Na nuesa entrada del día
19/12/07, que falaba de la
Wiki de la Xunta de Blogues en Llingua Asturiana, recibimos esti comentariu fechu por una persona de nomatu anónimu:
"y pa cuando flogsfera? ye muncho más guai que la blogsfera n'asturianu y con munches más entraes diaries...y de calidá.
"
Ye una cuestión que ya nos plantegamos fai tiempu, inclusu foi un tema que salió nel "I Sidra&Blogues" del 24/11/07 y que nos paez interesante dedica-y una entrada pa esponer la nuesa opinión y si se tercia, conocer la de vós. La diferencia básica y oxetiva ye que'l fotolog da-y más importancia a la semeya, que pue dir acompañada de testu o non y el blog o blogue centra'l pesu de l'atención nel testu, munches vegaes ensin semeya. Habrá xente que diga qu'hai blogs de fotografía y ye verdá, pero la mayor parte les veces, les semeyes van acompañaes de testos esplicativos y el formatu y tamañu que'l blog da a les imáxenes nun tien comparanza col que-y da el fotolog.
La comunidá bloguera ta lluchando por espoxigar, xunise y aconceyase. Esti esfuerciu nun se atopa nos fotolog, que se presenten en gran númberu, sobre too, los qu'usen l'amestáu. La temática ye estremada asgaya y camiento que la media d'edá tamién. Toi xuru que'l que tien un blogue y un fotolog (que me paez qu'hai dellos) nun echen el mismu tiempu en pensar los post d'unu que d'otru. Esto fai del fotolog un mediu más informal y onde la comunicación ente los individiuos de la comunidá ye muncho más direuta y habitual, siendo vezu pasar a "saludar " polos fotolog de los tos collacios virtuales. Por otru lláu, por toos ye conocía la "soledá" del blogueru que postea al ciberespaciu ensin saber si les sos lletres lleguen a un receptor o non.
Sicasí, paeznos que too depende del sacu onde los queramos meter. Si lluchamos por una llingua y queremos facer una comunidá grandona pa que cuando salga un artículu en La Nueva España paezca que tenemos unos pegoyos grandonos y sólidos, entós paezme bien que vayamos xuntos. Inclusu agora que la nuesa comunidá, ta inda en pañales, nun veo mal que en rankings y páxines de rss se mezcle blogs y fotologs. Pero a mí paécenme dos coses estremaes, basaes nuna mesma idega.
Tres exemplos:
http://www.asturies.com/canalblogues.phphttp://www.alianzo.com/net/top-blogs/language/asturianuhttp://www.llinguablog.blogspot.com/
