Bones Fiestes Navidiegues

Otru añu más tamos inmersos na rutina robótica de les fiestes nadaliegues, coles perres na mano y la sonrisa na cara. Mientres esperamos que los caberos adelantos tecnolóxicos lleguen a les nueses manes, a costa de les hores de trabayu de nueso, la xente que de verdá tien daqué que cellebrar nestos díes, frótase les manes y gózala como lo deberíen facer munchos guajes.

Asina, TrayasgayA quier felicitar les fiestes a tolos direutivos de multinacionales y empreses diverses que van ver disparaes les ventes de los sos productos y con ello, algamar mercar un coche más grande, o gastalo en ensanchar la carrretera, por que ya casi nun-yos entra.

A les empreses de publicidá que cada añu dirixen les conductes de la xente nestes feches (como en casi tol añu), faciéndolos entrar nuna llocura consumista y algamando qu'escaezan la llosa de rialidá que tolos años nel mes de xineru yos cai encima.

A Benedicto XVI y los que mueven los filos de la empresa más rentable de la hestoria y la que más muertes causó a lo llargo'l mundu, ya que tan na selmana grande de les fiestes (como Xixón en Begoña) y tienen qu'aprovechar l'atención mediática, por que ya nun tan de moda y saben que perviven a costa de bodes, bautizos y comuniones (como dalgún gaiteru...).

A los mandatarios curruptos de les naciones, fasteres o pueblos, que puen siguir atropando con toa la impunidá que tuvieron hasta agora, pero cola tranquilidá de tener a tola xente cola atención centrada lloñe d'ellos, como cuando Franco ponía partidos de fúbol na tele.

Y tamíen a los guajes (y dalgún adultu que quiera siguir nesta época de la so vida) que disfruten cola ilusión de, tar xuntos en familia, nun dir al colexu por unos díes, comer un poco marisco y recibir dalgún regalín. Mientres dure l'engañu...

Lleer Más...

Música Como Entretenimientu

Angüañu cuntamos con una amplia ufierta de xeres que puen enllenar los nuesos momentos d´ociu. Culturales, deportives, en grupu o individuales, nel esterior o nes nueses cases. Namái con prender el televisor y escoyer ente l´amplia gama de canales, afayamos daqué que nos entretenga. Asistimos como espectadores a actividaes musicales que la comunicación aportó a un puntu en qu´una canción d´un interprete con muncha sonadía pue tar estrenándose al mesmu tiempu en dellos continentes y ser mundialmente conocía aína.

De dalgún mou la música llega a nos de forma mediática y nun nos dexa más que ser cenciellos espectadores qu´en dalgunes ocasiones atrévense a participar baillando o interpretando pa otros de xemes en cuando. Fasta la llegada los grandes medios de comunicación sonora y visual del sieglu XX, y cola esceición de les clases acomodaes, que gociaben, magar qu´en menor midía qu´angüañu, del privilexu de cuntar con composiciones, actuaciones o conciertos a la carta, el pueblu, y la so xente yeren d´una vegada interpretes ya espectadores. Nos sos momentos d´ociu cotidianu, asina como en bodes, fiestes y romeríes ya otres ocasiones especiales, la música taba siempre presente. Recurríase entós a la interpretación de canciones y músiques aportaes de mou oral de xeneración en xeneración. Les melodíes foriates o les que sonaben nos conceyos d´acomodaos cuasi nun se conocíen. N´ocasiones, estes llegaben a los sos oyíos y quiciabes polo novedoso o pintoresco acababen cuayando ya inxertándose a los sos moos interpretativos.

Les grandes tresmisiones de la mayor parte de la herencia musical tradicional asturiana fuerón muyeres. Elles cantarón y tocaron panderetes animando los conceyos, folixes y cellebraciones. Asina lo fixeron al traviés de los años, dexando´l so bon saber a les xeneraciones que veníen darréu.

Lleer Más...

Tando enfiléu yo mexe na caleya...

Y dempués qué?
"La resaca ye l'apaición d’un conxuntu de síntomes al día siguiente de beber alcohol escesivamente, dempués de mexar na caleya, perder la montera y hasta’l calzonciellu si la nueche acaba bien”
La resaca ye la única enfermedá universal qu'afeuta a tolos seres humanos, sían probes o ricos, sían negros o blancos, del Uviéu o del Sporting. En dalgunos caso fálase de xente qu’algamó la inmunidá, pero siempre sueles ser lleendes urbanes, o dalgún paisanu qu'entá nun la soltó y por eso nun la sufre.
Los síntomes son variopintos:
1. Dolor de cabeza, que pue manifestase en diversos estadios, dende un simple dolorín nes vidayes hasta que paez que te tan afuracando con una parafusa na base’l craniu.
2. Dolor de barriga, pasa lo mesmo que cola tiesta, dende un piquiñu malestar hasta cagar trito hai un universu de posibilidaes.
3. Amnesia, esti síntoma suel venir en rellación a lo bien que lo pasasti'l día anterior, cuanto meyor lo pasares más amnesia tienes. Y col focicu de la to moza o mozu al día siguiente, a mayor focicu menos coses recuerdes haber fecho.
4. Incrompresión del reló. -¿A qué hora llegasti ayer que nun te sentí?. Tú llegasti a les 8:00 la mañana borrachu como una perra. –Nun sé… sedrién les 3:00 o les 4:00…
5. Pastosidá bucal, que ye tener la boca como una alpargata.
6. Los zapatos que llevasti esa nueche tan pa tirar.
7. Lentitú cerebral, que nun andes vivu.
8. Hipersensibilidá a la lluz, al soníu, a los golores, a les visiones, a too…

Vamos a ver agora unos cuantos conseyos pala resaca:
El primeru ye… POR NADA DEL MUNDIU VOS GOLÁIS LES MANES ENSIN LLAVALES PRIMERO!!!
Esto ye fundamental… lo primero pol fogonazu que vos pue dar, y lo segundo por que reduz l'amnesia… y hai vegaes que l'amnesia ye bono.

REMEDIOS PALA RESACA:
Toma una dieta depurativa. Nada de fartase a comer les sobres del corderu a la estaca y los langostinos, por mui bonos que paezan, que tean de la cena de fin d’añu. Espárraguinos, carne y pescaos a la plancha, o un caldín de verdures, ayudaránte a reponete.
Bebe munchu agua. La falta del líquido elementu nel nuesu organismu ye la causante del dolor de cabeza y la sensación de sede que nos invade nesti estáu. Hai que reponer los líquidos perdios pola inxesta d’alcohol.
La vitamina C ye mui bona, d’ahí que siempre recomendase beber zumu de naranxa.
Pal dolor de cabeza, dalgo no qu'enxamás pensasti: aspirina.
Duerme y descansa. Una bona siesta lo cura too.
Una receta de mio güela pala resaca: xunta llechuga, kiwi y pomelu na llicuadora y bebelo too relaxadamente hasta qu’escample. Como dise, la vitamina C ye la nuesa meyor aliada.
Combatir la resaca con alcohol nun ye conveniente. El refrán "un clavu con otru clavu" ye meyor nun aplicalo nesti estàu. Lo qu'algamaremos ye paliar la resaca prollongando la borrachera, pero tarde o temprano, el dolor de cabeza volverá a apaecer.

MITOS SOBRE LA RESACA:
Debese tener cudiáu colos mitos de que l’alcohol ameyora la resaca, lo que produz ye empeorala, yá que ye la mesma sustancia tóxica que causó los sos efeutos.
Otru mitu ye que les pastilles de vitamina B6 tomes enantes o dempués de beber eviten la resaca, pero la única utilidá d’esta vitamina ye la so aplicación por vía intramuscular en casos graves p'acurtiar, que non eliminar, los efeutos secundarios d’una intoxicación etílica. Tampoco ye mui cierto que beber agua en asgaya pa mexar ameyore la resaca al favorecer la eliminación d’alcohol, porque l’alcohol eliminase a una velocidá de siete gramos por hora y ye imposible acelerar el ritmu.
La creencia popular diz qu'una cucharada d’aceite tomada enantes de beber reduz l’absorción de la bebida, pero ye totalmente falso yá qu'al facelo nun se cubre tola superficie del estómagu y la parte llibre absorbi l’alcohol a la mesma velocidá.

PREGUNTES Y RESPUESTES SOBRE LA RESACA
¿Los efectos del alcohol son mayores nes muyeres?El corazón de les muyeres ye más sensible a l’alcohol. En comparación colos homes, les muyeres sufren antes los efeutos negativos de la bebida, inda inxiriendo una cantidá inferior. "El consumo de drogues, como l’alcohol o la nicotina, posee un pior impautu nes muyeres que nos homes", según un nuevu estudiu publicáu n’Alcoholism: Clinical & Experimental Research.
¿Por qué toi rotu al día siguiente?Cuando bebemos alcohol n’escesu baxanos la cantidá d'azucre nel sangre. Esto ye porque l’etanol, principal componente del alcohol, acelera la transformación del glucógeno (sustancia de reserva que s'encuentra nel fígadu y que s'encarga d’almacenar azucre) en glucosa. Esta glucosa recién producida eliminase mui rápidamente, lo que fai que nos sintamos débiles y cansaos.
¿Y la sede?Lo primero que pensamos cuando nos llevantamos con 'resacón' ye en llegar hasta’l grifu. Y ye que l’alcohol dexa fuera de combate a una hormona antidiurética que controla’l nivel de líquidos nel cuerpu ordenando al reñón que reabsorba agua de la orina. El Nuesu reñón entós empieza a eliminar más agua de la que tomamos, polo que l'organismu buscala n’otros órganos y provocanos esa sensación de sede.
¿Quién tá amartellando la mio tiesta?La principal consecuencia de que’l reñón elimine tanta agua ye la sensación estrema de sede pero, además, la búsqueda d’agua nel organismu fai que les membranes que recubren el cerebru (les meninxes) pierdan líquido. Al reducise la cantidá d’agua dilátense los vasos sanguíneos para intentar que’l nuesu cuerpu recupere l'equilibriu y llevar más líquido al cerebru. Esta dilatación produz el terrible dolor de cabeza.
¿Y los ardores d’estómagu?Quizábes lo pior de too sía la batalla gastrointestinal que se forma tres la borrachera. Nel estómagu, aunque en dosis controlaes aumenta les secreciones riques n’ácidos y ameyora la dixestión, l’etanol n’escesu irrita y provoca erosiones na mucosa y les parees estomacales, lo que puede desencadenar nuna gastritis.

Lleer Más...

Una Mala Noticia

El 10 d'Avientu, día en que se cellebra mundialmente la Declaración de los Drechos Humanos, morrió a los 91 años Augusto Pinochet.

Juan Pablo Feinmann dixo: “Nun sirve pa na que muerra. Qu'estos tipos muerran cuando ya mataron a tolos que queríen matar ye un probe consuelu."

"Morrió nuna cama, del corazón (un corazón al que namai acudió para morrer tranquilu), rodeáu de fascistes y dolorosamente impune."

Durante la dictadura militar qu'abarcó los años 70 y 80, miles de persones fueron desaparecies en Chile poles fuercies de seguridá a cargu del Xeneral Augusto Pinochet. Anguaño, les sos families y collacios siguen buscando rempuestes.

El 11 de setiembre de 1973 les fuercies armaes de la República Chilena pusieron en marcha un plan d'esterminiu de la población civil que foi organizáu conxuntamente con axentes de la CIA y del Departamentu d'Estau d'USA, como quedó demostrao na investigación que fizo'l Senáu norteamericanu, conocía como Comisión Church. Ún de los primeros actos d'esta organización criminal en que se convirtieron les fuercies armaes foi el derrocamientu cruentu del presidente llexítimu de Chile, fechu que ye plenamente conocíu poles imáxenes de televisión que reflexen el momentu en qu'aviones militares bombardeen el Palaciu de la Moneda.

Cada dictaor xenocida que muerre de vieyu na so cama, ye una batalla perdía. Estos fechos dan una imaxe perclara de cual ye l'estáu de la xusticia internacional.

Lleer Más...

La Cuenca Mutante

"La Nucella lapillus ye una caracola que s’alcuentra abondo nes ríes galleges. La concha mide unos dos centímetros y a simple vista paez normal. En más de 50 puntos estudiaos de Galicia, los científicos alcontraron exemplares fema con un pene milimétricu. Trátase del fenómenu llamau sesu impuestu o imposex, un efeutu de la contaminación química nos ríos. Tamién apaecieron carpes macho nel Ebru con ovarios y salmonetes afectaos en zones contaminaes de la costa mediterránea. Conocer l’impactu de la contaminación química sobre la salú humana ye percomplicado, pero estos casos d’animales transesuales sirven como indicador d’estos efeutos."
Fonte: El País.

La Cuenca lleva munchos años años acarriando un importante historial mutante. Tanto ye asina que los sos habitantes, tan avezaos a les radiaciones, a respirar gases nocivos y a sofrir mutaciones nes sos propies carnes. Ye curioso que lloñe d'algamar la inmunidá escontra estos cambios, la xente de La Cuenca, asimilolos a la so vida cotidiana, como un superheroe con superpoderes.

Asina, igual que a los pexes yos salen ovarios o pene (depende del sesu), a los paisanos de La Cuenca salioyos un vasu vino na mano, o un cacharru de ron nel so defeutu. A les muyeres, una taza de descafeinao con sacarina al llau d'un pastelín de merengue. A la mocedá, un palín güecu pegau a un furacu de les narices. A los gobernantes y xestores, una punta de fierro clavada na zona del celebru que te fai date cuenta de les inxusticies y fai que nos pongamos coloraos cuando daqué nos da vergoña. A los constructores saliéronyos puñaos de perres nes manes y nos bolsos. A los guajes crecioyos sobre les aspiraciones de futuru una borrina prieta y densa. Y a tola población en xeneral, el síndrome del conformismu, el rebañu y l'amnesia.

Lleer Más...

El Bolu Celta

El Bolu Celta, ye una modalidá de bolos que se conoz dende fai pocu tiempu con esti nome, pues enantes llamábase Bolo-Tinéu.

Por mor de que los bolos rebasaron el llímite del conceyu de Tinéu y de que n'otres partes se xugaben , de forma muy similar, recientemente

cambiose-y la denominación y unificáronse toes les variantes qu'había.

El campu del xuegu del Bolu-Celta tien:

Un Poyu- colocau nun estremo del terrenu, con una cueva poco caída del suelu pa propiciar l'impulsu. Tien que ser d'hormigón, de 35 cm d'altura y con 2 metros de llargo como poco. Convien que nun seya llisa pa nun resbalar.

La Llosa o Bolera - que se coloca delantre y ye onde s'armen los bolos. Ta a unos 6 metros y tien que ser llisa y con una pendiente para conseguir que los bolos ten al mesmu nivel que'l poyu.

La Raya de Diez - que ta a unos 24 a 27 metros del cientru de la llosera, ye de forma circular pa que los sos puntos seyan equidistantes al cientru de dicha llosera.

La Valla de Xuegu o Acabon - que ye la parte final y que ta a unos 30 metros de la llínea onde s'armen los bolos, tamién trazada de forma circular y con una altura de unos 10 metros.
Les Boles tienen que ser muy dures, con diámetru aprosimau de 19 cm y un pesu que pue dir de los 600 a los 900 gramos.

Tamién los Bolos tienen que ser de maeera muy dura. El pesu del bolu será de 150- 200 gramos y con forma de prisma de seición octogonal regular. L'altura del bolu será de 14.15 cm y tará cortau en bisel, con un puquiñín de desnivel pa poder axustase a la llosera o bolera que ta inclinada.

EL XUEGU

Faise un primer llanzamientu dende la " poya"- fuerte, pol aire y llanzando la bola escontra los bolos.

Pa qu'una xugada tea valor, ye condición indispensable que la bola pase la raya de 10, dempués de chocar escontra los bolos, por que si nun lo fai, considérase " un ceru".

Por cada bolu que tamién rebase la llínia de 10 consíguense 10 puntos, mientres que cada ún de los otros bolos que cayeren, valen un puntu.

Si un bolu sal despediu por encima del "acabon" na xugada, eso quier dicir ganar el xuegu.

Dempués ( sinon salió ningún bolu por encima del acabon) faise otra xugada que consiste en llanzar la bola rodando pol suelu dende la llínea de 10 pa llograr derribar los bolos, ya que cada ún de los derribaos suma un puntu.

Les partides son a 4 xuegos y cada xuegu ye a 50 puntos.

Lleer Más...

Pelayo, hestoria d'un gallegu??

Caleyando pela rede me tope... con un interesantísimu foru que falaba sobre los orixines del perfamosu Pelayín. L'artículu en cuestión escomencipiaba col trasgresor títulu de “Pelayo, historia d’un gallegu” . “Yá t'armá!!!” pensé.... Podéis velu equí:
http://www.celtiberia.net/articulo.asp?id=812
Nesti foru podéis atopar les milenta teoríes sobre l’orixe de Pelayo, yo decántome pola sostenía polos señores Barbero y Vigil... Caún barre pa casa.
Ehí vos va un resumen del asuntu.

Al escasiar les fontes y ser éstes de calter tardíu (les cristianes son del sieglu X), xurdió una lleenda alrrodiu d’esti personax hestóricu. nesti sen, aunque les cróniques Albeldense y Rotense atribuyen un orixe godu a Pelayo, esti datu foi cuestionáu por munchos hestoriadores, especialmente a partir del espublizamientu de los trabayos d’Abilio Barbero y Marcelo Vigil al respeutu: Resultaría paradóxico que los astures, que rebelaronse contra’l dominiu godu en tiempos del rei Wamba, aceptasen como caudiellu na nueva llucha contra los musulmanes a un aristócrata enemigu, pertenecíente a un pueblu que tan sólo veinti años antes reprimiere a Asturies. Per otru llau, nin siquier les rexones más romanizaes como la Bética y la Tarraconense opusieron una seria resistencia’l colapsu del reinu visigóticu, y la mayor parte de l'aristocracia visigótica, representada por condes como Teodomiro o Casio, aceptó’l nuevu dominiu omeya a cambio de conservar el so estatus. Incluso la viuda de Rodrigo, Egilona, casó con uno de los xefes de los conquistadores, Abd al-Aziz, primer valí d'Al Ándalus.
Además, les primitives cróniques asturianes como l’Albeldense, nun incluyen xenealoxía dalguna de Pelayo. Los primeros documentos que falen d’un supuestu árbol xenealóxico de Pelayo que lo fadría descendiente de Chindasvinto (como la Hestoria Xeneral d’España escrita pol rei Alfonso X el Sabiu) son cinco sieglos posteriores a los fechos. Nesti sen, la ideoloxía neogoticista que caltrió los reinaos d’Alfonso II y Alfonso III d’Asturies fizo desvirtuar progresivamente los oríxenes del reinu d’Asturies. Pretendíase entroncar los raigaños del reinu d’Asturies (qu’orixinariamente yera un movimientu de resistencia de los astures frente a los nuevos invasores) col estáu visigóticu, pa d’esta manera llexitimar les aspiraciones imperiales de los reis de Llión y de Castiella.
De fecho, l’antropónimu Pelayo nun ye xermánico (como lo son tolos nomes de los reies visigodos) sinón que deriva del griego πελάγιος (marín), lo qu'apuntaría a un orixe hispanorromanu del personax. Polo demás, dichu nome de pila yera usáu con profusión polos habitantes del Noroeste d’España, daqué que guarda cierta analoxía colo que sucedía na isla de Britania, donde’l llatín Pelagius yera a menudu un trasuntu del galés Morgan, que significaba nacíu del mar. Basándose nesti datu, dalgunos autores como Ignacio Gracia Noriega llanzaron una interesante hipótesis que supón que l’antropónimu Pelayo foi introducíu n’Asturies por aquellos celtes británicos que, inmigraren por mar dende la so patria nos sieglos V y VI, estableciéronse (según indica’l Parroquial Suevo) en Britonia, la rexón del Monasteriu Máximo y el territoriu de los astures. Nesta llinia dizse incluso la posibilidá de que’l propiu Pelayo fuera d'ascendencia británica .
En cualquier casu, lo cierto ye que les informaciones proporcionaes tanto poles cróniques cristianes como poles islámques presentanoslu como un personax estrechamente vinculáu a Asturies, y que poseía propiedaes fundiaries na rexón. D’esti mou, el testamentu del rei Alfonso III (recopiláu pol padre Flórez na so España Sagrada) menciona que Pelayo tenía tierres en Tiñana (Siero), non mui llonxe de Lucus Asturum, una de les ciudaes más importantes de l’Asturies romana y prerromana. Pola so parte, la crónica Rotense, señala que tres la so fuxida de Córdoba Pelayo abeyugose en Bres (Piloña) en plenu corazón del territoriu de los luggones argandenos y cerca de la so capital, Paelontium (Belonciu).
Asína mesmo, tanto Al Maqqari como Ibn Jaldún, atribuyíen oríxenes asturianos a Pelayo, y el primer d’ellos, al describir los socesos de Covadonga, califica’l personax d’asnu montesín, una denominación mui poco apropiada pa un pretendíu miembru de l'aristocracia goda y que fai pensar más bien nun caudiellu procedente de les montañes y apartáu de los refinaos centros de cultura romanovisigóticos. Los relatos d’otros cronistes musulmanes como Iban Al-Akir o Al-Nuwairi faen referencia a un llugar denomináu la roca de Pelayo conquistáu por Muza na so campaña de los años 712-714, y que los hestoriadores identifiquen col cerru de Santa Catalina, onde s'asentaben la primitiva ciudá de Xixón . El fechu de que’l topónimu portase’l nome de Pelayo bien a dicir qu’esti personax yera d’aquella’l gobernante llocal de la villa. En tal casu, el matrimoniu de Munuza cola so hermana Adosinda tendría como oxetivu reforciar el pautu ente l’aristocracia astur y los nuevos dominadores árabe-bereberes. Cabe señalar nesti puntu que'l rei Silo (ñacíu nel sen d’una familia de l'aristocracia pésica de la rexón de Flavionavia ) yera de madre musulmana y gracies a esta rellación de parentescu pudo concertar la paz con Al Ándalus.Por último nun puede dexar de resaltase'l fechu de que la transmisión del poder nel senu de la Monarquía Asturiana llevábase a cabu siguiendo regles d’orixe indíxena, residuos d’una anterior estructura matriarcal: Asina, la muyer a menudo transmitía drechos hereditarios al marido, como sucede nos casos de los reis Alfonso I y Silo qu’acceden al poder gracies a les sos muyeres Ermesinda y Adosinda, ambes de la familia de Pelayo. Sólo n’época posterior, a partir de Ramiro I, impónse definitivamente la socesión por llinia patrillinial.

Lleer Más...