29.11.06
El Día del Llazu Roxu
El vienres día 1 d'Avientu ye'l día mundial del SIDA.

El SIDA ye una enfermedá infeiciosa producida por un virus que ye nomáu HIV o VIH (Virus d´Inmunudeficencia Humana).
L´HIV alcuentrase en tolos llíquidos orgánicos d´aquella persona que tien el virus: sangre, seme, cuspiu, llárimes, lleche, calostru, orín, secreciones uterines y vaxinales ya´l llíquidu preseminal.
Pero solamente´l sangre, el llíquidu preseminal, el seme, fluyios vaxinales y la lleche materno, presenten una concentración suficiente como pa producir la tresmisión
Nómase-y persona que vive con HIV a la persona na que se deteuta que tuvo contautu col virus. Enfermu/a ye la persona na cuala deteutaronse enfermedaes causaes pola inmunudeficencia producida pol virus.
Nun toles persones que viven col virus tán enfermes.
L´infectáu o persona que vive col virus nun tien síntomes. El diagnósticu d´infeición por HIV efectúase nel llaboratoriu por mediu d´ún anális específicu, demientres qu´el d´enfermedá faese nún consultoriu mélicu.

Anguaño:
■ Más de 40 millones de persones viven con VIH, el 95% en países en desarrollu.
■ Cada añu hai 5 millones de nuevos contagios, 15.000 diarios.
■ Nel añu 2010 serán 100 millones les persones que vivan con VIH/SIDA.
■ Cada añu 3 millones de persones muerren por causa del VIH/SIDA.
■ Dexó más de 15 millones de huérfanos.
■ Nos países de medios y baxos ingresos 6.000.000 de persones necesiten tratamientu y namai un 6% tien acesu a él.
■ El 67% de les persones que viven con VIH/SIDA n'África son muyeres, en Asia ésti porcentaxe ye del 62%.
■ Nun tenemos una vacuna escontra el VIH, la inversión destinada a la so investigación ye mínima.
■ La Comunidá Internacional nun ta faciendo lo suficiente pa combatir eficazmente la pandemia y baxar la so expansión.

Fonte: http://ast.wikipedia.org/wiki/SIDA y http://www.globalsida.org/esp/001.html
 
Díxolo Tin a les 4:53 PM | Dir a la páxina d'esta entrada | 0 Bilordios
26.11.06
La Danza en Llangréu
Nel valle Llangréu, cuando aporta con puxu la industrialización pa finar el sieglu XIX, fai que maneres de vivir y les tradiciones enraigonaes a lo llargo los sieglos, entamen a aselar.Los antiguos bailles de xota, toques de panderu ya espresiones musicales más antigues, sele vandesaniciándose o camudando a versiones más modernes. El danzar pa finar les fiestes y romeríes siguió teniéndose por vezu col sieglu XX ya entamáu, pero les nueves modes musicales arrequexaron los moos más tradicionales cada vegada con más puxu y mesmamente meciéndose con estos. Esti ye´l casu de la Danza qu´entá güei, nuna versión mui evolucionada, podemos ver nel pueblu Barros de Llangréu. Los Pozaricos, qu´asina ye´l so xentiliciu, tienen-y un gran ciñu, tala ye que nos programes de les fiestes diz de bien en tiempu´l testu: “Tradicional Danza Prima, orgullu de los pozaricos y almiración de los visitantes”.

Los festeyos de La Purísima Concepción cellébrense en Barros el caberu fin de selmana d´agostu. A lo llargo la so hestoria siguen un programa que cuasi nun camuda un res, siendo´l día grande´l domingu y festexándose de llunes el día La Concepcionina. Ye de llunes al meudía cuando, tres los concursosde baille a lo suelto, por parte de pareyes espontánees del pueblu na Plazuela la ilesia, Pozaricos y foriatos cuéyense de les manes y entamen a danzar. Tratase d´una danza abierta, onde dos files de participantes, ocupen los dos llaos de la cai central del pueblu, y mécense na cola de les mesmes. Asina, entamando en La Plazuela, La Danza percuerre tol pueblu d´un estremu a otru, como queriendo marcar les llendes d´esti. Cunta la xente Barros qu´antañu hebo años en que la cabeza La Danza llegare a les llendes con La Felguera y entá nun acabaren d´allugase los bailladores de la cola. La música y lletra que l´acompangaron yeren les clásiques de “La Molinera Trillará ...” pero nesti casu nun se recurría al usu del romance“Galán d´esta villa”, sinón a coples referíes alpueblu Barros y a la so xente ya otres coses de calter popular. Nes últimes décades l´acompangamientu musical cuerre a cargu la banda música, magar que-y diere un tonu más gayoleru, tamién fizo que los pasos tradicionales d´acompangamientu se perdieren y dieren pasu a otros más saltaos o cenciellamente andaos.

Esti ye´l casu d´una danza tradicional evolucionada y tresformada col pasu´l tiempu polos sos lexítimos responsables, los Pozaricos, que magarque caltién el so nome y les formes de “Danza Prima”, estremase daqué cola más clásica na soexecución. En munchos pueblos del conceyu caltiénse polo menos el testimoniu de La Danza ente la xente y recuerden perbien dalgunes melodíes y cantares locales de la mesma.

Angüañu vese davezu, sobremanera nes cellebraciones de la Nueche San Xuan nos barrios y villes de Llangréu, anunciao nos programes de fiestes el testu: “Tradicional Danza Prima”. Ye vezu que pa esa ocasión se sofite la organización de la danza nun coleutivu de folclor o daqué asemeyao y el restu de participantes entren nella, tratando, coyer el pasu. Anque la interpretación testimonial de la danza queda reflexada d´esti mou, pierde´l so valir como espresión d´espontaneidá coleutiva y tradicional.

Esbillao del llibrín "Alcordanza", espublizau pola "Asociación d'Etnografía y Folclor Reija de Llangréu".

 
Díxolo Tin a les 1:33 AM | Dir a la páxina d'esta entrada | 2 Bilordios
22.11.06
Trabayu Infantil
Según la Organización Internacional del Trabayu (OIT), el trabayu infantil ye toa actividá qu'implica la participación de neños, neñes, y adolescentes na produción y comercialización familiar de los bienes non destinaos al autoconsumu o na prestación de servicios a persones naturales o xurídiques.

El trabayu infantil impide l'acesu, rendimientu y permanencia na educación a neños, neñes y adolescentes produciendo efeutos negativos inmediatos o futuros. Afecta'l desarrollu psicolóxicu, físicu y social de neños, neñes y adolescentes.

Unos 246 millones de guajes en to'l mundu trabayen pa mantenese a sí mesmos y a les sos families, en llugar de xugar o estudiar, como sería vezu a la so edá.
Unos 180 millones de ellos fáenlo nes peores formes. El mayor porcentaxe de población infantil (5 a 14 años) trabayaora ta n'África Subsahariana (29%), llueu Asia y el Pacíficu (19%), América Llatina y el Caribe (16%) y Oriente Mediu y África del Norte (15%).
 
Díxolo Tin a les 5:48 PM | Dir a la páxina d'esta entrada | 3 Bilordios
19.11.06
La Mani Prieta
Con unos minutinos de retrasu casi agradecíu polos que nos volvimos llocos intentando aparcar y llegamos col tiempu más bien xustu, arrancó la marcha de delantre la Estación del Norte d'Uvieu. La pancarta de cabeza tenía un testu curtiu, cenciellu y direutu. Detrás d'ella había una Bandona de Gaites compuesta por casi un centernar de gaiteros, y percusionistes, de delles bandes asturianes que consiguieron un soníu de potencia ablucante (lo que indireutamente silenció, en parte, los glayíos de los manifestantes), baxo la direción de Xuacu Amieva. Xunto otru grupu que dende la cola de la mani tamién diben tocando, ficieron la banda sonora de la manifestación, llamando en forma la atención de la xente que dende les ceres, veia alrodiu de 13.000 persones caleyar pola Cai Uria.
Por dientru de la maifestación comentábase la presencia del ciclista Chechu Rubiera y la escultora María Jesús Rodríguez, asina como'l deseu del árbitru de primera división Mejuto González, de asistir a la mani. Tamién se comentaben les declaraciones de Víctor Manuel, que parez ser qu'admitió que aunque nos años 80 podía entender la contraposición de les autoridaes a la oficialidá de la lligua de nueso, nun podía entender qu'anguaño siguieran oponiéndose. Foi una marcha, onde había xente de toles edaes y estayes de la sociedá, munches families colos fios, grupos de moces, collacios, cares qu'enxamás se hubieran visto nesti tipu d'actos demostrando una vegada más que la llingua ye cultura y nun entra en ningún estereotipu. Un exemplu de civismu que desarticula los intentos de criminalización por parte del sector más retrógradu del gobiernu de V.A. Areces.
L'actu finó na Plaza Porlier, onde la poeta asturiana Ana Vanesa Gutiérrez leyó'l comunicau de Conceyu Abiertu. Un conciertu del gaiteru Santi Caleya, Carlos Rubiera y Los Gatos del Fornu punxo'l puntu final a la xornada.
 
Díxolo Tin a les 4:29 PM | Dir a la páxina d'esta entrada | 6 Bilordios
15.11.06
Ye ver a yogui y pienso n'Asturies
Lo que hubiera dao TrayasgayA por tar fisgando por un furaquín el día que'l que ideó esta campaña, la espuso delantre los conseyeros de turismu del Principau. Imaxinaivos la escena.

L'autor, supongo que traería una bona presentación, llámines, power point de xuru, defendiendo con seguridá y convencimientu el puxu y validez de la so idea. Esplicaría que se necesitaba un personaxe que acompañara a dellos deportistes asturianos (xuntanza de fantasia y rialidá), un personaxe que la xente de tou l'estau español relacionara con Asturies y fuera reflexu de la variedá que'l turismu asturianu pue ufiertar a los sos visitantes. Tarde o tempranu llegaría el momentu cumbre al final de la esposición, cuando la atención de los conseyeros tuviere centrada en conocer la gran baza d'esta propuesta, la sorpresa final cola que convencer de que, definitivamente, taben enfrente de la campaña perfeuta, nel que la persona que defiendió esta esposición tuvo que ponese de pie (nun ye pa menos) y dicir:

"El protagonista de la campaña ye ¡¡¡El Oso Yogui!!!"

Si TrayasgayA tuviera un puestu na Conseyería de Turismu, lo primero que nos vendría a la tiesta, sería qu'esti home, nun tuvo tiempu a facer una campaña de verdá y copiólo de los deberes del so fiu escolín de 7 años.

La Nueva España: "La utilización de personaxes famosos incide un 25 por cientu más na intención de los consumidores. «Además de simpático y muy conocido, pone en valor la rica fauna del Principado, con el oso pardo como animal emblemático, y está vinculado a los valores de la marca Paraíso Natural». Esta campaña va suponer a les arques del Principau 400.000 euros, a los qu'hay que sumar los más de 3,7 millones que va costar la difusión, que tamién incluirá anuncios en prensa, radiu y sales cinematográfiques. Pa que «Yogui» sea el nueu embaxador d'Asturies en España ye necesario pagar drechos pola utilización de la so imaxen, que aguaño son propiedá de la Warner (EE.UU.), pol tiempu que dure la emisión del anunciu".

Cada ún, que saque les sos conclusiones, que d'esto, puen sacase delles...

 
Díxolo Tin a les 1:28 AM | Dir a la páxina d'esta entrada | 2 Bilordios
13.11.06
N'AST, una pérdida de tiempu M'AST.
Esti sábadu 18 de payares hai manifestación pola Oficialidá, compromisu ineludible al que naide que sofite la nuesa llingua tendría que faltar. Pues ta complicao... ¿Por qué?
Pues porque hai dos concentraciones a la mesma hora convocaes. Una la del CAO, y otra la de la recien creada asociación N'AST.
¿Cómo ye que pasen estes coses? La cosa ye cenciella, nun hai xunidá. Y ensín xunidá enxamás tendremos oficialidá.
Miestres "los que sofiten la llingua" s'engarrien... Nos siguimos falando, lleendo, sintiendo y fomentando unica y esclusivamente'l castellán.

Dende la mio parte, munches, munches gracies N'AST.


Presentación de la organización N’AST y convocatoria de concentraciones pal 18 de payares.

El prósimu miércoles 15 payares, a les 11:30, delantre la Conseyería de Cultura, tendrá llugar la presentación a los medios de comunicación de l´asociación N’AST asina comu la convocatoria de los primeros actos que l´asociación desendolcará (concentraciones del día 18-P)

N’AST ye una asociación que tien por oxetu la defensa de los drechos democráticos de los asturianos en materia llingüística, cola oficialidá de la llingua de Asturies y el rechazu a la segregación llingüística del ocidente asturianu comu custiones cimeres de la so actividá.

Nesi sen, en N’AST trabayeremos tantu pol aniciu d’espacios d’alderique, defensa dela toponimia tradicional asturiana, l’alfabetización y el deprendimientu del asturianu… comu na denuncia de los casos de represión llingüística y los sos responsables.

Per otru llau, énte la convocatoria de manifestamientu rializada pol Conceyu Abiertu Pola Oficialidá (CAPO), N’ast llamenta fondamente nun poder amestase a la mesma, en tantu consideramos que ye inaceutable la presencia d’IU ente los convocantes, cuandu esta organización, xunta’l PSOE la principal responsable de la situación de represión llingüística que carecemos n’Asturies, tantu comu parte del gobiernu “del Principado” comu de los estremaos gobiernos de conceyu nos que participa.
Asina mesmo, N’AST, comu organización que llucha pola xunidá llingüística del asturianu tampocu nun pue sofitar la defensa de la segregación llingüística que dende’l CAPO se rializa. Sicasí, sofitamos a toes toes la oficialidá le la llingua d’Asturies y a les presones qu´individualmente asisten con esti fin al manifestamientu.

En cualisquier casu, N’AST nun quier quedar al marxe n’esta xornada de reivindicación llingüística, y ello asina, amiestase a la mesma con una convocatoria propia pal prósimu día 18 de payares a les 18 hores consistente en dos concentraciones pola Oficialidá delantre les sedes del PSOE (Cai Santa Teresa) y d´IU (Plaza América), afitando qu´estos partíos son responsables directos de la represión llíngüística que carez Asturies.

Dende N’AST reiteramos la nuesa intención de participar na defensa de la oficialidá de la llingua d’Asturies dende la coherencia qu’atalantamos rixe la nuesa postura, con respetu dafechu a otres convocatories, y refugando dende yá, cualisquier intentu de manipulación nel sen de plantegar la esistencia de confrontación o enfrentamientu col CAPO y el manifestamientu por ellos convocaos.

Ensin más y agradeciendo la vuesa collaboración. Un saludu
 
Díxolo Xulio Nel a les 2:45 PM | Dir a la páxina d'esta entrada | 2 Bilordios
8.11.06
La Danza Prima n'Asturies

La danza davezu acompanga la cellebración de la fiesta de dalgún santu y ye común que se faiga referencia a esti nel trescursu de la mesma. Asina munches vegaes oyese falar de la Danza´l Carme, La Danza La Madalena, La Danza San Pedro ya otres munches. Les melodíes qu´acompanguen a La Danza son munches y perestremaes, y sofítense nes lletres de romances tradicionales o de cantares sueltos.Davezu los bailladores de bona voz entonen el romance o´l cantar mentantu´l restu los participantes repiten la lletra o faen estribillos. Otru mou ye que formen dos bandos que s´alternen na interpretación de les lletres.

El romance con mas sonadía de los que se canten cola Danza ye´l “!Ai! Un galán d´esta villa”, pero entá asina hai munchos otros que magar que nun seyan tan populares, tienen gran tradición. Cuando s´interpreten cantares, anque n´ocasiones puen ser de temática llibre, el vezu ye que se refieran al llugar, a los participantes o al santu al que se-y dedica la fiesta. N´ocasiones los cantares cárguense d´ironía y picardía faciéndose dances con munchu bulliciu y desinhibición. Davezu rematase la Danza con glayíos “ixuxú” o “Puxa” al llugar o al santu festexáu.

N´ocasiones la participación de mozos d´otros llugares ocasionaba enfretamientos, sobremanera nel momentu d´estos “Puxas”, cásique siempres acababen en fuertes engarradielles y sonaes
paliestres, al echar mano y facer danzar entós n´hombru ayenu aquellos palos qu´hasta esi intre danzaben sobre´l propiu. Como vimos, el danzar d´esti mou cunto y cuenta con una bayura d´estremaes versiones en tola xeografía´l país, asina tamién nes diferentes dómines hasta angüañu.

 
Díxolo Tin a les 2:49 PM | Dir a la páxina d'esta entrada | 0 Bilordios
Delincuencia y actuación policial nes faveles de Brasil: copaos na violencia
L’usu escesivu de la fuercia y l'actuación policial intimidatoria fáise sobre too contra comunidaes socialmente separtaes, y con ello esacérbase la violencia y criminalízase la probreza.
La violencia y la delincuencia son práutica xeneralizada en Brasil, especialmente nos núcleos urbanos.

En Ríu de Xaneiro y São Paulo, la violencia céntrase de forma abrumadora nes comunidades socialmente escluyíes (faveles) – les barriáes más probes d’estes ciudaes. Abandonaos na práutica pol Estau, muyeres, homes , neños y neñes inocentes vense atrapaos ente la presencia de poderoses bandes delictives y un cuerpu de policía corruptu y polémicu.

"Los probes nun llamen a la policía, tienen mieu."
Les fuercies de policía de Brasil utilicen métodos represivos que demostraron ser ineficaces. A la contra, contribuyen a la violencia y la delincuencia que deberíen prevenir.

Además de violar los drechos humanos de munches persones que viven nes faveles, les incursiones violentes y l’uso de fuercia escesiva contribuyeron a un procesu de marxinación y discriminación, criminalizando a comunidaes enteres y alienando a grandes grupos de población.
"Peguen, peguen, peguen, dempués dicen disculpa, nun fuisti tú."
Los sucesivos gobiernos brasileños fuxieron l'abordar l’usu incontroláu de fuercia lletal por parte de la policía.
Les agresives operaciones policiales, la escasez de formación y recursos de la policía, y la impunidá sistemática palos delitos cometios por axentes de policía consolidaron un ciclu de violencia qu’está tarazando a les comunidades probes y a la sociedá brasileña.
Amnistía Internacional publicó’l pasau 25 d’ochobre un documentu sobre la situación de los drechos humanos en Brasil, entregau al Comité de Drechos Humanos de la ONU, que diba a esaminar el segundu informe periódicu de Brasil sobre l’aplicación del Pautu Internacional de Drechos Civiles y Políticos.
Tres la introducción d’una llei contra la tortura en 1997, sólo se xulgaron en aplicación d’ella a un númberu llimitau de persones, y la tortura a manes de axentes del Estau sigui siendo xeneralizada y sistemática. Defensores de drechos humanos de too Brasil son víctimes de amenaces de muerte, intimidación, demandes por difamación y homicidios.
El Programa pala Protección de Defensores de Drechos Humanos, iniciado pol gobiernu federal l’añu pasau, supunxo una contribución notable a la promoción del llabor de quienes lluchen polos drechos humanos en Brasil y en tola rexón. Sin embargo, el programa sigui careciendo de la infraestructura necesaria pala so implantación efeutiva.

 
Díxolo Xulio Nel a les 2:20 PM | Dir a la páxina d'esta entrada | 2 Bilordios
6.11.06
XXIV Festival de Folclor de Llangréu

Les actividaes del Festival de Folclor de Llangréu d'esti añu entamaron el sábadu 28 d'ochobre pola mañana, cuando los guies del Grupu Reija fueron a recibir la llegada de los autocares nos que venien los representantes de los dos grupos envitaos d'esti añu, mientres qu'otros diben camín del nuevu teatru de La Felguera pa iguar l'escenariu y que too tuviera preparao.

Dempués acompañáronlos a los sitios onde diben a dormir esa nueche. Ún de los grupos tuvo la suerte d'estrenar el nuevu Albergue Municipal de Conceyu Llangréu, situau en Lada. A les 12 hubo una receición nel Ayuntamientu Llangréu onde se xuntaron dellos miemboros de los tres grupos participantes con les autoridaes llangreanes, col intercambiu de regalos protocolariu.

Sobre les seis de la tarde, entamó la xente a averase pol teatru (vieyu Cine Maripeña). El tiempu que faltaba pa que llegaren les siete la tarde, (hora d'entamu del festival) fízose más llevaeru al amenizar con música dellos componentes de los tres grupos, que se xuntaron a la entrada del teatru, colo que la xente foi calentando la oreya una hora enantes d'entamar.

El festival d'esti añu que llega a la so XXIV edición foi un ésitu total d'asistencia y organización. El teatru taba enllenu de xente llegada de dellos puntos d'Asturies, pero sobre too, de La Cuenca del Nalón. El públicu disfrutó en forma coles actuaciones del Grupu Reija, llocal y organizaor, y de los grupos "Virgen de Gracia" de Puertollano y "Xinglar" d'Aragón, que mostraron una gran profesionalidá a la vez que supieron coneutar col públicu dende'l primer momentu.


La xornada del sábadu piesllose con una espicha a les 10:30 de la nueche na sidrería "El Patio" de La Felguera, na que se fizo un autenticu mestizaxe del folclore de Ciudad Real, Aragón y Asturies, hasta altes hores (aunque se retrasara el reló una hora). Y como nes folixes en La Felguera ye vezu, La Pomar foi la encargada d'echar el pieslle a lo que quedaba de nueche.


El domingu a les 11 la mañana, pese al suañu y al cansanciu, fízose una visita al recientemente inaugurau, Muséu de la Siderurgia, que ta en Valnalón. Colo que se finaron los actos del XXIV Festival de Folclor de Llangréu y se entamó a trabayar pa la edición XXV.

 
Díxolo Tin a les 11:59 AM | Dir a la páxina d'esta entrada | 0 Bilordios
3.11.06
La Sidra Como Tien Que Ser. Parte II. La Mazana.
La mazana ye la "materia prima" de la sidra. Y nun val cualquier clas de mazana, porque pa que la sidra tenga dello d'ácido, dello d'amargo y dello de dulce faen falta races que-y dean esi sabor, sobremanera lo ácido y lo amargo. Munchos sieglos de cuidaos, d'ensiertos, d'escoyetes... faen que llegaren hasta anguaño una montonera de clases de mazana de sidra de les que poco más de cien tienen yá estudiáu y rexistráu'l so mapa xenéticu: mazana claro, blanquino, coloradono, raxao, durono, de Repinaldo, de La Riega, verdialono... son dellos de nos nomes.
L'árbol llamáu n'Asturies pumar o mazanal, suel plantase en güertes a la vera de les cases, formando lo que conocemos como pumaraes.

La vecería ye un fenómenu propiu del pumar: un añu da muncha fruta y pal otru da poco. La causa ente otros factores naturales, ta en que si un añu hai muncha mazana eso quita de que salgan los brotos de les flores que, pal otru añu van dar la fruta. L'añu qu'hai menos mazanes, hai más brotos y más fueya y, d'esa manera, va haber más fruta pal añu qu'entra. Y asina sigue la rueda.

La vecería xunta l'avieyamientu de les pumaraes, lo males que tán de mecanizar, lo mal podaes y cuchaes que se suelen tener, y otra riestra de causes económiques rellacionaes colos precios y la estructura de la propiedá, faen qu'heba poca mazana del país pa furnir los llagares de sidra y qu'heba que lo mercar fuera d'Asturies. Ehí tienen muncho que dicir y facer l'alministración y los productores de mazana, que, por cierto, bien se podíen llamar mazaneros- como de "sidra" sidreros, o de "llagar" llagareros- en cuenta del castellanismu "cosecheros" col que nestos últimos tiempos dan en llamalos.
 
Díxolo Tin a les 2:32 PM | Dir a la páxina d'esta entrada | 1 Bilordios
1.11.06
Escuela de Música Tradicional "Reija" de Llangréu
La escuela de música tradicional de la Agrupación d'Etnografía y Folclor "Reija" de Llangréu acaba de entamar el nuevu cursu académicu 2006/2007.

Ésta escuela entamó nel añu 1995 al dase cuenta dellos componentes del Grupu Reija , que nel entornu de la agrupación y nel ambiente que se movien había una necesidá de transmitir enseñances sobre instrumentos tradicionales y sobre too no relativo a pareyes de gaita y tambor que supieran tocar pa grupos.

La escuela, nel so entamu, daba clas de curdión, gaita y tambor. Llueu añadióse panderta, panderu cuadrau, baille, llinguaxe musical y cultura tradicional. Les clases impártense nes aules del Colexu Públicu "Eulalia Álvarez Lorenzo" que ta situau na Plaza Merediz de La Felguera, ente la Ilesia y la Biblioteca, mesmamente enfrente l'ambulatoriu. El Fechu de que les clases seyan nes instalaciones d'un colexu favorez que'l escolin tea una atención personalizada al disponer d'un aula pa él solu.

Una de les ventaxes de la escuela de música tradicional "Reija" de Llangréu ye que la propia escuela facilita l'instrumentu y el material didácticu. D'esta manera, l'escolín nun tendrá que facer un desembolsu importante de perres hasta que él lo decida, en casu de que siga afondando nel so aprendizaxe. Nun hai edá concreta pa entamar, nin por mozu nin por vieyu. La escuela adaptaráse a les posibilidaes del alumnu.


L'horariu de clases ye de 18 a 20:30 hores, los martes y xueves. Dempués del aprendizaxe individual del instrumentu, ponse en comuña lo aprendío con otros alumnos na modalidá de conxuntos musicales (pareya, bandina, etc.).

Pa más información pues pasar pol Colexu Eulalia Álvarez Lorenzo de La Felguera los martes o los xueves a partir de les 18 hores o bien llamar a los númberos de teléfonu:

985 67 54 96 - 676 69 14 24

o al corréu elletrónicu areija@teleline.es

 
Díxolo Tin a les 12:29 AM | Dir a la páxina d'esta entrada | 0 Bilordios