu. Los que xuegen a antroxase con traxes de collores chillones, son más gacientos y hai que cuidase d'ellos, sobre too si te quieren convencer de lo bonos que son, dempués de date una hostia.

La imaxe vila en La Esfoyaza y L'espeyu la xana.

Lleer Más...

Como fice la semeya a David Villa

Si tuviéremos una prensa normal, esta sería una de les imáxenes del branu n'asturies. Non por ser cabezalera d'una campaña ciudadana que t'amosando un éxitu brutal, sinon, por que ye una semeya fecha al meyor xugaor de fúbol asturianu, ún de los meyores del estáu español, a un campeón d'Europa y al reciente pichichi de la Eurocopa. Esto quier dicir que si esti home tira un péu, ye noticia... Les redes de TrayasgayA son llargues y, casualidaes de la vida, resulta que l'home que-y fizo esta semeya a David Villa, ye collaciu de nós. Darreú explica en primer persona como foi el "making off" d'una semeya que va pasar a la hestoria:

"Ello ye que venía yo tando esmolecíu polo guapo que sería facé-y una foto a esi guah.e. El xueves pasáu, de la que tornábamos pa casa depués de tomar un culete, entré en Don Bocata cola cuenta d´echá-y una última güeyada´l periódicu del día. La mio sorpresa foi grande. L´alborozu mediáticu de los caberos díes contrastaba cola tranquilidá que reinaba nel chigre. Villa y el so cuñáu na barra, un chaval na tragaperres a lo suyo y una parexa nuna mesa que nun atendía un pih.o pa ellos. Tan normal yera la cosa que Berto, el chigreru, al caltriar la dulda na mio expresión, confirmóme con un xeitu afirmativu que nun taba suañando y que aquello yera real. Nun me dio tiempu a lo pensar. Averéme a ellos y conté-yos en qué consistía la campaña asina como les mio esmoliciones por faceme cola so foto. El guah.e, un aquello sorprendíu, solo se precupó pol calter apolíticu de la iniciativa y por conocer los nomes d´otros deportistes que yá fexeren la semeya. Una vez algamáu´l so consentimientu, di coles pates en culo a la gueta de la cámara y del cartelu.

Y asina foi como-y fixi la foto a David Villa. Depués ca ún siguió a lo suyo. Ellos esperando les hamburgueses pa llevales pa casa, y yo faciendo como que lleía un periódicu que yá nun m´interesaba nada. De la que marchaben y pa que nun caltuvieren dulda denguna de lo que fixeren volví a da-yos le gracies y una tarxeta personal cola que m´identificaba y me ponía a la so disposición pa esclaría-yos cualesquier asuntu.

Falten tovía munches fotos. Xente con “cartel” que ya amosó el so sofitu a la Oficialidá y qu´entá nun ta retratada. Nun hai que se cortar. Porcentualmente, la mio experiencia amuesa que nun llega al uno por ciento la xente que pue dicir que non.

Alón y a retratase. "

Aunque él nun lo cuenta, sabemos de primer mano, que pidió-y el teléfonu de Santi Cazorla pa facer lo mesmo y como ya taba llanzáu, atrevióse a dicir "home, Villa, tú que tas bien rellacionáu, podíes pasame el teléfonu de Fernando Alonso...". Amás sabemos que anda detrás de la semeya de dalgún otru famosu de la cuenca y ya la tien medio apalabrá. Dende TrayasgayA queremos dar les gracies a xente como Xicu, que ye'l verdaderu protagonista y la persona a la que l'asturianismu y tien qu'agradecer la semeya de Villa. Xicu, tú sí que yes un Crack!!

Lleer Más...

La Rempuesta de Blogasturias

Nun apegamos equí el textu lliteral del corréu por nun tener el permisu del que lu escribió, pero mas o menos diz lo que vien darréu:

-Agradecen el corréu informativu de Ricardo Candás y aclaren que nun tienen interés nengún en apropiase d'un númberu determináu d'un eventu y que organicen el primer blog&sidra organizáu pol Comercio Digital.

-Reitérense na invitación a La Esfoyaza y el restu de blogues n'ast, por que pretenden crear un foru d'alcuentru y debate pa tola “blogosfera” asturiana.

-Pa finar, enplacen a Ricardo a sentase a falar nel propiu alcuentru, con más calma y ver si se pue collaborar nel furu pa potenciar esti tipu d'eventos, aclariando que si nun pue dir, queda la posibilidá de quedar notra ocasión pa falar y poner coses en común.

Más o menos esta ye la rempuesta, aunque hai qu'aclariar que nun rectificaron el so blog. Agora, yo teo una dubia. Ta claro que se obvió totalmente a la nuesa llingua, entós, ¿cual ye la rempuesta que tien que tener la blogosfera n'ast?. Yo creo qu'hai dos caminos a seguir. Unu ye el boicot total negando l'asistencia y la publicidá del eventu, pasando d'él igual qu'él pasa de la llingua asturiana. Y otru ye l'intentar normalizar la llingua al traviés de la normalización de la nuesa blogosfera dientro de la blogosfera asturiana xeneral (inclusu la de tol estáu), asistiendo al alcuentru, fomentando contautos y rellaciones, que nun futuru puen dar los sos frutos y saliendo de la caverna pa dexanos ver y que se sepa qu'esistimos. ¿Qué te paez?.

Lleer Más...