La Fuxida, últimu capítulu.

4. ANIMALES

Tuvo un bon cachu al llau d’aquel home. Quedare durmíu y nun se diere cuenta. Sentíase seguru al par d’aquel paisano. De xuru que nadie se-y diba acercar con esa compañía.
Yera hora de volver marchar. Estiróse, sacudiose’l suañu qu’inda-y pesaba como fierro, y cola cai menos torgada cruzó rápidamente al otru llau.
Yá conocía edificios y, anque entá taba un poco llonxe, empezaba a averase a so casa.
Anduvo ensin volver la vista, ensin aparase, rápidu pero sollerte. Saltó una muria p’atayar camín y, per primer vegada en dos díes, sintióse seguru.
Enriba la cuesta podía acolumbrar lo que yá yera’l so barriu. Baxó otra vez al suelu y siguió andando.
Entós viola.
La nueche taba morriendo y ella siguía na cai. Otra víctima del mundu. Otru animal de la nueche d’aquella ciudá. La diferencia yera qu’a ésta conocíala. Yera tarde, y a ella nunca-y faltaron pretendientes, nin seguridá, nin comida, nin onde durmir. ¿Qué facía entos equí?.
Bono, supongo que una mal día tienlu cualquiera, y pa los que trabayen de nueche cada día yera diferente. Cada día tenía una hestoria.
Allegóse a ella silenciosu. Taba comencíu de que, de toos, él yera’l que más-y gustaba. Ella sintiólu venir. Miró pa él.
La nueche, azul, morría yá. La so figura distinguíase ente les formes de la cai. Ella esperólu.
Llegó hasta ella. Miróla. Pasaron unos segundos callaos.
Moridóla na boca. Baxó pal pescuezu llevándola hacia l’interior de la calixón. Ella nun se resistió. Tolo contrario.
Emburrióla escontra la paré y púnxose tres d’ella d’un movimientu bruscu. Ella sospiraba. La so respiración foi acelerándose.
Cuántu tiempu…
Mordió-y una oreya. Ella quexóse. Y nesi momentu penetróla…
Claváronse uñes en llombu. Apretáronse los cuerpos. Él siguió penetrándola rítmicamente ente xemios y quexes…

Llegaron al cenit. Él separtóse rápidamente gandíu. Ella quedóse escontra la paré col corazón fuera’l pechu.
Malpenes unos segundos…
Mirólu. Él nun supo qué facer y ella decidió marchar ensin dicir nada.
Demprués d’esi momentu románticu ente dos contenedores de basoria, demprués de follar, de xuru que eso nun pidia dicise que yera facer l’amor. Naquella escura caleya d’aquella escura y sucia ciudá, dos seres como ellos nun podien facer l’amor. Demprués d’aquel alcuentru, volvía a tar otra vez solu. Siempre tuvo sólu, y yá yera demasiao tarde pa cambialo.
Otru día lluchaba por xurdir de la escuridá de la nueche que taba morriendo y eso significaba que´l so tiempu yá terminaba. Saliendo d’aquella caleya, punxo camín a casa, al descansu. Sólo tardó unos minutos en llegar a lo qu’él llamaba llar. Una casona en ruines que llevaba años abandonada. Xubió peles escaleres y llegó a un cuartu nel que solía durmir. Yá taba en casa…
Chóse enriba d’unos cartones que facíen de cama. Enroscóse usando la so llarga cola negra como manta pa tornar el frío, llambió durante unos pocos segundos el so llombu emporcáu col polvo del viaxe y, a la fin, ciarró los güeyos, a la fin podía descansar.

Lleer Más...

Gasolina de La Cuenca

Esbillao de www.asturies.com 24/08/2006
La planta de biodiésel de la empresa asturiana Bionorte, filial del grupu d'inxeniería Isastur asitiada en Sotrondio, va entamar a distribuyir el mes qu'entra'l so productu a gasolineres de las Cuenques. El carburante verde que se fabrica a partir de la recoyida de grases y aceites vexetales de la hostelería asturiana va ponese a la venta nun mezcla al 30% con gasóloeo mineral en dos gasolineres de Mieres y de Llangréu nún primer pasu pa dempués entamar a dar serviciu fuera de les Cuenques.

Bionorte tenía previsto doblar nesti añu 2006 la producción de biodiesel, pasando de los 12.000 llitros diarios a los 24.000. La distribución del so productu en gasolineres ensin abanderar por grandes multinacionales yera ún de los oxetivos más de vieyo de la casa, pero tanto les torgues alministratives como'l factor del preciu final del biodiesel retrasaron la llegada de biodiesel a los surtidores. Ello ye que'l biodiesel ha vendese mecío con gasóleo convencional mineral, que les petroleres vienden a Bionorte a precios de mercáu convencionales, colo que'l preciu del gasoil mecío de mineral y biodiesel ye más altu que'l del gasoil convencional.

El biodiesel, que se consigue al traviés d'un procesu de tresesterificación de la grasa vexetal ayuda a menguar el consumu y les emisiones contaminantes y meyora l'engrase del motor. Les flotes de coches de tresportes urbanos y vehículos d'empreses son de momentu'l principal consumidor nel mercáu internu del gasoil "verde" asturiano.

Lleer Más...

El Tambor Asturianu

Esbillao de la Web de la Gaita Asturiana.

El tambor n'Asturies siempres foi el ximielgu de la gaita y el más popular y reconociu. El nuesu tambor nun ye ni más ni menos que'l tambor d'infantería de la época Napoleónica, que sal del ámbitu militar y incorporase a la música tradicional, quiciavis durante la Guerra de la Independencia o les Guerres Carlistes. L'orixe de los colores roxu y azul de Prusia ye la de los colores del exércitu d'entos. Estos tambores pudieron vese nel Exércitu Español fasta 1948. Durante un tiempu, al entamu del sieglu escomencipió a utilizase percusión más moderna, comu caxes clares, que se utilizaron en les bandines típiques asturianes de gaita, clarinete, caxa y bombu, aunque angüaño casi nun se usen. El soníu del tambor produzse al percutir unos palillos sobre'l parche superior y la so finalidá suel ser la de acompañar la gaita. La téunica del tambor ye complexa a lo que hay que que añadir la particularidá asturiana de facer toques d'aru (tocar de un solu golpe el aru de maera y el parche faciendo un soníu secu y fuerte). El bon tamboriteru nun fai namai un toque cenciellu, sinon que va improvisando durante'l canciu, adecuándose a ella como meyor-y parez; pero enxamas debe pasar en volúmen y melodía a la gaita, recordando siempres que'l tambor acompaña y non interpreta. Los tambores más vieyos conservaos son del sieglu XIX y suelen tar fechos en color ñatural o roxu y azul.

TAMBORITEROS CONTEMPORÁNEOS
N'ASTURIES:
Javier Tejedor, Efrén Vigil, María José Hevia, Manuel Durán, Andresín "el d'Insiertu", David Varela, Manuel A. Cordero.

ESCUELES DE TAMBORITEROS VIEYOS:
Escuela central:Luis Sarilles, El Borle, Bernardo Candamo, Xuanón el de Viella, El Pimientu, Bernardo el d'Ables, José Mariño "El Xarreru fíu", El Quexu, Emilio Fernández "El Torneru", Daniel Pérez "El bomberu", Pachín "el de Villaperi".
Escuela Villaviciosa-Xixón:El tambor de Quintes, José Viña, Pepe "el tambor de l'Abadía", Sabino Cifuentes, Pepe Blanco.
Escuela de les Cuences:Cundo "el de Pola", Chema Castañón, Machacón.

El tambor tradicional tá compuestu básicamente por tres pieces cilíndriques vaciaes de maera. Una d'ellas, la de mayor altura, ye la que conformará la forma del tambor, esta pieza ye'l bastidor y enrriba d'ella reposen el restu de pieces. Esti bastidor ye xeneralmente una llámina de maera curvada al vapor o conformada por una serie de tablilles. Los otros dos cilindros menores o "aros" van encaxaos en los extremos del bastidor y son los que oprimen a los parches escontra d'él. Estos aros son perimportantes nel tambor asturianu.Son denominados "parches" los peyeyos onde se percute. Estos peyeyos de corderu (non muy recomendable), oveya o cabritu tomen la forma circular al estar embuties nun aru que queda presionau baxu los aros del tambor.La tensión del tambor consiguese gracies al cordelaxe que cubre y ata toles pieces d'una manera especial y que tamien vese tensáu por una serie d'anillos de cueru nomaos "tensores, apretones o templaderes". que se faen baxar polos cruces de les cuerdes pa aumentar la presión.Sobre'l parche d'abaxo topamos 4 bordones o "guitarres" de tripa de gochu estirada, que se puede afinar con una "mariposa d'afinación" que ta a un llateral; los bordones son tires que vibren por simpatía a un parche y que meyoren el soníu xeneral del tambor.

Lleer Más...

La Fuxida, Capitulu 3

1. SOLEDÁ Empezaba a sentir otra vez les fuerces. Nunca nun les perdiere. Taben ellí guardaes, escondíes na reserva y agora llegaba’l momentu de sacales. Incorporóse, miró alredol d’aquel escuru llugar, punxo la oreya y nun sintió nada. Demasiada calma de toes maneres. Demasiada esperiencia. Pocos años, yera mozu, pero tenía muncho vivío tres d’él y nun diba baxar la guardia hasta que supiere a ciencia cierta que taba seguru. Escomencipió’l camín, ensin prieses. El parque yera escuru y nun quería llamar l’atención de nadie nin gastar les fuerces en baldre. Llegó hasta la cera onde terminaba yá’l verde y empezaba otra vuelta l’asfaltu, los edificios, les lluces, los coches y les pantasmes d’aquella ciudá. Pero, más que nada, lo que volvía yera’l peligru. Pasó rápidamente una cai vacia y dexó’l parque tres d’él. Los edificios altos y los calixones estrenchos valíen d’escondite d’aquellos que lu andaben buscando, o quiciás de trampa pa los qu’entá nun lu conocíen y que de xuru que nun-yos diba prestar muncho velu rondando per ehí. Andó unes cuantes hores evitando les cayes enceses y los ruios de la ciudá, hasta que nun-y quedó más remediu qu’abandonar la clandestinidá, dexándose ver. Si quería llegar a so casa nun-y quedaba otra. Enclicáu al par d’unos contenedores de basoria nuna caleya que diba aparar nuna de les cayes principales, esperó’l so momentu. Había demasiada xente, demasiau xareu y taba demasiao cansáu pa correr como otres veces. Copáu pola muerte y desesperáu, esperaba la ocasión pa escapar. Entóncenes sintió a dalguién que lu llamaba, faciéndo-y saltar el corazón del pechu. “Yá m’atoparon”, pensó. Pero nun tuvo tiempu a fuxir. Taba demasiao cerca yá y pillólu tan de sorpresa que diba ser en baldre. Quedóse quietu y encoyíu al pie de los contenedores, pero volvió la vista hacia onde lu taben llamando. Yera un paisano vieyu, l’amu d’aquella caleya seguramente, con un cartón de vino na mano, y vistíu con ropa sucio y medio desfecho. Tiráu en suelu allegó-y la mano, nun xestu d’amistá. - ¿Qué tal, ho? Quietu, ensin nin tan siquier mover un musuculu, quedose mirando a aquel paisano colos güeyos asustaos, el xestu atemorizau y el cuerpu paralizau pol miéu. - Una mala nueche, ¿eh? Él tamién yera víctima d’aquel mundu. Ún más d’esa fauna nuecherniega. Quedó llantáu en suelu, mirándolu. Diba tanto que nadie-y dicía una bona pallabra. Diba tanto que nadie se-y acercaba. - ¿Tienes fame? L’home dióse cuenta de lo ruin que taba y del cansanciu qu’arrastraba, asina qu’allegó-y un puquiñín de comida que guardaba nuna bolsa. ¡Comida! Llevaba muncho ensin comer nada, de manera qu’aceptó’l convite de bona gana, sentándose a acompañar a aquel paisano que yera tan xenerosu con él. Y que taba tan solu como él. Continuará...

Lleer Más...

La Fuxida, Capítulu 2.

2. LA LLEI DE LA ÑATURA

El frío, la fame y la llercia yeren un pesu demasiao grande pa llevar a recostines per tola ciudá tola nueche y entamaba a pensar que nun diba tener salida. Un poco primero o un poco más tarde diben alcontralu y entós yá nun diba poder resistise. Nun diba poder defendese y nin siquier diba poder fuxir.
Taba flacu, estalagáu. Los güesos marcábense-y per tol cuerpu como una cadarma en movimientu. El so rostru yera’l meyor exemplu de la dureza d’aquellos tiempos.
Una antigua cicatriz dibuxába-y una llarga ceya blanca enriba un güeyu. Recuerdu d’un collaciu de la nueche. Esi día sí que se defendiere.
Anque yera nuevu conocía de sobra que’l mundu nun yera un sitiu pa débiles. Esa nueche, ensin comer, ensin descansar, diba ser una presa fácil. Él tamién fixere otro tanto si daquién entrare nel so territoriu pa quita-y lo d’él. De xuru que lu mataría. Siguiríalu hasta dar con él y nesi momentu yá podía tar preparáu. Yera la llei de la ñatura. La llei de la cai.
Naquel mundu esconocíu pa munchos, qu’escomencipiaba cuando’l sol s’escuendía tres de los edificios y millones d’estrelles artificiales prendíen el cielu, la vida siguía. Él yera ún de tantos de los que vivíen de nueche, na clandestinidá, na escuridá, evitando güeyos indiscretos y faciendo la única cosa que sabía facer: sobrevivir. Y diba facelo. L’instintu emburriábalu camín alantre, llevantando la cabeza y obligándolu a seguir fuxendo. Eso ye lo que diba facer.
Sí, yera un animal. Nel fondo quién nun lo yera.

Continuará...

Lleer Más...

Nueva Camiseta

Esti ye'l diseñu de la nueva camiseta TrayasgayA. Ta disponible en varios colores y talles. El diseñu ta basau en un tatuaxe que siempres quisimos facenos, pero dempues de pensar un puquiñín dímonos cuenta que yera más fácil grabalo n'una camiseta de quita y pon. Menos doloroso, si canses, pues quitala y poner otra. Y sobre too, muncho más barato

Lleer Más...

El Güelu y Los Bígaros (verídico)

...entós vi a mio güelu sentáu na so mecedora como yera vezu n'él y paeciome que-y podíen apetecer. Llevantando la mio voz un puquiñín más de lo normal, entrugue-y:

-¡¡Güelu!!, ¿Quiés unos bígaros?

Él echome una güeyada penriba les gafes que siempres llebaba apoyaes nel mesmu picu les narices y retrucó:

-Non fíu, que la ultima vez que los comí taben enllenos de cocos...

Lleer Más...

La Fuxida. Capítulu 1.

1. LA FUXIDA Corrió pela cera unos cuantos metros ensin aparase nin tan siquier a char una güeyada a les sos espaldes. Esquivó la poca xente qu’inda andaba pela cai a eses hores y que nun alvirtieron la so presencia. Solamente una muyer asustada cola fuxida dio un pequeñu saltu, quitándose del so camín. Crució la cai ensin mirar. Tenía abonda priesa como p’aparase a esperar que dexaren de pasar coches. Les lluces de los focos esllumábenlu, dibuxando nel suelu la so solombra. Tuvo suerte. Nun yera hora pa conducir y nun había munchu trasiegu. Llegó al parque y sintióse seguru. La nueche parecía facese muncho más escura equí, pero nun dexó de correr nin un segundu. Llegó a unos matos y entós abellugóse nellos. Taba solu. Nadie fuere tres d’él, pero siguía sin sentise seguru. Aprovechó pa garrar l’álitu que-y faltaba, malpenes unos segundos, y empezó otra vegada a correr. Siguió a la par de les solombres y la escuridá d’árboles, sebes y bardiales d’aquel parcucu que se tenía vuelto una islla onde guardase na ciudá. Una ciudá que parecía que nun dormía nunca; onde’l peligru nun terminaba; onde’l sol yera camudáu toles nueches por milenta lluces de milenta colores y que facía cuasi imposible orientase dientro d’aquel estrañu mundu. Taba mui llonxe de casa. Un día primero fuere buscase la vida a otros llugares, a otres barriaes. Nos últimos tiempos la competencia creciere nel que fuere’l so barriu, afogándolu de tal forma que se-y facía imposible siguir asina. Tuvo que colar. Buscar otres zones. Nun podía quedase ellí si quería supervivir. Pero la situación nun yera mui diferentes n’otros sitios y, ellí onde fue, atopóse con más competencia. Aquelles tierres teníen amu. Un amu que taba dispuestu a dar la vida por defendeles si facía falta. Cansáu, famientu y temerosu fuxó. Continuará...

Lleer Más...

Fíate de la Prensa

Na Nueva España del Miercoles, 2 d'Agostu de 2006 pue atopase una noticia na páxina 56 que tien el siguiente titular "Varios cientos de enfermeros asturianos quedan sin plaza por un supuesto error del Ministerio".

Lleendo esto paez una inxusticia indiscutible, ¡¡¡quedar ensin plaza dempues de sacala llegalmente n'una oposición y encima por culpa un fallu del Ministeriu!!! Ye escandaloso, ablucante, un casu ensin precedentes na hestoria de les oposiciones n'esti pais. Pero por enrriba too ye ¡¡¡MENTIRA!!!

Nengun enfermeru/a que sacó plaza en propiedá na cabera oposición estraordinaria del ya inesistente INSALUD va a quedar ensin ella. Lo que braveramente pasó y se pue entender lleendo la noticia completa de La Nueva España ye que hebo muncha xente que cubrió mal la solicitú de plaza por que yeren 1.688 códigos compuestu cada un d'ellos por 11 caracteres, polo que yera perfácil equivocase. Amás, hay que xunir qu'hay un rumor que diz que'l ordenador confundió dalgun caracter y nun valoró de forma correuta determinaes solicitudes. Esta xente ta pendiente que-yos valoren la reclamación. En casu negativu pasarien a una llista d'escedencia voluntaria onde tendríen qu'esperar a que los demás (trasllaos y los que cubrieron bien les solicitudes) sepan en que llugar garren la plaza pa conocer el so destín. En nengún casu quedar ensin plaza.

Comu pue ser posible que lleendo'l titular d'una noticia s'entienda claramente una cosa y llueu lleendo la noticia entera, te des cuenta de to lo contrario. ¿Ye casualidá? ¿sensacionalismu? ¿vende más lo estremo y sorprendente, aunque seya mentira?

Lleer Más...