TrayasgayA pol Mundu. República Dominicana

República Dominicana, Setiembre de 2006.

19º 00' Norte, 70º 40' Oeste. La República Dominicana ye'l país situáu nel este de La Española, islla del Archipiélagu de les Antilles, ente'l Océanu Atlánticu y el Mar Caribe, inmediatamente baxo'l Trópicu de Cáncer, nel hemisferiu norte. Comparte la islla con Haití. La población dominicana ye d'alredeor d'unos 7.5 millones d'habitantes. El so nome derivase de Santu Domingu, el cual ye tamién el nome de la capital del país. La so moneda ye'l Peso Oro (RD$). El gritu nacional ye: Dios, Patria, Llibertá

La República Dominicana tien un territoriu de cerca de 48.440 km², un 1,6% d'esti ye d'agues dulces.
Tiene un clima predominantemente tropical y onde les lluvies son abundantes (1181 mm anuales), una temperatura media ente los 25-30 °C (Máximes: 30°, Medies: 25°, Mínimes: 20°C), el día expándese ente 11 y 13 h al añu, según la temporada.

La estación lluviosa abarca dende Mayu hasta Payares (destacándose Mayu, Agostu y Setiembre) y, por mor de les sos lluvies torrenciales, durante esta época súfrense numberosos corrimientos de tierra. Ye propensa al pasu d'huracanes (en promediu hay unu cada 7,8 años y una tormenta tropical cada 4 años) e inundaciones.

Un país onde un trabayaor d'un hotel trabaya 18 hores diaries, 4 son pa la empresa y 4 pal estáu, unes hores que nin les cobren nin les coticen. Trabayen 12 díes siguios y descansen 3.

Un país onde hay xente perprobe (munchos) y xente con perres abondo (pocos, pero con munches perres).

Un país onde te cobren una "tasa" de 10$ pa entrar (lo que me paez tener muncha cara) y otra de 20$ pa salir que sin nun pagues, nun te dexen garrar l'avión (lo que me paez un secuestru).

Un país onde los taxis son unes motuques onde van dos o tres paisanos normalmente y la xente conduz polos dos carriles pa esquivar los baches de les poques carreteres qu'esisten

Un país onde te faen descalzate pa pasar pol detector de metales na aduana de salida, y te "requisen" to lo que pase d'una botella de ron per tiesta y tolo llíquido que tengas, pero, na mai pasar a la zona onde tas esperando pa embarcar pues mercar to lo que te pete ensin que naide te lo revise y sacalo del país (alcohol, puros, colonies, etc.) y llevalo nel equipaxe de mano, cosa que tres metros atrás taba prohibío por unos homes con metralletes nes manes.

Un país estremau, de contrastes, dulzón, que güele a mamajuana, soleyeru, sele y baillaor

Lleer Más...

Asturies de duelu

Asturies y la música tradicional asturiana ta de duelu güei pola muerte d'El Gaiteru Veriña. José Antonio García Suárez morrió ayeri na so casa de Villaviciosa, a los 78 años d'edá. Con él Asturies pierde una de les figures más importantes del mundu de la gaita asturiana, un mayestru del nuesu instrumentu nacional, conocedor d'un amplísimu repertoriu, creador d'una forma de tocar que fizo escuela. José Antonio garcía Suárez, Pepe Veriña enriba l'escenariu, nun pudo superar un repentin infartu de miocardio.
Fai tan sólo unos díes que Pepe Veriña actuó nes fiestes d'Illas xunto a la cantante Mari Luz Caunedo.

José Antonio García Suárez, "GAITERU DE VERIÑA" ñació en Poago (Veriña) en 1928. fiu d'unu de los gaiteros renomaos de la época, "Ramón de Antón". A los 9 años empencipió a interesase pola gaita y, mientres llindiaba les vaques, prauticaba con un vieyu punteru que-y dexaba so padre. Mui mozu, con 14 años, debuta como gaiteru en delles fiestes.

Cuando tenía 15 años, tuvo la oportunidá d'acompañar nuna romería a la más importante intérprete de tonada asturiana d'aquel momentu, Obdulia Alvarez, conocía popularmente como "La Busdonga". Ente los años 1970 y 1977 forma parte de la agrupación asturiana "Así canta Asturias", baxo la direición de Manolo Delgado, teniendo la ocasión d'acompañar a diversos cantantes de tonada en festivales a lo llargo y ancho de Asturies.

Lo sos mayestros foron David Alonso (el segundu Llibardón) de Llanera, "El Xarreru la Cuesta", Valiente Carbayal de Bonielles y "Firme el Gásparu" de Villabona, de los que deprendió el so especial toque.

Grabó discos acompañando a munchos populares intérpretes de tonada, como José Noriega, Celestino Rubiera, Marcelino Meré "El Manquín", Agustín Argüelles, María Teresa Sampedro, Diamantina, "El Tordín de Frieres", Vicente Díaz, Avelino Corte o Josefina Argüelles. Tamién grabó en solitariu y con música popular. Le sos interpretaciones más conociess son "La alborada asturiana", "el fandango puntiau", "la diana floreada","el baile del centro" o "el Saltón".

Por último, actuó en varies ciudaes del Estau Español, como Barcelona, Vigo o Llión y tamién demostró la so destreza cola gaita en Bélxica. En abril de 1999 recibió'l reconocimientu a la so carrera como gaiteru por parte del Ayuntamientu de Xixón durante la cellebración de la "Nueche de la Gaita Asturiana", nel Teatru Xovellanos de Xixón.

Lleer Más...

La Zanfona

Siguiendo cola nuesa tradición de dar a conocer la cultura asturiana Trayasgaya quier enseñavos un puquiñín más d'un instrumentu de gran importacia na tradión musical de nueso, la zanfona.
A diferencia de la mayoría del instrumentarium occidental, la zanfona tien un orixe netamente européu, les sos primeres apariciones daten del sieglu X, d'un tamañu munchu mayor que'l d'anguañu yera conociu pol nome de “Organistrum”, y necesitaba del trabayu de dos persones. El so soníu yera tamién distintu, yá que pol so tamañu yera un intrumentu munchu más grave.
Ye desplazau mui luego l' “Organistrum” d'esti ambiente monásticu polos primeros órganos, sieglos XIII al XVII, y pasó a ser utilizáu por xuglares y ciegos, pa entoncenes la so evolución constructiva reducio-y'l tamañu, y una sola persona podía facela sonar actuando sobre'l tecláu cola manzorga, al tiempu que xiraba la rueda cola diestra.

Aportariemos asina a lo que güei conocemos como zanfona.
La zanfona ye un instrumentu de cuerda, una rueda resinada xeneralmente de madera frota les cuerdes (dos o tres) faciéndoles vibrar, mientres un tecláu incide sobre elles cambiando la so llargura y xenerando les diferentes notes. Al tiempu hai un númberu variable de cuerdes fuera'l control del teclau y que producen notes pedal o d'acompañamientu (bordones), el so teclau suel ser cromáticu y de dos octaves d'extensión; la caxa armónica varia la so forma.La so puesta a puntu tien numeroses dificultaes pal principiante, dizse del zanfonista que “ pasa la metá'l tiempu afinando, y la otra metá tocando desafinau.

Esti instrumentu introduzse n'Asturies a traviés del Camin de Santiagu y parez que'l so usu extendióse a tol país, tanto en solitario como pa acompañar bailles y canciones.
Tres munchos años de recuperación del instrumentu la zanfona anguañu ta mui presente na música tradicional asturiana, son munchos los grupos y bandines que fain usu d'ella, pero de toes formes paez que por agora el so futuru n'Asturies nun ta asegurau.

Lleer Más...

¿Qué pasa en Caliao?

La Plataforma en Defensa del Parque Natural de Redes organiza una acampada solidaria pa los próximos díes 22, 23 y 24 de setiembre nel pueblu de Caliao. Los asistentes a la concentración van conocer de primera mano les demandes d'esti colectu enfotáu na protección de la reserva natural, al tiempu que van poder esfrutar d'escursiones pela zona, nes que van asistir a la berrea de los venaos asina como pasiar pel desfiladeru de Los Arrudos.
El vienres día 22 ta prevista la salida n'autobús dende l'edificiu de les conseyeríes de Llamaquique, n'Uviéu con destín a Caliao, onde se va desplicar a tolos participantes el motivu de l'acampada, al traviés d'una proyección de diapositives. A lo llargo de los díes que dure la concentración, habrá escursiones pela zona nes que va poder asistise a la berrea de los venaos, asina como a diverses charres y alderiques organizaos por Itoiz, Fundación Rodríguez de la Fuente y la Plataforma de Redes.
Les nueches de l'acampada van tar amenizaes por trés velades musicales.
L'oxetivu d'esta acampada ye'l de reclamar un cambiu na política del agua n'Asturies y una nueva cultura del agua, refugando instalaciones como'l pretendíu embalse de Caliao.
Per otru llau l'acampada divide a los socios de gobiernu asturianu. Mentes que los responsables de Medio Ambiente del Principáu prohibieron la celebración de tala acampada a traviés d'una nota unviada pola Viceconseyería de Medio Ambiente, firmaba pol director xeneral de Recursos Naturales, Cristino Ruano, el conseyeru de Xusticia, Francisco Javier García Valledor, manifestó'l rechazu a esta decisión, de la que desixó la 'inmediata rectificación', afalando a los participantes a mantener la convocatoria por tar dientro 'de l'absoluta normalidá democrática'.
Pesie a la polémica, los responsables de l'acampada, qu'aseguren nun ser a creyer esta decisión per parte de la Conseyería de Medio Ambiente, mantienen la convocatoria, yá que va tiempu qu'ésta taba en conocimientu del director Conservador del Parque de Redes, y amás cuenta cola autorización del Ayuntamientu de Casu pa facer esta actividá al traviés del Alcuerdu de la so Comisión de Gobiernu de fecha 23 de mayu.

Fonte: ASTURNEWS

Lleer Más...

La Curdión Diatónica

Curdión
De “Instrumentos musicales en la tradición asturiana” de Eugenio M. Zamora.

La curdión ye un instrumentu que fai poco que se inventó. En 1821, Buschmann patentolu col nome de habd-Aoline, aunque foi l’austriacu Demian el que rexistró el nome de “acordeón” nel 1829. Esti Vienés introduxo dellos cambios, dando-y al instrumentu cinco tecles, que producien dos acordes según puxaras o tiraras del fueye que facía que vibrara la llengüeta metálica de dientro. El belga Buffet entamó la construcción de curdiones pa la so comercialización en 1830. En 1859, el francés Bousson creó la curdión piano, na que sustituía da doble filera de botones.

Hasta que llegó la curdión de piano, utilizábase la de botones. Podíen tener una o dos fileres de botones y de dos a cuatro baxos, como norma xeneral, aunque habíales hasta con tres fileres de botones y un númberu respetable de baxos. La principal característica d’estes curdiones ye que la según puxes o tires del fueye, camudes la nota resultante.

Vien manteniéndose que la curdión tuvo una implantación principalmente y de sobremanera sobre’l restu d’Asturies nel ocidente asturiananu. Amás, argumentase que esto ye por la escasa esistencia de la gaita de fuelle en munchos de’estos conceyos. Aunque el que se recuerde y se conserve más nel ocidente que nel restu d’Asturies pue esplicase pol mesmu fechu qu’esplica que otros instrumentos, bailles, canciones o tradiciones se conservaren meyor tamién n’esta mesma fastera; menos penetración de aspectos culturales foriatos, un carauter rural más marcáu, un ciertu aislamientu, etc..
La curdión tuvo una acoyida meyor nos conceyos onde nun había escasez de gaiteros (a la escontra de la teoría que diz que la curdión implantose meyor nos conceyos onde casi nun había gaiteros). Yera’l so carauter novedosu, la so mayor carestía, y la so asociación colo novedoso, lo que aumentaba la estima social hacia esti instrumentu. Estes carauterístiques y la asociación col baille agarrao, foi lo que provocó n’algunes vegades una particular enemistá escontra la curdión por parte de los sectores más conservadores del mediu rural.

N’esi sen, la curdión, nun tenía comu enemigu a la gaita sinon a los modernos gramófonos. Nos pueblos que había éstos aparatos, yera más fácil que desapaeciera la curdión, que n’aquel tiempu, ya taba implantada. Nun ye que la curdión tuviere más implantación nel ocidente asturianu, ye que n’esta fastera, la curdión nun foi sustituida por otros instrumentos que-y facien direutamente competencia, o pasó más tarde.

Manténse que la curdión foi introducida n’Asturies de la mano de los maestros l.lazaniegos na segunda década del sieglu. Nos pueblos altos del Pueru L.leitariegos, apaeció en 1917. En Zarréu metióla sobre’l añu 1915 una paisana en San Miguel de L.laciana, pero dalgunos años enantes, ya yera muy popular nos conceyos ente’l Eo y el Navia y en dalgunos conceyos del cientru d’Asturies, ensin que los l.lazaniegos tuvieren na que ver.

Lleer Más...

L’asturianismu.

L’asturianismu podría resumise brevemente como la lloca hestoria d’un folki, d’un políticu de turnu, d’un activista y por supuesto del bablista. Toos ellos baillando al son que marca un Payaso del PS?O?E nun rap ensin sentíu algún que s’enfota n’amosanos una realidá que nun esiste namás que na so cabeza. Una realidá sofitada peles perres que vienen d’Europa a mou de Fondos y hosties que nun sirven nada más que pa enterranos un puquiñín más. Un puñaín más de tierra, un ladrillu más nel nichu que llamen “Principado de Asturias”.

Nel vículu podeis ver un vidiu PERSIMPÁTICU, l’humor ye lo único que mos queda...

Nel vidiu, el Folki ta representáu por un ente azul, de barbona, de xuru que ye de los de Belenos (non sólo pola barbona tamién tien una barriga cosiderable); El políticu de turnu pol ente colloráu, va de collarao porque suponse que ye d’izquierdes; l’activista ye’l mozu andecheru que mos “jode” los cartelos, l’ente amariellu (color patrióticu); el bablista, nun fai falta desplicalo ye por supuesto La Pita de la Xunta.
Por último quedarianos el Payaso, creo que se ve bien quien ye.

Espero que vos preste. PINCHAI
http://www.youtube.com/watch?v=rjlAHcY7O1k

Lleer Más...

Calentamientu Global

Plaza Merediz. Setiembre de 2006. 15.25 hores. Llangréu. Asturies. Daqué ta camudando...

El calentamientu global que s'espera a finales d'esti sieglu va ser dos graos más severu que lo que s'esperaba, con un incrementu de 7,7ºC, pol impactu nel clima de les emisiones adicionales de CO2 y metano que xenera'l planeta espontáneamente por mor del calentamientu global. Calcularon l'impactu d'estes emisiones estudiando los datos del clima que se oculten baxo los xelos polares. Na Península Ibérica, esperase que les lluvies baxen hasta un 30% y que los mares xuban ente 10 y 80 centímetros.

A esti aumentu de la temperatura podría sumase 1,5ºC por mor de la retroalimentación positiva nel clima a causa del desxelu del xelu marin, la desconxelación de los xelos perpetuos y la acidificación de los océanos.

Prebes del cambiu climáticu:
* El xelu del mar Árticu baxó en un 2,7 por cientu por década dende 1978 y en un 7,4 por cientu cada década durante los meses del branu.
* Cinco de los seis años más cálidos diéronse nos caberos cinco años, siendo 2005 y 1998 los años más cálidos enxamás rexistrados.
* El nivel mediu del mar aumentó a un ritmu d'aprosimadamente 2 mm al añu ente 1961 y 2003, y por términu mediu más de 3 mm al añu ente 1993 y 2003.
* Los glaciares de les montañes y el xelu terrestre polar derritiéronse a más velocidá de la que se formaron durante los caberos 40 años.
* Les temperatures de la fastera de xelos perpetuos aumentaron por términu mediu, y la superficie cubierta por tierres xelaes estacionalmente baxó en un 7% nos caberos 50 años. http://www.ecoportal.net/

Lleer Más...

Dios te llibre de Castiella

Diez años entardo Roma n'afincate tola espuela y fuisti en Covadonga la primer nacionaliega.
Y xunto a Gonzalo Pelaez - cuntia la hestoria llariega - derrotesti tres vegaes al mesmu rei de Castiella.
Dempues el llobu extranxeru púnxote la cara prieta sacó l'oru de les mines dexote probe en to tierra.
Entós solina n'ochobre dexesti un poco la cueva fasta ponete en comuña otra vez cabezalera.
Contra'l silenciu y el mieu de la posguerra cabera en llevantate dafechu tamien fusti la primera. Per eso Asturies del alma, el pasau nun lu escaezas y si lu escaeces un día:

Dios te llibre de Castiella!!!

Lleer Más...

Coincidencies

Esbillao de www.asturies.com 08/09/2006
Radio Sele, la emisora que dende 1986 emite dafechu en llingua asturiana, vio como ayeri, col entamu de la emisión en prebes de la Radio Autonómica del Principáu d'Asturies (RTPA) la so emisión quedaba tapecida pola señal del'autonómica. Ello ye que mientres Radio Sele emite dende'l 106.5 de la FM con 50 watios de potencia, l'autonómica failo dende'l so repetidor principal del Gamoniteiru nel 106.4 con 120.000 watios. Según esplicó a Asturies.com el director de Radio Sele Xuanxo Mariño, siempre qu'una emisora tea a menos de trés mhz de la frecuencia que tenga más allegada, ye normal que se tapezan la una a la otra. Nel casu de Radio Sele, la descomanada diferencia de potencia d'emisión respective a la emisora del Principáu fizo'l restu. Xuanxo Mariño nun ve intencionalidá nel fechu de que l'autonómica ocupare'l so dial, pero si que-y abulta estraño qu'una emisorade les característiques de l'autonómica emita más allá del 106 de la FM, onde entama lo que se conoz técnicamente como "zona puerca" del dial. Pa iguar esta situación, Radio sele yá-y tien solicitao al departamentu competente en Telecomunicaciones autorización pa emitir dende otru puestu nel dial, el 106.1, que se cuenta con que tea disponible nos próximos díes.

Lleer Más...

La Ñatura ye Sabia

Dos animales, que dende'l entamu la so esistencia fueron enemigos naturales na llarga guerra de la supervivencia, xúntense dende fai tiempu, pa asegurar la supervivencia d'otru animal, l'asturianufalantis escaezus.

Viendo la inutilidá del xeitu los homes, les fuercies de la ñatura, trabayen en comuña pola xusticia na evolución llóxica nos drechos d'Asturies. Primero foi'l Merucu Xusticieru, que ya apaecía nos años 90, cola xera d'iguar los errores del home. La Pita de la Xunta ye más reciente, menos nocturna y tien el enfotu d'esparcer la verdá sobre la marxinación del pueblu asturianu, tea quie tea delantre. Enantes, faciense cancios a la Xana o al Nuberu, aunque naide enxamás los viera. Angüaño, la Pita y el Merucu, tienen el so respeutivu canciu. Unu ye más fácil de ver qu'otru, pero comu la xana, o'l trasgu de los nuesos güelos, los dos anden ente fontes, glorietes, manifestaciones y llares.

Lleer Más...

La Venganza

"El camín del home rectu ta por toos llaos rodeáu pola avaricia de los egoístas y la tiranía de los homes dañinos. Benditu sea aquel pastor que, nel nome de lacaridá y de la bona voluntá, saque a los débiles del Valle la Escuridá.Porque él ye'l verdaderu guardián del so hermanu y el descubridor de los neños perdios. ¡Y asegurovos que vendré a castigar con gran venganza y furiosa cólera aquéllos que quieran envenenar y estrozar a los mios hermanos! ¡Y tú sabrás que'l mio nome ye Yahveh, cuandu la mio venganza caiga enrriba ti!"

Pulp Fiction, 1994. Citando, supuestamente, un pasaxe de la Biblia del profeta Ezequiel 25:17, auque en realidá, esti pasaxe nun ye asina, sinon una versión asemeyada pero muncho más curtia que profetiza la venganza de Yahveh escontra los filisteos.

Lleer Más...

El Besu de Judas

Durante tola Hestoria de la Humanidá l’home, na so condición de ser vil y miserable, destarráu del Paraisu, condergáu a sofrir la vida y con ello’l dolor de vivir, nun pudo impedir cayer una vegada tres otra nel pecáu de la traición. Si ficieremos un rápidu repasu pola Hestoria Univesal veriemos que’l braeru motor ,el verdaderu impulsu que fai caminar a la humanidá, nun ye la llucha de clases que dixo Marx o’l deseyu d’enriquecese y ameyorar que dixo Adam Smith, ye la dominación del otru, el tener más que l’otru, ser más que l’otru y que l’otru lo sepa.

La nuesa hestoria podía resumise nuna simple llucha d’unos contra otros por quien se situa enrriba la pirámide, quien ye’l dueñu del mundiu. Un mundiu que cambia col tiempu. Fai 20.000 años el mundiu yera una biesca, unes praderes y la caza que había ellí, fai 2.000 años el mundiu yera'l Mediterranéu y el so comerciu, fai 1.000 yera la Europa feudal, Güei ye’l planeta tierra y les sos reserves naturales.
Quien manda en casa, d’una manera particular, la eterna llucha del Home cola Muyer.
Reflexionai n’ello...

La traición definese como la violación de la llealtá y la fidelidá debies a daquién, un compañeru, un collaciu, un paisanu. Traición, embullu, enfallu,engañiza, falcatrua, falsura, fraude, ximuestra, zurdada.

¿Ye’l ser humanu un traidor innatu? ¿Tú que opines?

Lleer Más...